ပူၼ်ႉမႃး မိူဝ်ႈဝၼ်းတီႈ 12/10/2024 ယၢမ်းၵၢင်ၶမ်ႈ 6 မူင်းၶိုင်ႈ မီးၸုမ်းဢမ်ႇႁူႉၾၢႆႇ ဢဵၼ်ႁႅင်း 8 ၵေႃႉ ၶဝ်ႈယိုဝ်း ဢူး ၸေႃႇလုၼ်ႇ ၽူႈၵွၼ်းဝၢၼ်ႈ (ပူႇၵၢင်ႉဝၢၼ်ႈ) တဵင်ႇၵူင်း ၸႄႈဝဵင်းယႂႃႇငၢၼ်ႇလႄႈ မေးၼၢင်းမၼ်းၼႂ်းႁိူၼ်း တၢႆထင်တီႈ။
ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းသဵင်ၵွင်ႈတႅၵ်ႇ ၵၢင်ၶမ်ႈမွၵ်ႈ 6 မူင်းၶိုင်ႈၼႆႉ ႁဝ်း ၶႃႈ တူၵ်းၸႂ်သေ ၼႅတ်ႈလႅၼ်ႈၶဝ်ႈၼႂ်းႁိူၼ်း။ ထၢင်ႇဝႃႈ သိုၵ်းမၢၼ်ႈမႃးၼႆဢေႃႈ။ တေႁဵတ်းႁိုဝ်ၸႂ်ႈ မီးၵူၼ်းမႃးယိုဝ်း သွင်ၽူဝ်မေး (ၽူႈၵွၼ်းဝၢၼ်ႈ) တၢႆၶႃႈဢေႃႈ”- ဝႃႈၼႆ။
သွင်ၽူဝ်မေး ၽူႈၵွၼ်းဝၢၼ်ႈၼႆႉ ယူႇတီႈ သိုၵ်းမၢၼ်ႈ ယုၵ်ႉတၢင်ႇဝႆႉသေဢမ်ႇၵႃး ၵဵဝ်ႇၵပ်းလွင်ႈၵူၼ်းဝၢၼ်ႈ ၸိူဝ်းပၼ် ႁႅင်း ပိူင်တီႇမူဝ်ႇၶရေႇသီႇ(Democracy) လႄႈ ၵူၼ်းၼုမ်ႇ ဢၼ်ၶဝ်ႈပႃးတူင်ႉၼိုင် ၸိူဝ်းၼႆႉၵေႃႈ ၺႃးၵဵပ်းသဵၼ်ႈမၢႆ သူင်ႇပၼ်တီႈသိုၵ်းမၢၼ်ႈ ဝႃႈၼႆ။
“တီႈဝၢၼ်ႈၼၼ်ႉ ၵူၼ်းၶဝ်ႈၸုမ်းပိဝ်ႇသေႃးထီးၵေႃႈ မီးဢေႃႈ။ ၵူၺ်းၵႃႈ ၶဝ်ဢမ်ႇႁတ်းၵႂႃႇ တူင်ႉၼိုင်ၸွမ်းၼႂ်းထိူၼ်ႇ။ ယွၼ်ႉဝႃႈတီႈဝၢၼ်ႈၼၼ်ႉ ၶဝ်မီးၵွင်ႈၼင်ႇၵၼ်လႄႈ သင်ဝႃႈ ဢမ်ႇမီးလွင်ႈ ႁၢၼ်ႉၸႂ် တၢင်းႁၼ်ထိုင် ဢမ်ႇမိူၼ်ၵၼ် ၵေႃႈ ၶႃႈႁႅမ်ၵၼ်တၢႆ ၸိူင်ႉၼၼ်ၶႃႈယဝ်ႉ။ လီၵူဝ်ဢေႃႈ”- ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ မွင်ႇၵူဝ်ႇမေႃႉ ဢၼ်ပဵၼ်လုၵ်ႈၸၢႆး ၽူႈၵွၼ်းဝၢၼ်ႈၼၼ်ႉၵေႃႈ ၶဝ်ႈႁဵတ်းဝႆႉ ပလိၵ်ႈတႂ်ႈသိုၵ်းမၢၼ်ႈ ယိုတ်းမိူင်း။ ဝၢႆးသွင်ၽူဝ်မေး ၺႃးၶႃႈတၢႆယဝ်ႉ ၸုမ်းဢမ်ႇႁူႉၾၢႆႇ တႅမ်ႈလိၵ်ႈတိတ်းဝႆႉ တီႈၼႃႈႁိူၼ်းထႅင်ႈဝႃႈ တိုၵ်ႉမီးဝႆႉၵူၼ်း (ပဝ်ႉမၢႆ) ဢၼ်တေလႆႈၶႃႈတၢႆထႅင်ႈ ဝႃႈၼႆပႃး။
ယွၼ်ႉၽူႈၵွၼ်းဝၢၼ်ႈ သွင်ၽူဝ်မေး ၺႃးၶႃႈတၢႆသေ ၵူၼ်းပိုၼ်ႉတီႈၵေႃႈ ဢမ်ႇႁတ်းၵႂႃႇႁႆႈၵႂႃႇသူၼ် ၵူဝ်သိုၵ်းမၢၼ်ႈလႄႈ ၸုမ်းပိဝ်ႇသေႃးထီး တႂ်ႈသိုၵ်းမၢၼ်ႈ ႁဵတ်းႁၢႆႉလွၵ်ႇငိုတ်ႈတေႃႇၼႆ – ၵူၼ်းပိုၼ်ႉတီႈ ၵေႃႉၼိုင်ႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ