ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လၢတ်ႈဝႃႈ တႄႇဢဝ်လိူၼ်ဢွၵ်ႊထူဝ်ႊပိူဝ်ႊ ပီ 2023 တေႃႇထိုင် လိူၼ်ဢေႃႊၵတ်ႊသ် 2024 ၼႆႉ လႆႈသူင်ႇမိူဝ်းၶိုၼ်း ႁႅင်းၵၢၼ်ၼွၵ်ႈမိူင်း 5 မိုၼ်ႇပၢႆယဝ်ႉ ၸိူဝ်းၶဝ်ႈမႃး ၼႂ်းမိူင်းမၢၼ်ႈ ဢမ်ႇၸႂ်ႈတၢင်း ၵၢၼ် ဝႃႈၼႆ။
ႁူဝ်ၼႃႈသိုၵ်းမၢၼ်ႈလၢတ်ႈၵႂႃႇ ၼႂ်းဝၼ်းၵေႃႇတင်ႈ ၸုမ်းပလိၵ်ႈမိူင်းမၢၼ်ႈ ၶွပ်ႈတဵမ် 60 ပီ ဢၼ်ၸတ်းႁဵတ်းတီႈၼေႇပျီႇတေႃႇ ၼႂ်းဝၼ်းတီႈ 01/10/2024 ပူၼ်ႉမႃးၼႆႉ။
ၵူၼ်းၼွၵ်ႈမိူင်း 5 မိုၼ်ႇပၢႆ ဢၼ်ၺႃးသူင်ႇမိူဝ်းၶိုၼ်းၼႆႉ လုၵ်ႉတီႈ 28 မိူင်းသေ ၶဝ်ႈမႃးၼႂ်းမိူင်းမၢၼ်ႈ၊ ၸိူဝ်းၶဝ် မႃးႁဵတ်းၵၢၼ်သင်ၼႆတႄႉ ဢမ်ႇလၢတ်ႈဝႆႉပႃး။ ၵူၺ်းၵႃႈ ၵမ်ၼမ်တႄႉ ႁဵတ်းၵၢၼ်လွၵ်ႇလႅၼ် ငိုၼ်း တၢင်းဢွၼ်ႊလၢႆႊ (Online) ဢမ်ႇၼၼ် ၵျႃးၽႅၼ်ႉ။ ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇၼႆႉ ယိင်ႈ ၶႅၼ်းၼမ်လိူင်ႇမႃး – ၼႆယဝ်ႉ။
မိူဝ်ႈဝၼ်းတီႈ 30/09/2024 ၼၼ်ႉ တီႉၺွပ်းလႆႈၵူၼ်းမိူင်းၶႄႇ ၸိူဝ်းၵဵဝ်ႇၶွင်ႈၵၢၼ်လွၵ်ႇလႅၼ်ငိုၼ်း တၢင်းဢွၼ်ႊလၢႆႊ 313 ၵေႃႉ တီႈဝဵင်းမူႇၸေႊ မိူင်းတႆးပွတ်းႁွင်ႇသေ သူင်ႇပွၵ်ႈၶိုၼ်း ၾင်ႇမိူင်းၶႄႇ။ ၼႂ်းၼၼ်ႉ ပႃးၵူၼ်းၽိတ်းပၵ်းပိူင်မၢႆမီႈ ဢၼ်မိူင်းၶႄႇပိုၼ်ၽၢဝ်ႇ တီႈၺွပ်းတူဝ်ဝႆႉ 45 ၵေႃႉ – သိုၵ်းမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။
တႃႇၵႅတ်ႇၶႄႁႄႉၵင်ႈ ၵၢၼ်ၽိတ်းပၵ်းပိူင်မၢႆမီႈ ၸွမ်းလႅၼ်လိၼ်ၼၼ်ႉ တေႁူမ်ႈၵၼ် တၢင်းမိူင်းႁိမ်းႁွမ်း 5 မိူင်းသေ ႁဵတ်းသၢင်ႈၵႂႃႇၼႆ – ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လၢတ်ႈၼင်ႇၼႆ။
ဢၢင်ႈဢိင် – RFA
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ