ဝၢႆးၽူႈၵွၼ်းဝၢၼ်ႈ 2 ၽူဝ်မေး ၺႃးယိုဝ်းတၢႆယဝ်ႉၼၼ်ႉ သိုၵ်းမၢၼ်ႈ ၶဝ်ႈၵူတ်ႇထတ်းၼႂ်းဝၢၼ်ႈသေ တီႉၺွပ်းၵႂႃႇ ၵူၼ်းဝၢၼ်ႈ 2 ၵေႃႉ တေႃႇထိုင်ဝၼ်းတီႈ 14 ၼႆႉ ယင်းပႆႇပွႆႇတူဝ်လွတ်ႈၶိုၼ်းမႃး ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 13/10/2024 သွင်ၽူဝ်မေး ၽူႈၵွၼ်းဝၢၼ်ႈတဵင်ႇၵူင်း ၸႄႈဝဵင်းယႂႃႇငၢၼ်ႇ ၸိုင်ႈတႆး ပွတ်း ၸၢၼ်း ၺႃးၸုမ်းဢမ်ႇႁူႉၾၢႆႇ ၶဝ်ႈယိုဝ်းတၢႆၵိုၵ်းႁိူၼ်း ဝၢႆးၼၼ်ႉ သိုၵ်းမၢၼ်ႈ ၶဝ်ႈၵူတ်ႇထတ်းၼႂ်းဝၢၼ်ႈသေ တီႉၺွပ်းၵႂႃႇ တေႃႇထူၺ်း ဢႃယု 50 ပီလႄႈ ဢူးယေးဝိတ်း ဢႃယု 60 ပီ ႁိုင်ၶၢဝ်းတၢင်း 2 ဝၼ်းယဝ်ႉ ပႆႇပွႆႇတူဝ်ၶိုၼ်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ႁိူၼ်းတေႃႇထူၺ်းၼႆႉ မီးဝႆႉတီႈႁၢင်ဝၢၼ်ႈ၊ ဝၢႆးၸုမ်းဢမ်ႇ ႁူႉၾၢႆႇ ၶဝ်ႈယိုဝ်းၶႃႈတၢႆ ၽူႈၵွၼ်းဝၢၼ်ႈယဝ်ႉ ယိုဝ်းၵွင်ႈၶိုၼ်ႈၾႃႉသေ ဢွၵ်ႇၵႂႃႇတၢင်းႁၢင်ဝၢၼ်ႈ၊ သိုၵ်းမၢၼ်ႈ ထၢင်ႇဝႃႈ လႅပ်ႈထဝ်ႈယိင်းၼၼ်ႉ တေတၼ်းႁၼ်ၸွမ်းယူႇႁိုဝ်ၼႆသေ တီႉၺွပ်းၵႂႃႇ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 12 ယၢမ်းၵၢင်ၶမ်ႈ 6 မူင်းၶိုင်ႈ မီးၸုမ်းဢမ်ႇႁူႉၾၢႆႇ ဢဵၼ်ႁႅင်း 8 ၵေႃႉ ၶဝ်ႈယိုဝ်း ဢူးၸေႃႇလုၼ်ႇ ၽူႈၵွၼ်းဝၢၼ်ႈတဵင်ႇၵူင်းတင်း မေးၼၢင်း တီႈၼႂ်းႁိူၼ်းယေး တၢႆထင်တီႈ ဝႃႈၼႆ။
ဝၢႆးလင် သွင်ၽူဝ်မေး ၽူႈၵွၼ်းဝၢၼ်ႈ ၺႃးၶႃႈတၢႆၼႆယဝ်ႉ သိုၵ်းမၢၼ်ႈ တိူဝ်းၵူတ်ႇထတ်းမႃးႁၢဝ်ႈႁႅင်း၊ ၾၢႆႇၼိုင်ႈၵေႃႈ ၼႄၶေႃႈဢၢင်ႈဝႃႈ ၵဵပ်းသဵၼ်ႈမၢႆႁူဝ်ၵူၼ်းၼႆသေ ၶဝ်ႈၵူတ်ႇထတ်းပႃး ၼႂ်းႁိူၼ်းယေးလႄႈ ႁဵတ်းႁႂ်ႈၵူၼ်းမိူင်း မႆႈၸႂ်လွင်ႈႁူမ်ႇလူမ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ