ဝၼ်းတီႈ 07/10/2024 ယၢမ်းၵၢင်ၶိုၼ်း 11 မူင်းပၢႆ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတီႈဝၢၼ်ႈတၢၼ်းလွႆး ၸႄႈဝဵင်းတွင်ႇၵူၵ်ႉ မိူင်းရၶႅင်ႇ ၵူၼ်းမိူင်းၺႃးၸၢၵ်ႇမၢၵ်ႇ လူႉတၢႆဢမ်ႇယွမ်း 15 ၵေႃႉ မၢတ်ႇၸဵပ်းထႅင်ႈ 5 ၵေႃႉ။
ၶမ်ႈၶိုၼ်းၼၼ်ႉ ၶိူင်ႈမိၼ်သိုၵ်းမၢၼ်ႈ ၵျႅၵ်ႉၾၢႆႇတႃႇ မႃးပွႆႇမၢၵ်ႇ 2 ၵမ်း တူၵ်းတႅၵ်ႇတီႈယူႇႁိူၼ်းယေး ၵူၼ်းမိူင်းၵမ်းသိုဝ်ႈလႄႈ ႁဵတ်းႁႂ်ႈၵူၼ်းလူႉတၢႆ ပဵၼ်မူႇပဵၼ်ၸုမ်း ဝႃႈၼႆ။
ၵူၼ်းပိုၼ်ႉတီႈ လၢတ်ႈတီႈသိုဝ်ႇၶၢဝ်ႇ RFA ဝႃႈ – “ၼႂ်းၵူၼ်းလူႉတၢႆၼၼ်ႉ လုၵ်ႈဢွၼ်ႇတင်း ၼၢင်းယိင်း ၵေႃႈ ပႃးဝႆႉတင်းၼမ်၊ မၢင်ႁိူၼ်း မုင်ႉႁေႃႁိူၼ်းတင်းလင် လူႉတၢႆၵႂႃႇ ႁူဝ်ယွႆႈတႅတ်ႈတေႃးတႄႉ ပႆႇၸၢင်ႈယိုၼ်ယၼ်”- ဝႃႈၼႆ။
ဝၢၼ်ႈတၢၼ်းလွႆးၼႆႉ မိူဝ်ႈလိူၼ်ပူၼ်ႉမႃးၵေႃႈ သိုၵ်းမၢၼ်ႈ ယၢမ်ႈပွႆႇမၢၵ်ႇယဝ်ႉ ၵမ်းၼိုင်ႈ၊ မိူဝ်ႈၼၼ်ႉ ၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်း 5 ၵေႃႉ၊ ဢိင်ၼိူဝ် လွင်ႈၼႆႉသေ ၾၢႆႇသိုၵ်းမၢၼ်ႈတႄႉ ဢမ်ႇႁၼ်ပိုၼ် ၽၢဝ်ႇဢွၵ်ႇသင်။
ပူၼ်ႉမႃး မိူဝ်ႈလိူၼ်သႅပ်ႊထႅမ်ႊပိူဝ်ႊၼၼ်ႉ တီႈမိူင်းရၶႅင်ႇၼႆႉ ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသေ ၵူၼ်းမိူင်းဢိၵ်ႇပႃး ၽူႈၵၢၼ်ႉသိုၵ်း လူႉတၢႆမီးၸမ်ပၢၵ်ႇယဝ်ႉ – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ