ၼမ်ႉထူမ်ႈ ဝဵင်းၵဵင်းမႂ်ႇ ပွၵ်ႈၼႆႉ ႁၢႆႉႁႅင်း တႄႇဝၼ်းတီႈ 06/10/2024 တႄႉ​​ တေလူတ်းယွမ်းၵႂႃႇယဝ်ႉ ဝႃႈၼႆ။

ဝၼ်းတီႈ 05/10/2024 မိူဝ်ႈၼႆႉ ယၢမ်းဝၢႆးဝၼ်း 2 မူင်းၶိုင်ႈ ၼမ်ႉပိင်းလူၼ်ႉၾင်ႇ တၢင်းသုင်မီးထိုင် 5.23 မဵတ်ႉ။ပူၼ်ႉလိူဝ်ၶိတ်ႇမၢႆ ဢၼ်မီး​​ၽေး။

ၼမ်ႉၼွင်းၶဝ်ႈၼႂ်းဢိူင်ႇၼႂ်းဝၢၼ်ႈ တီႈၶူင်ႈတီႈယၢၼ်းလၢႆလၢႆၸႄႈဝဵင်းၼႂ်းတူဝ်မိူင်းၵဵင်းမႂ်ႇ ၸိုင်ႈထႆး – မိူၼ်ၼင်ႇ ထုင်ႉသီႇယႅၵ်ႈၼွင်ႁွႆ သႃရၽီး – ၵလူဝ်ႇပိူၼ်ႉႁၢဝ်ႉသ် – ၵၢတ်ႇၾရင်ႇႁၢင်လူင်း – ႁူင်းပလိၵ်ႈၽၢၵ်ႈ 5 – ၵဵင်းမႂ်ႇလႅၼ်း – ၼႂ်း ၵႄႈသီႇယႅၵ်ႈဢႄးၽွတ်ႇလႄႈ သီႇယႅၵ်ႈ ႁၢႆယႃး – ၵၢင်တူင်ႈ – ၸၢင်ႉၵၢၼ်း – ထုင်ႉပႃႇလႅတ်ႇ ၶိုၼ်ႈၵႂႃႇတၢင်းၵၢတ်ႇလူင် ၵၢတ်ႇမိူင်းမႂ်ႇ သီႇယႅၵ်ႈတီႈၼွၼ်းပီႊၼင်ႊ ၶိုၼ်ႈၵႂႃႇတၢင်း မႄႈရိမ်း – မႄႈတႅင် ၸိူဝ်းယူႇၸွမ်းသၢပ်ႇၼမ်ႉပိင်း ၸိူဝ်း ၼႆႉ။

လိူဝ်ၼၼ်ႉ တၢင်းႁၢင်လူင်း သၼ်ပႃႇတွင်း လွႆ​​လေႃႇ ၸိူဝ်းၼႆႉ​​ၵေႃႈ ၼမ်ႉမႄႈဝၢင်း မႄႈၶၢၼ် ၼွင်းထူမ်ႈႁႅင်း ဢၼ်လႆႈပိၵ်ႉသဵၼ်ႈတၢင်းဝႆႉထႅင်ႈ​​ ၵေႃႈမီး။

ၾၢႆႇမိူင်ၼမ်ႉၾၢႆၼမ်ႉတႄႉ လၢမ်းၶၢတ်ႈဝႆႉဝႃႈ ၼမ်ႉပိင်း​​တေၼွင်းထူမ်ႈႁႅင်း ၼႂ်းမိူင်းၵဵင်းမႂ်ႇ ​​တေႃႇထိုင်တဵင်ႈၶိုၼ်းၸၢႆႉ ၼႆႉ ဝၼ်းတီႈ 05/10/2024 ၼႆႉၵူၺ်းၼင်ႇၵဝ်ႇ။ မိူဝ်ႈၽုၵ်ႈ 06/10/2024 ၼႆႉတႄႉ တေယွမ်းလူင်းၵႂႃႇၶိုၼ်းလွႆးလွႆး ယူႇ ၼင်ႇၵဝ်ႇ ဝႃႈၼႆ။

ၵူၺ်းၵႃႈ ၸုၸုၸၢၼ်ႇ ၾၢႆႇလၢမ်းၶၢတ်ႈၾိင်ႈၾႃႉရႃႇသီႇတႄႉ လၢတ်ႈဝႆႉဝႃႈ လူမ်းလႅင်ႉလူင်​​ တေလုၵ်ႉတၢင်း ပၢင်ႇလၢႆႇပင်းၵလႃး ၶဝ်ႈမႃးထႅင်ႈ လုၵ်ႈၼိုင်ႈ။ ဢၼ်​​တေတုမ်ႉတိူဝ်ႉႁႅင်း ပဵၼ်တၢင်းမိူင်းရၶႅင်ႇလႄႈ မိူင်းၶျၢင်း၊ ၼႂ်းမိူင်းမၢၼ်ႈ ဝႃႈ ၼႆဝႆႉ။

ၼမ်ႉထူမ်ႈမိူင်းၵဵင်းမႂ်ႇ ပွၵ်ႈၼႆႉ ၼႂ်းဝဵင်းတႄႉ ၾူၼ်ဢမ်ႇတူၵ်း။ ၾူၼ်တူၵ်းတၢင်းႁူဝ်ၼမ်ႉပိင်းပုၼ်ႉ။ ၵူၼ်းပိုၼ်ႉတီႈလၢတ်ႈဝႃႈ ထူမ်ႈႁၢႆႉႁႅင်းပဵင်းၼႆႉ ပႆႇယၢမ်ႈမီးမႃး​​သေပွၵ်ႈ ၼႂ်းပိုၼ်း ဝႃႈၼႆ။ ပၢင်ၸၢင်ႉမႄႈတႅင် မႄႈဝၢင်း​​ၵေႃႈၼမ်ႉထူမ်ႈ ၸၢင်ႉလွင်ႈလႆၸွမ်းၼမ်ႉ​​သေ တၢႆ​​ၵေႃႈမီး။

ၾၢႆႇၾိင်ႈၾႃႉရႃႇသီႇတႄႉ ပိုၼ်ၽၢဝ်ႇဝႆႉဝႃႈ တႄႇဢဝ်မိူဝ်ႈၽုၵ်ႈၵႂႃႇ ဢမ်ႇမီးၾူၼ်တူၵ်းယဝ်ႉၼင်ႇၵဝ်ႇ။