မိူဝ်ႈၼႆႉ ဝၼ်းတီႈ 10/10/2024 ယၢမ်းၵၢင်ၼႂ် 2 မူင်းၶိုင်ႈ သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇ တီႈဝၢၼ်ႈမၢၵ်ႇၶႅၵ်း ဢိူင်ႇပၢင်ႇလေႃႉ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉၺႃးၵူၼ်း မၢတ်ႇၸဵပ်း 5 ၵေႃႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတီႈဝၢၼ်ႈမၢၵ်ႇ ၶႅၵ်း တိူဝ်ႉၺႃး ႁိူၼ်းယေးလူႉၵွႆ 1 လင်၊ သိုင်ႇၾႆး 1 လင်၊ တူၵ်းသႂ်ႇတီႈၼႂ်းသူၼ် 1 လုၵ်ႈ။ တင်းမူတ်း 3 လုၵ်ႈဢေႃႈ ဢၼ်ၶဝ်မႃးပွႆႇၼႆႉ။ လွင်ႈၵူၼ်းလူႉတၢႆတႄႉ ဢမ်ႇမီး တိူဝ်ႉၺႃးၵူၼ်းမၢတ်ႇၸဵပ်း မီး 5 ၵေႃႉဢေႃႈ”- ဝႃႈၼႆ။
ဝၢၼ်ႈမၢၵ်ႇၶႅၵ်းၼႆႉ မီးၼႂ်းဢိူင်ႇပၢင်ႇလေႃႉ တေယၢၼ်ဝဵင်းသႅၼ်ဝီမွၵ်ႈ 3 လၵ်း မီးဝႆႉတၢင်းဢွၵ်ႇၵႂႃႇ ၵုၼ်လူင် – ႁူဝ်ပၢင်ႇ။
“လႆႈႁူႉဝႃႈ တီႈဝၢၼ်ႈၼၼ်ႉ မီးဝႆႉ ၽူႈမီးၸၼ်ႉသိုၵ်းၵဝ်ႈၵၢင်ႉၶဝ်ယူႇဝႆႉ ပဵၼ်ၸၼ်ႉၸႄႈဝဵင်းၼႆၶႃႈဝႃႇ။ ၵွပ်ႈၼႆလႄႈ ၶဝ်မႃးပွႆႇႁိုဝ် ဢမ်ႇႁူႉ။ ဢၼ်သိုၵ်းမၢၼ်ႈ မႃးပွႆႇမၢၵ်ႇၼႆႉ ဢမ်ႇမႅၼ်ႈတီႈပဝ်ႉမၢႆမၼ်းၶႃႈ။ ၸူဝ်ႈသိုၵ်းမၢၼ်ႈ ၵႆႉမႃးပွႆႇမၢၵ်ႇ တီႈဝဵင်းသႅၼ်ဝီၼႆႉ ဢမ်ႇတွၼ်ႉတိူဝ်ႉၺႃး သိုၵ်းၵဝ်ႈၵၢင်ႉမႃးသေပွၵ်ႈ ဢၼ်ၺႃးတႄႉ ပဵၼ်ၵူၼ်းမိူင်းၵမ်ႈၼမ်ၶႃႈယဝ်ႉ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
ဝဵင်းသႅၼ်ဝီၼႆႉ ပဵၼ်တီႈသိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ တႄႇမိူဝ်ႈႁူဝ်ပီ 2024 ၼၼ်ႉမႃးသေ မိူဝ်ႈဝၼ်းတီႈ 06/08/2024 ၼၼ်ႉ ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇလိၵ်ႈပိုၼ်ၽၢဝ်ႇဝႆႉ ၼႂ်းလိူၼ်ၵျူႊလၢႆႊပူၼ်ႉမႃး ၼႆႉ သိုၵ်းမၢၼ်ႈ မႃးပွႆႇမၢၵ်ႇလူင် သႂ်ႇၼႂ်းဝဵင်းသႅၼ်ဝီၼႆႉ တိူဝ်ႉၺႃးၵူၼ်းမိူင်းလူႉတၢႆ 13 ၵေႃႉ၊ မၢတ်ႇၸဵပ်း 24 ၵေႃႉ၊ ႁိူၼ်းယေး လူႉၵွႆ 40 ပၢႆလႄႈ ႁူင်းႁဵၼ်းလူႉၵွႆ 3 လင် ဝႃႈၼႆ။
မိူဝ်ႈဝၼ်းတီႈ 09/10/2024 ယၢမ်းၵၢင်ၼႂ်ၸဝ်ႉ 2:25 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတူၵ်းသႂ်ႇ တီႈႁူင်းၸၢၵ်ႈၵိူဝ်ဝၢၼ် တၢၼ်ႇတွင်ႇဢူး ၶွင်ငူၺ်ႇယီႇပလႄး တီႈဝၢၼ်ႈသႅၼ်တေႃ ၸႄႈဝဵင်းမိူင်းယႆ တိူဝ်ႉၺႃး ၼၢင်းယိင်း လူႉတၢႆ 1 ၵေႃႉ၊ မၢတ်ႇၸဵပ်း 9 ၵေႃႉ ၼႂ်းၼၼ်ႉ မၢတ်ႇၸဵပ်းႁၢဝ်ႈႁႅင်း 2 ၵေႃႉ ထိုင်တီႈၶႃႈႁၵ်း ၶႅၼ်ႁၵ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ