ဝၼ်းတီႈ 13/10/2024 ယၢမ်းၵၢင်ၶမ်ႈ 7 မူင်း ယူႇတီႈ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ 1 ဢွၼ်ႁူဝ် ၸတ်းႁဵတ်းဝၼ်းၶုၵ်းထူပ်း ဢဝ်ၵုင်ႇမုၼ် ၸဝ်ႈမုၼ်ယႂ်ႇၶုၼ်ႁေႃၶမ်း တူၼ်ထူၼ်ႈ 9 ၼွၼ်းၽႄးၶွပ်ႈတဵမ် 8 ပီသေ လႆႈၸတ်းႁဵတ်းပၢင်ၶုၵ်းထူပ်း တီႈႁူင်းႁေႃးပၢင်ႇပဵင်းၾႃႉ ၼႃႈလိၼ်သိုၵ်းမၢႆ 1 လွႆၵေႃႇဝၼ်း RCSS မီးၽူႈၶဝ်ႈ ႁူမ်ႈ 919 ၵေႃႉ။
ၽူႈမီးပုၼ်ႈၽွၼ်း တီႈၼႃႈလိၼ်သိုၵ်းမၢႆ 1 လၢတ်ႈတီႈၽူႈတွႆႇႁွၵ်ႈဝႃႈ – “ၸဵမ်မိူဝ်ႈ ၸဝ်ႈႁဝ်းပႆႇၼွၼ်းၽႄးၼၼ်ႉ ၵေႃႈ ႁဝ်းၶႃႈၸတ်းႁဵတ်း ပၢင်ၶုၵ်းထူပ်းဝၼ်းၵိူတ်ႇမႃးၵူႈပီ ပေႃးထိုင်မႃးဝၼ်းတီႈ 5 လိူၼ်သိပ်းသွင်ၸိုင်။ ဝၢႆးၸဝ်ႈႁဝ်း ၼွၼ်းၽႄးၵႂႃႇယဝ်ႉ ႁဝ်းၶႃႈ ၶိုၼ်းသိုပ်ႇၸတ်းႁဵတ်း ပၢင်ၶုၵ်းထူပ်းမွင်ၸႂ် ၸဝ်ႈႁဝ်းမႃး မီးၶၢဝ်းတၢင်း 8 ပီ ၼႆယဝ်ႉ”- ဝႃႈၼႆ။
ၼႂ်းၶပ်ႉမၢႆ ပၢင်ၶုၵ်းထူပ်းၼႆႉ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ 1 ၵႅမ်ၽူႈပွင်ၵၢၼ်သိုၵ်း တပ်ႉသိုၵ်းၸိုင်ႈတႆး ႁူမ်ႈလူၺ်ႈ ၽူႈယႂ်ႇၵူၼ်းလူင် ဢွၼ်ၵၼ်ဝၢင်းတူင်ႇမွၵ်ႇမွင်ၸႂ်ၾၢႆႇၼႃႈ ၸဝ်ႈမုၼ်ယႂ်ႇ ၶုၼ်ႁေႃၶမ်း တူၼ်ထူၼ်ႈ 9 ၼႆယဝ်ႉ။
လိူဝ်ၼၼ်ႉ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၸပ်းတႅၼ်း ၶိူင်ႈပူႇၸေႃႇ (ၶိူင်ႈထွင်းၼွႆႉ) လႄႈ သိုပ်ႇၸပ်းတဵၼ်းယိုၼ်ႈထိုင် ၽူႈယႂ်ႇၵူၼ်းလူင် ဢိၵ်ႇပေႃႈမႄႈၵူၼ်းမိူင်း ၽူႈၶိုၼ်ႈႁွတ်ႈ ပၢင်ၶုၵ်းထူပ်း ဢဝ်ၵုင်ႇမုၼ်ႁႂ်ႈၸွတ်ႈတူဝ်ႈထိုင် ၼႂ်းမိုဝ်းသိုဝ်ႈၽႂ်မၼ်းၵူႈၵေႃႉ။ ႁူမ်ႈၵၼ် ၸုၵ်းၼိမ်သေ တိူင်ႇၵၢဝ်ႇယွၼ်းသူးထိုင် ၼႆယဝ်ႉ။
တွၼ်ႈတႃႇ ပၢင်ၶုၵ်းထူပ်းၼႆႉသေ တွၼ်ႈၵၢင်ၼႂ် 6 မူင်းသမ်ႉ ၵၢပ်ႈသွမ်းၼႂ် သင်ၶၸဝ်ႈ တီႈဝတ်ႉၵေႃႇဝၼ်းဢိၼ်း။ ယၢမ်းၵၢင်ၼႂ် 10 မူင်း လူႇတၢၼ်းယၢတ်ႇၼမ်ႉ ၸႅၵ်ႇၽႄၵုသူလ်ထိုင် ၸဝ်ႈမုၼ်ယႂ်ႇၶုၼ်ႁေႃၶမ်း တူၼ်ထူၼ်ႈ 9 ၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ