တႄႇဢဝ် ဝၼ်းတီႈ 08/10/2024 ဝၼ်းဢိုတ်းလုမ်း (ဝၼ်းၸိူဝ်ႉၸၢတ်ႈမိူင်းၶႄႇ – အမျိုးသားနေ့ ပိတ်ရက်) ၼႆႉၵႂႃႇ မိူင်းၶႄႇ တေၸႂ်ႉတိုဝ်းႁုၼ်ႇႁၢင်ႈၸၢၵ်ႈ (ႁုၼ်ႇယူၼ်း – စက်ရုပ်) တိူမ်းႁႅင်းၾႆးၾႃႉ တီႈၼိူဝ်သဵၼ်ႈတၢင်းဝႆးယဝ်ႉ – ဝႃႈ ၼႆ။
ယိူင်းဢၢၼ်း တႃႇႁႂ်ႈၵူၼ်းမိူင်းၶႄႇ တေလႆႈလိုဝ်ႈသဝ်းၼႂ်းဝၼ်းလိုဝ်ႈသေ ၸိူဝ်းတေၸႂ်ႉတိုဝ်း ရူတ်ႉၵႃးၾႆးၾႃႉ EV သေ ဢွၵ်ႇၶၢဝ်းတၢင်း လိုဝ်ႈႁိူဝ်ႉလိုဝ်ႈၸႂ် ၼႂ်းဝၼ်းလိုဝ်ႈၶၢဝ်းယၢဝ်း (ပိတ်ရက်ရှည်ကာလ) ၼၼ်ႉ တေမီးလွင်ႈငၢႆႈလူမ်ၸႂ်။ ၵွပ်ႈၼၼ် ဢွင်ႈတီႈၵိုတ်းရူတ်ႉၵႃး ဢၼ်မီး ၼိူဝ်သဵၼ်ႈတၢင်းဝႆး သျႅၼ်ႊႁၢႆႊ- ၶုၼ်ႊမိင်ႊ (ရှန်ဟိုင်း – ကူမင်း) ၼၼ်ႉ ရူတ်ႉၵႃးၾႆးၾႃႉၶဝ် တေၵိုတ်းတိူမ်းႁႅင်းလႆႈယဝ်ႉ – ဝႃႈၼႆ။
တႃႇတေတိူမ်းႁႅင်းၾႆးၾႃႉလႆႈထိုင် 80% ၼၼ်ႉ တေလႆႈပႂ်ႉႁိုင် 1 ၸူဝ်ႈမူင်းၶိုင်ႈ – ၶွမ်ႊပၼီႊၾၢႆႇ ႁႅင်းထၢတ်ႈၾႆးၾႃႉ သျႅၼ်ႊႁၢႆႊလၢတ်ႈၼင်ႇၼႆ ။ မိူဝ်ႈပီၵၢႆပူၼ်ႉမႃး ၶၢဝ်းၼႆႉ ၵူၼ်းမိူင်းၸိူဝ်းၵိုတ်း တိူမ်းႁႅင်းရူတ်ႉၵႃးၾႆးၾႃႉ EV တီႈၼိူဝ်သဵၼ်ႈတၢင်းဝႆး သျႅၼ်ႊႁၢႆႊ ႁူမ်ႈၵၼ်တင်းမူတ်းမီးယူႇ 267,300 ၵီႊလူဝ်ႊဝပ်ႉ – ၼႆယဝ်ႉ။
ပေႃးႁွတ်ႈထိုင်မႃး ၶၢဝ်းဝၼ်းဢိုတ်းလုမ်း (ဝၼ်းၸိူဝ်ႉၸၢတ်ႈမိူင်းၶႄႇ) ၼႆ ၵူၼ်းမိူင်း ၸိူဝ်းဢွၵ်ႇဢႅဝ်ႇလႄႇ မီးၼမ်၊ ၸိူဝ်းၸႂ်ႉတိုဝ်းရူတ်ႉၵႃးၾႆးၾႃႉၵေႃႈ ၼမ်ၶိုၼ်ႈမႃးလႄႈ ၼင်ႇႁိုဝ် တေဢမ်ႇ လႆႈပႂ်ႉၶၢဝ်းယၢမ်းႁိုင်ၼၼ်ႉ ၸင်ႇလႆႈဢဝ် ႁုၼ်ႇႁၢင်ႈၸၢၵ်ႈ တိူမ်းႁႅင်းၾႆးၾႃႉ (အားသွင်းစက်ရုပ်) ၼႆႉသေ ၵႄႈလိတ်ႈၵႂႃႇ – ဝႃႈၼႆ။
ၸွမ်းၼင်ႇ လွင်ႈၶူၼ်ႉၶႂႃႉ ပီ 2023 သေ မိူင်းၶႄႇ ပဵၼ်မိူင်းဢၼ်ၸႂ်ႉတိုဝ်း ရူတ်ႉၵႃးၾႆးၾႃႉ ၼမ်လိူဝ်သေပိူၼ်ႈ ၸဵမ်ဢဝ်လွင်ႈႁဵတ်းဢွၵ်ႇတင်း လွင်ႈၸႂ်ႉတိုဝ်းၼႆႉ ပဵၼ်ဝႆႉထီႉၼိုင်ႈ။
လိူဝ်ၼၼ်ႉ မိူၼ်ၼင်ႇ မိူင်းဢမေႊရိၵၼ်ႊ(American)၊ ၵျႃႊမၼီႊ(Germany)၊ ၾရင်ႇသဵတ်ႈ(French)၊ United Kingdom(UK)၊ ၼေႊတိူဝ်ႊလႅၼ်ႊ(Netherlands) လႄႈ သုၺ်ႊတိၼ်ႊ(Sweden) ၸိူဝ်းၼႆႉၵေႃႈ ပဵၼ်မိူင်းၸိူဝ်း ၸႂ်ႉတိုဝ်းရူတ်ႉၵႃး ၾႆးၾႃႉ EV ၼမ်မိူၼ်ၵၼ် – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ