ၾူၼ်ဢမ်ႇတူၵ်းယဝ်ႉၵေႃႈ ၼမ်ႉတဵင်းတီႈဝဵင်းလၢင်းၶိူဝ်း တိုၵ်ႉသိုပ်ႇယိုင်ႈၶိုၼ်ႈႁၢဝ်ႈႁႅင်း ၵူၼ်းဝၢၼ်ႈၼမ်ႉဢုၼ်ႇ လႆႈ ႁွပ်ႇၶူဝ်းၶွင် ပၢႆႈၶိုၼ်ႈယူႇတီႈလွတ်ႈၽေး တီႈလွႆသုင်။

တႄႇဢဝ်ဝၼ်းတီႈ 04/10/2024 ယၢမ်းႁူဝ်ၶမ်ႈ ၼမ်ႉတဵင်းၼွင်းလူၼ်ႉၾင်ႇထႅင်ႈ ႁွပ်ႈၵမ်းသွင်။ ၼွင်းလတ်းႁူၺ်ႈႁွင်ႈ ဝၢၼ်ႈပူးၵမ်ႇ ၼႂ်းၶူးသေ ၶဝ်ႈထူမ်ႈဝၢၼ်ႈၼမ်ႉဢုၼ်ႇ ဝဵင်းလၢင်းၶိူဝ်းထႅင်ႈ။ ၵူၼ်းဝၢၼ်ႈၼမ်ႉဢုၼ်ႇ 350 ႁွပ်ႇၶူဝ်းၶွင်ပၢႆႈယူႇသဝ်း ၸွမ်းၶၢင်ႈတၢင်းၶိုၼ်ႈမိူင်းပၼ်ႇ ဢၼ်မီးပိုၼ်ႉတီႈသုင်။

ၵူၼ်းဝၢၼ်ႈၼမ်ႉဢုၼ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ၽွင်းၼမ်ႉၼွင်း ၶဝ်ႈဝၢၼ်ႈၵမ်းဢွၼ်တၢင်း (ဝၼ်းတီႈ 9 ထိုင် 16/09/2024) ၼၼ်ႉ ၶႃႈၶဝ်ဢမ်ႇတၼ်းလႆႈၶူဝ်းၶွင်သင်။ ၽိူဝ်ႇၼမ်ႉယွမ်းလူင်းသေ ၶိုၼ်းပွၵ်ႈယူႇႁိူၼ်းၶိုၼ်း ယင်းပႆႇပတ်းၽဵဝ်ႈလၢင်ႉယဝ်ႉ ၼမ်ႉသမ်ႉပေႃးၶိုၼ်းၶဝ်ႈထူမ်ႈဝၢၼ်ႈထႅင်ႈ။ ၵမ်းၼႆႉတႄႉ တၼ်းဢဝ်ၶူဝ်းလမ်ႇလွင်ႈ ယူႇၽွင်ႈ ၼင်ႇၵဝ်ႇဢေႃႈ။ ၵမ်ႈၽွင်ႈၵေႃႈ ၵႂႃႇႁဵတ်းသုမ်ႉသွင်းယူႇႁိမ်းၶၢင်ႈတၢင်းၵႃး ၶိုၼ်ႈမိူင်းပၼ်ႇ။ ၵမ်ႈၽွင်ႈ ၵႂႃႇယူႇၼႂ်းသူၼ် ၼႂ်းႁႆႈ ၸွမ်းထဵင်ၸွမ်းသုမ်ႉပိူၼ်ႈဢေႃႈ။ ယၢမ်းလဵဝ် ဢၼ်ယၢပ်ႇၽိုတ်ႇတႄႉ ၶဝ်ႈၼမ်ႉတၢင်းၵိၼ်ဢေႃႈ။ ယွၼ်ႉဝႃႈ သဵၼ်ႈတၢင်း ဢၼ်တေၶိုၼ်ႈလွႆမိူင်းပၼ်ႇၼႆႉ ၼမ်ႉထူမ်ႈသေဢမ်ႇၸၢင်ႈၵႂႃႇမႃးႁႃၵၼ်”- ဝႃႈၼႆ။

သဵၼ်ႈတၢင်းၶိုၼ်ႈလွႆ ၵွၼ်ႇတေၶဝ်ႈဝၢၼ်ႈၼမ်ႉဢုၼ်ႇၼၼ်ႉ မၼ်းယၢၼ်း/ တႅမ်ႇလႄႈ ၼမ်ႉၼွင်းထူမ်ႈဝႆႉ။ ႁဵတ်းႁႂ်ႈ ၵူၼ်းၼႂ်းဝဵင်း ဢမ်ႇၸၢင်ႈမႃးၸူး/ ၸွႆႈၵူၼ်းဝၢၼ်ႈၼမ်ႉဢုၼ်ႇ။ ရူတ်ႉၵႃးတၢင်ႇၵူၼ်းတၢင်ႇၵုၼ်ႇ ဢၼ်လုၵ်ႉတၢင်းမိူင်းပၼ်ႇမႃးၵေႃႈ ဢမ်ႇၸၢင်ႈၶၢမ်ႈၵႂႃႇၸူးဝဵင်းလၢင်းၶိူဝ်း။

ၼၢင်းယိင်း ဢႃယု 30 ပၢႆ မႄႈလုၵ်ႈဢွၼ်ႇ ၵူၼ်းဝၢၼ်ႈၼမ်ႉဢုၼ်ႇ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈၼမ်ႉထူမ်ႈႁႅင်း ပွၵ်ႈ ၵမ်းပူၼ်ႉ ၸဝ်ႈရူတ်ႉၵႃးလူင်မႃးပႂ်ႉဝႆႉတီႈၼမ်ႉထူမ်ႈ။ သင်ဝႃႈ ရူတ်ႉၵႃးဢွၼ်ႇ ၶႂ်ႈလတ်းၵႂႃႇမႃးတီႈၼမ်ႉထူမ်ႈၼႆႉၸိုင် ၶဝ်ဢဝ်တၢင်ႇၵႃးလူင်သေ ၶၢမ်ႈပၼ်။ ၽွင်းၼမ်ႉထူမ်ႈႁႅင်းၼၼ်ႉ လႆႈၸၢႆႇၵႃႈၶၢမ်ႈၼမ်ႉ ၼိုင်ႈလမ်း 5 သႅၼ်ပျႃး။ ပွၵ်ႈ ၼႆႉတႄႉ ၼမ်ႉၵေႃႈဢမ်ႇသုင်တၢၼ်ႇၵမ်းပူၼ်ႉလႄႈ ငိၼ်းဝႃႈ ရူတ်ႉၵႃးဢွၼ်ႇၼိုင်ႈလမ်း လႆႈၸၢႆႇ 2 သႅၼ်ပျႃး ၵူၺ်းယဝ်ႉၶႃႈ”- ဝႃႈၼႆ။

တေႃႇထိုင်မိူဝ်ႈဝႃး 06/10/2024 ၼႆႉ ၵူၼ်းၼမ်ႉဢုၼ်ႇ 350 ၵေႃႉ၊ ၵူၼ်းဝၢၼ်ႈတႃႈ (ၾၢႆႇဢွၵ်ႇတဵင်း) မွၵ်ႈ 50 ၵေႃႉ ဢွၼ်ၵၼ်ပၢႆႈဢွၵ်ႇႁိူၼ်း ၵႂႃႇႁဵတ်းသုမ်ႉယူႇဝႆႉၶၢင်ႈတၢင်းလႄႈ ၼႂ်းသူၼ်။

ၵူၼ်းဝၢၼ်ႈပူးၵမ်ႇ ၼႂ်းၶူးသမ်ႉ ပၢႆႈလူင်းမႃးယူႇတီႈ ၵျွင်းမုၼ်ၸဝ်ႈ ၼႂ်းဝဵင်းမီးမွၵ်ႈ 30 ။ လိူဝ်ၼၼ်ႉတႄႉ ၵမ်ႈၽွင်ႈပၢႆႈယူႇသဝ်းၸွမ်းႁိူၼ်းပီႈၼွင်ႉလႄႈ ႁိူၼ်းၵူၼ်းႁူႉၸၵ်း တီႈဢၼ်လွတ်ႈၽေး။

ၸုမ်းပရႁိတ ၼႂ်းဝဵင်းလၢင်းၶိူဝ်းလႄႈ ၵူၼ်းမိူင်းၼင်ႇၵၼ် ဢဝ်ၶဝ်ႈၼမ်ႉတၢင်းၵိၼ် ၵႂႃႇၸွႆႈထႅမ်လဵင်ႉလူၵၼ်။ ပီႈၼွင်ႉဝၢၼ်ႈၼမ်ႉဢုၼ်ႇ ၸိူဝ်းမီးၾၢႆႇပုၼ်ႉၼမ်ႉထူမ်ႈၶင်တၢင်း လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း။

တီႈဝဵင်းလၢင်းၶိူဝ်းၼႆႉ ၾူၼ်ဢမ်ႇတူၵ်း လႅတ်ႇမႆႈဝႆႉ 2 ဝၼ်းယဝ်ႉၵေႃႈ ၼမ်ႉပႆႇလူတ်းယွမ်း။

ၼမ်ႉထူမ်ႈ ဝဵင်းလၢင်းၶိူဝ်းၵမ်းၼႆႉ ဝၢၼ်ႈ/ပွၵ်ႉ ႁိမ်းၾင်ႇၼမ်ႉ ၸိူဝ်းယူႇၼႂ်းဝဵင်းတႄႉ ၼမ်ႉထူမ်ႈႁိူၼ်းယူႇသေတႃႉ ဢမ်ႇထိုင်တီႈလႆႈပွႆႇႁိူၼ်းယေးသေပၢႆႈ မိူၼ်မိူဝ်ႈၵမ်းဢွၼ်တၢင်း။

ပီၼႆႉ ၾူၼ်လိူင်ႇၾူၼ်ၼမ်။ တီႈဝဵင်းလၢင်းၶိူဝ်းၼႆႉ ၼမ်ႉတဵင်းလူၼ်ႉၾင် 3 ၵမ်း ပႃးၼႆႉယဝ်ႉ။ မိူဝ်ႈဝၼ်းတီႈ 17 ဢေႃႊၵတ်ႊသ်ၼၼ်ႉ ၵမ်းၼိုင်ႈ၊ မိူဝ်ႈဝၼ်းတီႈ 9 သႅပ်ႊထႅမ်ႊပိူဝ်ႊၼၼ်ႉ ၵမ်းၼိုင်ႈလႄႈ ယၢမ်းလဵဝ် ဝၼ်းတီႈ 4 ဢွၵ်ႊထူဝ်ႊပိူဝ်ႊၼႆႉထႅင်ႈ ၵမ်းၼိုင်ႈ။

ၵူၼ်းမိူင်းလၢင်းၶိူဝ်းဝႃႈ ၵူႈပီပူၼ်ႉမႃး ၼမ်ႉတဵင်းၼွင်းၼိုင်ႈပီၼိုင်ႈပွၵ်ႈၵူၺ်း။ ပီၼႆႉတႄႉ ၼွင်းထူမ်ႈဝၢၼ်ႈဝဵင်း 3 ၵမ်းယဝ်ႉ။ ၼမ်ႉၼွင်းပွၵ်ႈၵမ်းၵၢင်ၼၼ်ႉ ၼွင်းႁၢႆႉႁႅင်းသုတ်းၼႂ်းပိုၼ်းဝဵင်းလၢင်းၶိူဝ်း။ ၽွင်းၼၼ်ႉ ၼႂ်းဝဵင်းလၢင်းၶိူဝ်းၼႆႉ ပွၵ်ႉဢၼ်ဢမ်ႇၺႃးၼမ်ႉထူမ်ႈ လိူဝ်ပွၵ်ႉဝၢၼ်ႈလွႆလႄႈ ဝၢၼ်ႈလူင်ပွၵ်ႉတူၵ်း – 2 ပွၵ်ႉၵူၺ်း။