ဝၼ်းတီႈ 01/10/2024 ယၢမ်းႁူဝ်ၶမ်ႈ 5 မူင်း ၾူၼ်ၵိုင်ႉၵၢင်ႉတူၵ်းႁႅင်း ၼမ်ႉၼွင်းယိုင်ႈၶိုၼ်ႈမႃးထႅင်ႈလႄႈ ၵူၼ်းပိုၼ်ႉတီႈပဵၼ်ဢၼ်မႆႈၸႂ်သေ တေႃႉၶူဝ်းတေႃႉလဵင်းၶၢႆႉဝႆႉတီႈသုင် တီႈလွတ်ႈၽေးၼမ်ႉ။

ၼၢင်းယိင်း ဢႃယုမွၵ်ႈ 40 ပီ ၵူၼ်းမိူင်း ဝဵင်းၵၢတ်ႇလေႃႉ လၢတ်ႈၽူႈတွႆႇႁွၵ်ႈဝႃႈ – “ၵူၼ်းၸိူဝ်းယူႇတီႈပိုၼ်ႉ တီႈတႅမ်ႇ ဢၼ်ယၢမ်ႈၺႃးၼမ်ႉထူမ်ႈ မိူဝ်ႈလိူၼ်ပူၼ်ႉမႃးၼၼ်ႉ ဢွၼ်ၵၼ်တူၵ်းၸႂ်သေ ၼႅတ်ႈဢဝ်ၶူဝ်း လမ်ႇလွင်ႈငိူင်ႉပၢႆႈ။ ၼမ်ႉထူမ်ႈပီၼႆႉ ႁၢႆႉႁႅင်းၼႃႇ။ မိူဝ်ႈၵွၼ်ႇ ဢမ်ႇတွၼ်ႉယၢမ်ႈႁၼ်ယၢမ်ႈၺႃး ၸိူင်ႉၼႆ သေပွၵ်ႈလႄႈ ၽႂ်ဢမ်ႇတၼ်းလႆႈၾၢင်ႉ၊ ဢမ်ႇတၼ်းလႆႈဢဝ်ၶူဝ်းၶွင်သင် လူႉသုမ်းလူႉတၢႆတင်းၼမ်”- ဝႃႈၼႆ။ 

ၵၢင်လိူၼ်သႅပ်ႊထႅမ်ႊပိူဝ်ႊ ဝၼ်းတီႈ 10 တီႈဝဵင်းၵၢတ်ႇလေႃႉ ဝဵင်းဢၼ်မီးၼိူဝ်လွႆသုင် ၼႂ်းမိူင်းတႆး ပွတ်းၸၢၼ်း – ၾူၼ်တူၵ်းၼမ်ႉႁူၺ်ႈၼမ်ႉလွႆၼွင်း ၼမ်ႉထူမ်ႈႁၢဝ်ႈႁႅင်း လိၼ်ၵူၼ်ႇလႄႈ ၵူၼ်းပိုၼ်ႉတီႈ လူႉ တၢႆ 13 ၵေႃႉ၊ ႁိူၼ်းယေးလူႉၵွႆ 155 လင်၊ လႅင်းၾူင်းၵေႃႈ ၶၢတ်ႇၵႂႃႇသေ တေႃႈလဵဝ် တိုၵ်ႉၽဵဝ်ႈၶီႈၵူမ်ႇမၼ်းယူႇ ၼမ်ႉႁွင်ႈၵိုင်ႉၵၢင်ႉၶိုၼ်ႈလႄႈ ၵူၼ်းပိုၼ်ႉတီႈ ပဵၼ်ဢၼ်မႆႈၸႂ်ဝႆႉ ဝႃႈၼႆ။

ဢၼ်ထူပ်းၽေးၼမ်ႉထူမ်ႈ ႁၢဝ်ႈႁႅင်း တီႈဝဵင်းၵၢတ်ႇလေႃႇၼႆႉ ပဵၼ်ပွၵ်ႉ 2/3/4 သေ တီႈပွၵ်ႉ 1 ၼၼ်ႉ လိၼ်ၵူၼ်ႇတဵင် ႁိူၼ်းယေး မီး 6 လင် ဝႃႈၼႆ။

ၼၢင်းယိင်း ၵူၼ်းမိူင်းၵၢတ်ႇလေႃႉ ဢၼ်ၺႃးလိၼ်ၵူၼ်ႇတဵင်ႁိူၼ်းၼၼ်ႉ လၢတ်ႈဝႃႈ -“ၽွင်းၼမ်ႉၼွင်းၼၼ်ႉ လိၼ် ၵူၼ်ႇတဵင်ႁိူၼ်းႁဝ်းယဝ်ႉလႄႈ ၵမ်းၼႆႉၵေႃႈ ပေႃးငိၼ်းသဵင်လူမ်း သဵင်ၾူၼ် သမ်ႉပေႃးၵူဝ် ဝႆႉယူႇယဝ်ႉ။ ပေႃးၾူၼ်တူၵ်းႁႅင်းမႃးၸိူင်ႉၼႆ ဢမ်ႇႁတ်းယူႇယဝ်ႉ၊ ၵူၼ်းၸိူဝ်းယူႇႁိမ်းၾင်ႇႁွင်ႈ ယူႇၼႂ်းပိုၼ်ႉတီႈတႅမ်ႇ ၸိူဝ်းၼၼ်ႉ ဢွၼ် ၵၼ်ပၢႆႈၵႂႃႇယူႇဝႆႉတီႈသုင်”- ဝႃႈၼႆ။

ၸုၸုၸၢၼ်ႇ ၽူႈလူင်ႉလႅၼ်ႇ ၾၢႆႇၾိင်ႈၾႃႉရႃႇသီႇတႄႉ တႅမ်ႈတၢင်ႇပိုၼ်ၽၢဝ်ႇဝႆႉဝႃႈ – ၼႂ်းဝူင်ႈဝၢင်ႈၼႆႉ ၾူၼ်လူမ်း တေတူၵ်းႁႅင်းတႄႉ ပဵၼ်ၼႂ်းၸႄႈမိူင်းရၶႅင်ႇလႄႈ မိူင်းၶျၢင်း၊ တိူင်းၸႄႈၵႅင်း ဢိၵ်ႇလႅၼ်လိၼ် မိူင်းၶၢင်၊ မိူင်းတႆး ဝႃႈၼႆဝႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)