ၼႃႈလိၼ်သိုၵ်းမၢႆ 1 လွႆၵေႃႇဝၼ်း ၸတ်းႁဵတ်းပၢင်ၶုၵ်ႉထူပ်း ဢဝ်ၵုင်ႇမုၼ် ဝၼ်းၵိူတ်ႇၸဝ်ႈမုၼ်ယႂ်ႇၶုၼ် ႁေႃၶမ်းထႆး တူၼ်ထီႉ 9 မီးၽူႈယႂ်ႇၵူၼ်းလူင် ၶဝ်ႈႁူမ်ႈ 1,000 ပၢႆ။
ပူၼ်ႉမႃး မိူဝ်ႈဝၼ်းတီႈ 05/12/2024 ယၢမ်းၵၢင်ၶမ်ႈ 7 မူင်း ယူႇတီႈ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ (1) ၵႅမ်ၽူႈပွင်ၵၢၼ်သိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢွၼ်ႁူဝ်ၸတ်းႁဵတ်း ပၢင်ၶုၵ်ႉထူပ်း ဢဝ်ၵုင်ႇမုၼ် ဝၼ်းၵိူတ်ႇ ၸဝ်ႈမုၼ်ယႂ်ႇၶုၼ်ႁေႃၶမ်း ထႆး တီႈႁူင်းႁေႃးပၢင်ႇပဵင်းၾႃႉ ၼႃႈလိၼ်သိုၵ်းမၢႆ 1 လွႆၵေႃႇဝၼ်း ၼႆယဝ်ႉ။
ၽူႈမီးပုၼ်ႈၽွၼ်း တီႈၼႃႈလိၼ်သိုၵ်းမၢႆ 1 လၢတ်ႈၽူႈတွႆႇႁွၵ်ႈဝႃႈ – “ယူႇတီႈ လွႆၵေႃႇဝၼ်းႁဝ်းၶႃႈသေ ၸတ်းႁဵတ်းမႃး ပၢင်ၶုၵ်ႉထူပ်း ဝၼ်းၵိူတ်ႇၸဝ်ႈမုၼ်ယႂ်ႇၶုၼ်ႁေႃၶမ်း တူၼ်ထီႉ 9 ၼႆႉ မႃးၵူႈပီၶႃႈယဝ်ႉ။ တႄႇၸတ်းမႃး တင်ႈတႄႇမိူဝ်ႈပီ 2004 ၼၼ်ႉမႃးသေ ႁၢၼ်ႉတေႃႇထိုင်ယၢမ်းလဵဝ်ၼႆႉ။ ပီၼႆႉ မီးၵူႈၸၢဝ်းၶိူဝ်းလႄႈ ၽူႈယႂ်ႇၵူၼ်းလူင် ၸွမ်းလႅၼ်လိၼ် မႃးၶဝ်ႈႁူမ်ႈ 1,000 ပၢႆ”- ဝႃႈၼႆ။
ၼႂ်းပၢင်ၶုၵ်ႉထူပ်းၼၼ်ႉ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ သၢၵ်ႈဢုပ်းငိုၼ်း/ ၶမ်း ႁူမ်ႈလူၺ်ႈ ၽူႈယႂ်ႇၵူၼ်း လူင်လႄႈ ၽူႈၵွၼ်းႁွင်ႈၵၢၼ်/ တပ်ႉ ၸိူဝ်းၼႆႉ သၢၵ်ႈဢုပ်းမွၵ်ႇ။ လိူဝ်ၼၼ်ႉ ၸပ်းတဵၼ်းၶိူင်ႈပူႇၸေႃႇလႄႈ သိုပ်ႇၸပ်းယိုၼ်ႈထိုင် ၽူႈယႂ်ႇၵူၼ်းလူင် ဢိၵ်ႇပေႃႈမႄႈၵူၼ်းမိူင်း ၽူႈၶိုၼ်ႈႁွတ်ႈပၢင်ၶုၵ်ႉထူပ်းႁႂ်ႈၸွတ်ႇတူဝ်ႈ ထိုင်ၼႂ်းမိုဝ်း သိုဝ်ႈၽႂ်မၼ်းၵူႈ ၵေႃႉလႄႈ ႁူမ်ႈၵၼ် တိူင်ႇၵၢဝ်ႇယွၼ်းသူးၵႂႃႇ ႁင်းၽႂ်မၼ်းၵမ်းသိုဝ်ႈ ၼႆယဝ်ႉ။
ၼႂ်းတိုဝ်ႉတၢင်း ဝၼ်းၵိူတ်ႇ ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ထီႉ 9 ၼႂ်းဝၼ်းတီႈ 5 ယၢမ်းၵၢင်ၼႂ်ၼႆႉ ႁူမ်ႈၵၼ်တၢင်ႇသွမ်းတေႃႇၽြႃး၊ ၵၢပ်ႈသွမ်းသင်ၶၸဝ်ႈ၊ လူႇတၢၼ်းယၢတ်ႇၼမ်ႉလႄႈ ၵၢပ်ႈသွမ်းသင်ၶၸဝ်ႈလႄႈ လဵင်ႉလူၵူၼ်းထဝ်ႈ/ ၵႄႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ