ႁိူၼ်းယေးၵူၼ်းမိူင်း ၸိူဝ်းထူပ်းၽေးၼမ်ႉထူမ်ႈ ၼႂ်းၸႄႈဝဵင်းၵဵင်းတုင် ဢွၼ်ၵၼ်ထူပ်းတၢင်းယၢပ်ႇၽိုတ်ႇ တႃႇမႄး ၶိုၼ်းႁိူၼ်းယေး။
ယၢမ်းလဵဝ် ႁိူၼ်းယေးၵူၼ်းဝၢၼ်ႈ တီႈၼႂ်းဢိူင်ႇၵၢတ်ႇထၢႆႈ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း လင်ႁိူၼ်းမွၵ်ႈ 10 လင် ၺႃးၼမ်ႉလုပ်ႇထူမ်ႈလူႉၵွႆလႄႈ ၵွပ်ႈၼႆ ပႆႇၸၢင်ႈမႄးၵုမ်းလုမ်းလႃး ၵေႃႇသၢင်ႈႁဵတ်းမႂ်ႇၶိုၼ်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉႁူၺ်ႈလွႆ လႆလူင်းထူမ်ႈ ၼႂ်းဝၢၼ်ႈသေ တိူဝ်ႉၺႃးႁိူၼ်းလူႉၵွႆ 7 လင်။ ၵူၼ်းဝၢၼ်ႈတႄႉ ႁဵတ်းသုမ်ႉသေ ယူႇဝႆႉ။ ၵူၼ်းၼႂ်းဝၢၼ်ႈ မၢင်ၸိူဝ်းၵေႃႈ မႃးၽဵဝ်ႈၸွႆႈယူႇ တေႃႇထိုင်ယၢမ်းလဵဝ် ၵူၼ်းၸိူဝ်းႁိူၼ်းလူႉၵွႆၼၼ်ႉ ယင်းပႆႇၸၢင်ႈယူႇ”- ဝႃႈၼႆ။
လိူဝ်သေ တီႈဢိူင်ႇၵၢတ်ႇထၢႆႈၼႆႉယဝ်ႉ မိူၼ်ၼင်ႇ ၼႂ်းဢိူင်ႇယၢင်းလေႃး၊ ဢိူင်ႇယၢင်းၵဵင်၊ ပွၵ်ႉ 5 လႄႈ ပွၵ်ႉ 4 ၸွမ်းသဵၼ်ႈတၢင်းၵႂႃႇၶူင်ႇႁိူဝ်းမိၼ် ၸိူဝ်းၼၼ်ႉၵေႃႈ ၼမ်ႉလုပ်ႇထူမ်ႈႁၢဝ်ႈႁႅင်း မၢင်တီႈ လိုၵ်ႉထိုင်ၸူဝ်ႈၵူၼ်း ၼႆယဝ်ႉ။
“ဢၼ်ၼမ်ႉ လုပ်ႇထူမ်ႈႁႅင်း တီႈဝဵင်းၵဵင်းတုင် ပီၼႆႉ ပဵၼ်မႄႈၼမ်ႉၶိုၼ်တင်း မႄႈၼမ်ႉလၢပ်ႈ လူၼ်ႉၾင်ႇ သေ လုပ်ႇထူမ်ႈၶႃႈဢေႃႈ။ ဢၼ်ထူမ်ႈႁႅင်းတႄႉ ပဵၼ်သဵၼ်ႈတၢင်းၵႂႃႇၶူင်ႇႁိူဝ်းမိၼ်ၼၼ်ႉယဝ်ႉ။ မၢင်မူႇ ဝၢၼ်ႈ ၼမ်ႉဢမ်ႇတွၼ်ႉယၢမ်ႈထူမ်ႈၵေႃႈ ထူမ်ႈၶႃႈဢေႃႈ”- ၵူၼ်းပိုၼ်ႉတီႈ ဝဵင်းၵဵင်းတုင် သိုပ်ႇလၢတ်ႈၼႄ ၼင်ႇၼႆ။
ဢၼ်ၼမ်ႉလုပ်ႇထူမ်ႈ ႁိူၼ်းယေးလူႉၵွႆ ၼႂ်းၸႄႈဝဵင်းၵဵင်းတုင် ႁၢဝ်ႈႁႅင်းၼႆႉ တႄႇမႃးၼႂ်းလိူၼ်သႅပ်ႊထႅမ်ႊထိူဝ်ႊ ၼၼ်ႉသေ ႁၢၼ်ႉတေႃႉယၢမ်းလဵဝ် ၼမ်ႉယင်းပႆႇယွမ်းလူင်းမူတ်း။ မၢင်ပိုၼ်ႉတီႈ ၼမ်ႉတိုၵ်ႉယိုင်ႈဝႆႉယူႇ၊ မၢင်ပိုၼ်ႉတီႈ ၶီႈၵူမ်ႇၶီႈငႂ်ႈ တိုၵ်ႉၵိုတ်းၶမ်ဝႆႉ ထႅင်ႈတင်းၼမ်။ ယဝ်ႉၵေႃႈ တူင်ႈႁႆႈၼႃး ၸိူဝ်း ၼႆႉ ထုၵ်ႇသၢႆးထူမ်ႈသႂ်ႇဝႆႉထႅင်ႈ တင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ