ၸဝ်ႈၶွင်ႁၢၼ်ႉၶၢႆ ၶိူင်ႈၶူဝ်းၵၢၼ်ၽုၵ်ႇသွမ်ႈ တီႈဝဵင်းလၢႆးၶႃး ၺႃးၸူၼ်တီႈႁိူၼ်း သုမ်းၵႂႃႇၶမ်းတင်းငိုၼ်း ႁူမ်ႈၵၼ် ငိုၼ်းမၢၼ်ႈ မွၵ်ႈ 2,000 သႅၼ်ပျႃး။   

ဝၼ်းတီႈ 03/10/2024 ယၢမ်းဝၢႆးဝၼ်းမွၵ်ႈ 4 မူင်း ၸုမ်းဢမ်ႇႁူႉၾၢႆႇ 5 ၵေႃႉ ၶီႇၵႃးမႃးလမ်းၼိုင်ႈသေ ၶဝ်ႈၸူၼ် ႁိူၼ်းလုင်းမွင်ႇလႃႉလႄႈပႃႈၶႅၵ်ႇ ပွၵ်ႉ 3 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼၼ်ႉ ၶီႇၵႃးမႃးၸွမ်းၵၼ် 5  ၵေႃႉ ယိပ်းၵွင်ႈပွတ်းသေ ၶဝ်ႈၸူၼ်ႁိူၼ်းလုင်းမွင်ႇလႃႉ ပႃႈၶႅၵ်ႇ သုမ်းၵႂႃႇငိုၼ်း 1,300 သႅၼ်ပျႃး ယဝ်ႉၵေႃႈ ၶမ်း ႁူမ်ႈၵၼ်တင်းမူတ်း မွၵ်ႈ 2,000 သႅၼ်ပျႃးၼႆႉ။ ၵူၼ်းမႃးၸူၼ်ၼၼ်ႉ ပဵၼ်ၽူႈၸၢႆး သႅၼ်းဢႃယု 30 ပီ လူင်းတႂ်ႈ။ လိူဝ်ၼၼ်ႉ ယူၵ်ႉၵႂႃႇပႃး တိူၵ်ႈငိုၼ်းၶဝ်ၵႂႃႇလႄႈ iphone ထႅင်ႈ 2 လုၵ်ႈ”- ဝႃႈၼႆ။

လုင်းမွင်ႇလႃႉ ပႃႈၶႅၵ်ႇၼႆႉ ပိုတ်ႇဝႆႉ ႁၢၼ်ႉၶၢႆၶိူင်ႈၶူဝ်းၵၢၼ်ၽုၵ်ႇသွမ်ႈ မိူၼ်ၼင်ႇ – ၸိူဝ်ႉၽၼ်းၵူႈမဵဝ်း၊ ၾုၼ်ႇထၢတ်ႈ (မေႇဢေႃးၸႃႇ) ၸိူဝ်းၼႆႉ တီႈၼႂ်းၵၢတ်ႇလူင် ဝဵင်းလၢႆးၶႃႈ ၼႆယဝ်ႉ။

ပူၼ်ႉမႃး မိူဝ်ႈဝၼ်းတီႈ 03/01/2024 ယၢမ်းဝၢႆးဝၼ်း 2 မူင်းပၢႆ ႁၢၼ်ႉၶၢႆၶမ်း (သႅင်ႇၶမ်းလီ) ၼႂ်းၵၢတ်ႇလူင် ဝဵင်းလၢႆးၶႃႈ ၼၼ်ႉၵေႃႈ ၺႃးၸူၼ် သုမ်းၵႂႃႇသၢႆၶေႃးၶမ်း 1 သဵၼ်ႈ ၼမ်ႉၼၵ်း 3 ၵျၢပ်ႈ၊ မူင်းၶူၺ်း 4 ဢၼ် ၼိုင်ႈဢၼ်လႂ် မီးၼမ်ႉၼၵ်း 4 မူး ၼႆယဝ်ႉ။