သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ပိုတ်းယိုဝ်းတိုၵ်းတေႃး သိုၵ်းၽွမ်ႉႁူမ်ႈ ယၢင်းလႅင် – တီႈၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း။

တႄႇဢဝ်ဝၼ်းတီႈ 3/10/2024 မႃး သိုၵ်းမၢၼ်ႈ လႄႈ ပျီႇတူ့ၸိတ့်ပဢူဝ်း PNO တင်း  တပ်ႉၽွမ်ႉႁူမ်ႈ လုၵ်ႉၽိုၼ်ႉယၢင်းလႅင်  ယိုဝ်းၵၼ်ၼႂ်းၸႄႈဝဵင်းပၢင်လွင်း ။ ၵူၼ်းမိူင်းတႃႇ 13 ဝၢၼ်ႈ ပၢႆႈၽေးသိုၵ်း ႁူဝ်ၼပ်ႉၵူၼ်းတင်းမူတ်း ဢမ်ႇယွမ်း 2 မိုၼ်ႇဝႃႈၼႆ။   

ၵူၼ်းမိူင်း ဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ၶၢဝ်းတၢင်း 10 ဝၼ်းပၢႆယဝ်ႉ တိုၵ်ႉလႆႈယိၼ်း သဵင်ၵွင်ႈလူင်ယူႇ။   သိုၵ်းမၢၼ်ႈဢဝ်ႁိူဝ်းမိၼ်မႃးပွႆႇမၢၵ်ႇ ။ ၵူၼ်းဝၢၼ်ႈလႆႈဢွၼ်ၵၼ်ပၢႆႈဢွၵ်ႇဝၢၼ်ႈ ။ ပၢႆႈၵေႃႉႁူးၵေႃႉတၢင်း   ”- ဝႃႈၼႆ ။  

ဝၢၼ်ႈဢၼ်လႆပၢႆၽေး သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇတႄႉပဵၼ် ဝၢၼ်ႈမႂ်ႇ၊ ဝၢၼ်ႈတလွတ်ႈမူး (ဝၢၼ်ႈပဢူဝ်း)၊ ဝၢၼ်ႈၵုင်းပဝ်း၊ ဝၢၼ်ႈသေႃလမ်ၸၢၼ်း၊ ႁွင်ႇ၊ လွႆထွႆး၊ ၼမ်ႉၽႃမူ၊ လွႆၵဵင်ႈ၊ ၼွင်ဝူဝ်း၊ ပၢင်ႇၸူင်၊ လွႆဝူဝ်း၊ လွႆလဝ်း ၸိူဝ်းၼႆႉ။ ၼိုင်ႈဝၢၼ်ႈမီးႁူဝ်ၼပ်ႉၵူၼ်းမွၵ်ႈလႂ်တႄႉ ဢမ်ႇႁူႉႁူဝ်ၼပ်ႉတႅတ်ႈတေႃး။

ၸိူဝ်းၶဝ် ပၢႆႈၵႂႃႇတၢင်းၸႄႈဝဵင်းပၢင်လွင်း ၊ ၸႄႈဝဵင်းယွင်ႁူၺ်ႈ ၊ ဝဵင်းၼွင်တယႃး သွၼ်ႈယူႇၸွမ်း ႁိူၼ်းပီႈၽႂ်ၼွင်ႉမၼ်းလႄႈၸွမ်းဝတ်ႉဝႃးၽႃသိူဝ်ႇ။ ယၢမ်းလဵဝ်  ယၢပ်ႇၽိုတ်ႇ တီႈယူႇတင်းသဝ်းလႄႈ တႃႇႁႃၵိၼ်လဵင်ႉတွင်ႉဝႆႉ ဝႃႈၼႆ။

 ၵူၼ်းမိူင်းဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ- “ၵူၼ်းပၢႆႈၽေးသိုၵ်းၵေႃႈတေဢမ်ႇမီးသင်ၵိၼ်ယဝ်ႉ၊ ၶၢဝ်းၼႆႉပဵၼ်ၶၢဝ်း ၵဵပ်းမၢၵ်ႇၶဝ်ႈတဝ်ႈၼမ့် ၼႂ်းသူၼ်ၼႂ်းႁႆႈၵႂႃႇၶၢႆ ၊ ပဵၼ်ပၢင်တိုၵ်းသေ ၵိုင်ႉၵၢင်ႉလႆႈပၢႆႈ ၸိူင်ႉၼႆ သုမ်းၵေႃႈသုမ်း မၢင် ၸိူဝ်းဢမ်ႇတၼ်းလႆႈသင် လႆႈပၢႆႈၽေးသိုၵ်းၵေႃႈမီး ”- ဝႃႈၼႆ။

ၾၢႆႇၼိုင်ႈ သိုၵ်းမၢၼ်ႈတင်းပျီတူႉၸိတ်ႉပဢူဝ်းသမ်ႉ တင်ႈၵဵတ်ႉလၢၼ်ႇ ဢမ်ႇပၼ်ၵူၼ်းမိူင်းပၢႆႈဢွၵ်ႇပိုၼ်ႉတီႈ။    

“ဢၼ်ၵိုတ်းဝႆ့တီႈဝၢၼ်ႈဢမ်ႇၸၢင်ႈဢွၵ်ႇမႃးၵေႃႈမီးဝႆ့ ၊ တေၵိုတ်းဝႆ့ ၼိုင်ႈဝၢၼ်ႈၼႆ့မီးၸမ် 50 ။ သိုၵ်းမၢၼ်ႈဢိုတ်းတၢင်းဝႆ့လႄႈ ၵူၼ်းဝၢၼ်ႈဢမ်ႇၸၢင်ႈပၢႆႈ ။ ယၢမ်းလဵဝ် သဵၼ်ႈတၢင်းထိူၼ်ႇ ၊ တၢင်းၼမ့် ၊ တၢင်းၵႃးဢမ်ႇၵႂႃႇလႆႈ ၶဝ်ဢိုတ်းဝႆ့”- ဝႃႈၼႆ ။

တီႈသိုၵ်းမၢၼ်ႈတင်း သိုၵ်းယၢင်းလႅင် ပိုတ်းယိုဝ်းၵၼ်ၼႆႉ ပဵၼ်ၾၢႆႇတၢင်းၸၢၼ်း ဝဵင်းပၢင်လွင်းမွၵ်ႈ 27 လၵ်း  ။

မိူဝ်ႈ  ဝၼ်းတီႈ 17/09/2024 တီႈဝၢၼ်ႈမႂ်ႇၼၼ်ႉ ဢမ်ႇမီးပဢင်တိုၵ်း။ ၵူၺ်းၵႃႈသိုၵ်းမၢၼ်ႈယိုဝ်းၵွင်ႈၾၢႆႇလဵဝ်။ ၸၢၵ်ႇမၢၵ်ႇတိူဝ်ႉၵူၼ်းဝၢၼ်ႈမၢတ်ႇၸဵပ်း။ 

သိုၵ်းမၢၼ်ႈထႅမ်ႁႅင်းသိုၵ်းၶဝ်ႈပိုၼ်ႉတီႈ တီႈဢၼ်ပဵၼ်ပၢင်တိုၵ်း။ ၾၢႆႇၼိုင်ႈလုၵ်ႉတီႈတပ်ႉၵွင်ႈလူင် ဢမတ (တပ်ႉဢမျွၵ်ႈ)သေယိုဝ်းၵွင်ႈလူင်ၵႂႃႇၵူႈႁူးၵူႈတၢင်း။ ၵူၼ်းဝၢၼ်ႈဢမ်ႇမီးလွင်ႈႁူမ်ႇလူမ်ႈ။ လႆႈၾၢင်ႉၵူဝ်ႁႄဝႆႉယူႇၵူႈၶၢဝ်း။

 ဢၼ်ထႅမ်ႁႅင်းသိုၵ်းမၢၼ်ႈသေပိုတ်းယိုဝ်းၸွႆႈၼႆႉသမ်ႉပဵၼ်ပျီႇတူႉၸိတ်ႉပဢူဝ်း PNO ဢၼ်လုၵ်ႉတၢင်းမိူင်းတႆး ပွတ်းၸၢၼ်းၼႆႉၵႂႃႇ – ၵူၼ်းပိုၼ်ႉတီႈလၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ် )