ၶၢဝ်းတၢင်းသိုၵ်းမၢၼ်ႈ ယိုတ်းမိူင်းမႃး 3 ပီပၢႆၼႆႉ ၵူၼ်းမိူင်းပၢႆႈဢွၵ်ႇမိူင်းႁူမ်ႈတုမ်ၼမ် ၼႂ်းၼၼ်ႉ ပႃးၵူၼ်းၼုမ်ႇမိူင်းတႆး ပၢႆႈၶဝ်ႈမိူင်းထႆး – မိူင်းၶႄႇ ထႅင်ႈတင်းၼမ်။ ယွၼ်ႉပိူင် ၵဵပ်းသိုၵ်းမၢၼ်ႈၼႆႉသေတႃႇ ၵူၼ်းၼုမ်ႇ တေၸွႆႈထႅမ်ၶႅၵ်ႇလီပၢင်ၸႃႉ ပေႃးဢမ်ႇမီး။

တီႈဝဵင်းပၢင်လူင် ၸိုင်ႈတႆးပွတ်းၸၢၼ်းၼႆႉၵေႃႈ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း (PNO) ႁူမ်ႈၵၼ် လူင်းပိုၼ်ႉတီႈ ၵဵပ်းသိုၵ်းႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းၼုမ်ႇႁႃႁူးလွတ်ႈဢွၵ်ႇ ပၢႆႈၽႂ်မၼ်း ၼႆယဝ်ႉ။

ဢိင်ၼိူဝ် လွင်ႈသိုၵ်းမၢၼ်ႈ ဢွၵ်ႇပိူင်ၵဵပ်းသိုၵ်း မိူဝ်ႈဝၼ်းတီႈ 10/02/2024 ၼၼ်ႉမႃး ယူႇတီႈ ၸုမ်းလုၵ်ႉၽိုၼ်ႉလၢႆမူႇၸုမ်း ဢွၵ်ႇလိၵ်ႈသၢၼ်ၶတ်း သိုၵ်းမၢၼ်ႈ လူၺ်ႈၵူၼ်းမိူင်း ဢမ်ႇႁၼ်လီၸွမ်း ဝႃႈၼၼ်သေတႃႉ ဢမ်ႇၽွင်းလိူဝ်လႆႈ ၵၢၼ်ၽွင်းငမ်းသိုၵ်းမၢၼ်ႈလႄႈ မၢင်ဝဵင်းသမ်ႉ သိုၵ်းမၢၼ်ႈလူင်း ၵဵပ်းၵမ်းသိုဝ်ႈ၊ မၢင်ဝဵင်းသမ်ႉ ၸုမ်းပျီႇတူႉၸိတ်ႉ လူင်း ၵဵပ်းသေ ၾိုၵ်းၵၢၼ်သိုၵ်းပၼ် ၵမ်းသိုဝ်ႈ ဝႃႈၼႆ။

မူႇဝၢၼ်ႈ ၸိူဝ်းယူႇၸွမ်းသၢပ်ႇဝဵင်း ၾၢႆႇဢွၵ်ႇဝဵင်းပၢင်လူင် ၸိုင်ႈတႆးပွတ်းၸၢၼ်း ဢၼ်ယူႇၼႂ်းၸုမ်းပျီႇတူႉၸိတ်ႉပဢူဝ်းၵုမ်းၵမ်ဝႆႉ ၸိူဝ်းၼၼ်ႉ ၵူၼ်းမိူင်းၺႃးႁွင်ႉၵႂႃႇၾိုၵ်းၵၢၼ်သိုၵ်း ဢမ်ႇယွမ်း 3 ပွၵ်ႉယဝ်ႉ။

မူႇဝၢၼ်ႈ ဢၼ်ၺႃးႁွင်ႉၵႂႃႇ ၾိုၵ်းၵၢၼ်သိုၵ်း ဢမ်ႇယွမ်း 3 ပွၵ်ႈၼၼ်ႉ ပဵၼ်ၼႂ်းဢိူင်ႇလွႆဢွၵ်ႇ ၼႂ်းၼၼ်ႉ တႃႇ 2 မူႇဝၢၼ်ႈ (ဝၢၼ်ႈဢႅၼ်ႇလႄႈ ဝၢၼ်ႈလူင်) တႄႉ ပႆႇလႆႈၵႂႃႇၾိုၵ်းၵၢၼ်သိုၵ်း။ ၵွပ်ႈၼႆလႄႈ ၵူၼ်းၼုမ်ႇ ၵမ်ႈၼမ် ၼႂ်းဢိူင်ႇၼၼ်ႉ ဢမ်ႇႁတ်းယူႇႁိူၼ်း ႁႃလၢႆးတၢင်းဢွၵ်ႇႁိူၼ်းၼမ် ၼႆယဝ်ႉ။

ပေႃးထိုင်မႃး လိူၼ်ၼူဝ်ႊဝႅမ်ႊပိူဝ်ႊၼႆႉ ငိၼ်းဝႃႈ ၸုမ်းပျီႇတူႉၸိတ်ႉပဢူဝ်း ဢမ်ႇၼၼ် သိုၵ်းမၢၼ်ႈ တေလူင်းၵဵပ်းသိုၵ်းမႂ်ႇထႅင်ႈၼႆလႄႈ ၵူၼ်းၼုမ်ႇ ဢွၼ်ၵၼ်ၶွင်ႈၶမ်ၸႂ်ဝႆႉထႃႈ တေယူႇၵေႃႈၵူဝ်ဢမ်ႇလွတ်ႈ၊ တေပၢႆႈၵေႃႈ သမ်ႉယၢပ်ႇတီႈယူႇသဝ်းထႅင်ႈၼႆ ၵူၼ်းၼုမ်ႇၸၢႆး ဝဵင်းပၢင်လူင် ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“တေလႆႈပၢႆႈၵူၺ်းယဝ်ႉ။ လၢႆပႃႈလၢႆၾၢႆႇမိပ်ႇငႅၼ်းမႃးၼႃႇယဝ်ႉ။ လွင်ႈၵႂႃႇလွင်ႈမႃးၵေႃႈ ၵပ်ႉၵိၼ်း။ တေၵႂႃႇမႃးတၢင်းလႂ်ၵေႃႈ လႆႈၾၢင်ႉႁႅင်းၼႃႇ။ တၢင်းႁဝ်းယူႇၼႆႉ မီး 8 မူႇဝၢၼ်ႈ။ ဢၼ်ပႆႇလႆႈ ၵႂႃႇၶဝ်ႈၼႂ်း ၸုမ်းပျီႇတူႉၸိတ်ႉၼၼ်ႉ ၵိုတ်း 2 ဝၢၼ်ႈၵူၺ်းယဝ်ႉ။ ၵူၺ်းၵႃႈ ပေႃးၼႂ်းလိူၼ်ထူၼ်ႈ 11 ၼႆႉသမ်ႉ ပျီႇတူႉၸိတ်ႉတင်း သိုၵ်းမၢၼ်ႈၶဝ် တေၵဵပ်းသိုၵ်းၼႆလႄႈ။ ယွၼ်ႉၼၼ် ဝၢၼ်ႈဢၼ်ပႆႇလႆႈၵႂႃႇၼၼ်ႉ ၵူၼ်းၼုမ်ႇၸၢႆးႁဝ်း ႁႃတၢင်းပၢႆႈၽႂ်မၼ်းယဝ်ႉ”- ဝႃႈၼႆ။

ၼႂ်းဢိူင်ႇလွႆဢွၵ်ႇ ဝဵင်းပၢင်လူင်ၼႆႉ မီးဝႆႉ ဝၢၼ်ႈၵွင်းယၢဝ်း၊ ဝၢၼ်ႈႁူၺ်ႈၵဵင်၊ ဝၢၼ်ႈလွႆၸၢင်ႉ၊ ဝၢၼ်ႈၵိဝ်ႇယူမ်း၊ ဝၢၼ်ႈၼွင်လႅင်ႉ၊ ဝၢၼ်ႈဢႅၼ်ႇ၊ ဝၢၼ်ႈလူင်၊ ဝၢၼ်ႈၵွင်းသၢင်း ၸိူဝ်းၼႆႉ လႆႈၸၢင်ႈၵူၼ်းၵႂႃႇတႅၼ်း ဢမ်ႇယွမ်း 3 ပွၵ်ႈယဝ်ႉ။ မၢင်ဝၢၼ်ႈလႆႈႁူမ်ႈၵၼ်ၸၢင်ႈၵႂႃႇ ၼိုင်ႈၵေႃႉလႂ် 12 – 13 သႅၼ်ပျႃး။ ၼိုင်ႈပွၵ်ႈလႂ် လႆႈၸၢင်ႈၵႂႃႇ 2 ၵေႃႉ ၼႆယဝ်ႉ။

လွင်ႈၵူၼ်းၼုမ်ႇ ပၢႆႈဢွၵ်ႇမိူင်းၼမ် ၸိူင်ႉၼႆၼႆႉ ပေႃႈမႄႈလႄႈ ပီႈၼွင်ႉ ၼႂ်းၼႃႈႁိူၼ်းၽႂ်မၼ်းၵေႃႈ ဢွၼ်ၵၼ်ပဵၼ် ၸႂ်ဢမ်ႇလီၸွမ်း။ တေဝႃႈဢမ်ႇႁႂ်ႈပၢႆႈၼႆၵေႃႈ တၢင်းလိူၵ်ႈသမ်ႉ ဢမ်ႇမီး။ ယူႇၼႂ်းဝၢၼ်ႈ ၼႂ်းဢိူင်ႇသေ ႁဵတ်းၵၢၼ်သူၼ် ႁႆႈၼႃးၵေႃႈ ဢမ်ႇလႆႈငိုၼ်းတွင်းပဵင်းပေႃး ၼင်ႇမိူဝ်ႈငဝ်းလၢႆး ဝၢၼ်ႈမိူင်း ၼိမ်သဝ်းၼၼ်ႉ။ တႃႇလဵင်ႉလူတူၺ်းထိုင် ၼႂ်းၼႃႈႁိူၼ်းၵူၺ်းၵေႃႈ ဢမ်ႇတဵမ်ထူၼ်ႈ။ ဢၼ်ၵူၼ်းမိူင်း လႆႈၵူဝ်ႁႅင်းတႄႉ ယွၼ်ႉသိုၵ်းမၢၼ်ႈ တမ်းဝၢင်းမႃးပိူင် ဢၼ်ၼိုင်ႈယဝ်ႉ ဢၼ်ၼိုင်ႈၼၼ်ႉယဝ်ႉ ၵူၼ်း ၼုမ်ႇၸၢႆးဝဵင်းပၢင်လူင် သိုပ်ႇလၢတ်ႈၼႄၼင်ႇၼႆ –

“ၸူးၸႂ်တႄႉ ၵူၼ်းၼုမ်ႇႁဝ်း ဢမ်ႇၶႂ်ႈၽၢတ်ႇႁိူၼ်းၶႃႈ၊ ၽူႈယႂ်ႇၵူၼ်းလူင်တႆးႁဝ်း ဢၼ်မီးပၢႆးဝူၼ်ႉသုင် ဢမ်ႇၵႄႈၶႆ ပၼ်ႁႃၵၢၼ်မိူင်း ၵၢၼ်သိုၵ်း ၸိူဝ်းၼႆႉလႆႈ။ ၸင်ႇဝႃႈ ၵူၼ်းၼုမ်ႇၼႆႉ လႆႈပၢႆႈဢွၵ်ႇမိူင်းၼမ် ၼၼ်ႉၶႃႈယဝ်ႉ။ ၼႂ်းဝၢၼ်ႈ ႁဝ်းယူႇၼႆႉ ၵူၼ်းၼုမ်ႇ ၵိုတ်း 5-6 ၵေႃႉၵူၺ်းယဝ်ႉ။ သိုၵ်းတႆးႁဝ်းမီး 2 ၸုမ်း သေတႃႉၵေႃႈ ဢမ်ႇႁဵတ်းသင်ပၼ်လႆႈ ၵူၼ်းၼုမ်ႇႁဝ်း”- ဝႃႈၼႆ။

မိူၼ်ၼင်ႇ ၸႄႈဝဵင်းသီႇသႅင်ႇၵေႃႈ ၸုမ်းပျီႇတူႉၸိတ်ႉပဢူဝ်း PNO လူင်းၵဵပ်းသိုၵ်းထႅင်ႈ ၼႂ်းလိူၼ်ဢေႃႊၵတ်ႊသ် ၼၼ်ႉ ၵဵပ်းမႃး ပဵၼ်ပွၵ်ႈၵမ်း 3 ယဝ်ႉ။ သင်ဝႃႈ ဢမ်ႇပၼ်ၵူၼ်းလႆႈၸိုင် လႆႈသႂ်ႇငိုၼ်း ၵမ်ႉၸွႆႈပၼ် တႃႇၸႂ်ႉၸၢႆႇၼႂ်း ၵၢၼ်သိုၵ်း ၼိုင်ႈႁိူၼ်းလႂ် ဢမ်ႇယွမ်း 5 မိုၼ်ႇပျႃး ၵူၼ်းပိုၼ်ႉတီႈလၢတ်ႈ။

ပၵ်းပိူင် ဢၼ်ၵူၼ်းမိူင်း တေလႆႈၶဝ်ႈႁၢပ်ႇၵၢၼ်သိုၵ်းၼႆႉ ယၢမ်ႈမီးမႃး မိူဝ်ႈပီ 2010 ပၢၼ်ၸွမ်ၸိၵ်း သိုၵ်းမၢၼ်ႈ တၢၼ်းသူၺ်ႇၼၼ်ႉ ထိုင်မႃးပီ 2024 ၼႆႉ ၸွမ်ၸိၵ်းသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ ၸင်ႇၶိုင်ၽေႃႇၼမ်ႉၼႄတူဝ် ဢွၵ်ႇမႃးလႄႈ ႁဵတ်းႁႂ်ႈၵူၼ်းမိူင်း/ ၵူၼ်းၼုမ်ႇ ပၢႆႈဢွၵ်ႇမိူင်းယူႇၵူႈဝၼ်း။