ၼႂ်းဝၼ်းတီႈ 30/09/2024 လႄႈ 01/10/2024 ၾူၼ်တူၵ်းႁႃႇယႂ်ႇ ၼမ်ႉႁူၺ်ႈၼမ်ႉလွႆၼွင်း ႁဵတ်းႁႂ်ႈၼမ်ႉလၢဝ်းၼွင်း ထွင်းပတ်ႉသႂ်ႇၶူဝ် သႃးတေႃး ဢၼ်ၵေႃႇၵၢႆႇ ၼိူဝ်သဵၼ်ႈတၢင်းၵႃး တူင်ႇလၢဝ်းလႄႈ မိူင်းၵိုင် ၸိုင်ႈတႆးပွတ်းႁွင်ႇ – ၸိုင်ႈတႆးပွတ်းၸၢၼ်းၼၼ်ႉ လူႉၵွႆပုတ်းၶၢတ်ႇ ဢမ်ႇၸၢင်ႈၵႂႃႇမႃး။

လုင်းၸၢႆး ယူႇမိူင်းၵိုင် ဢႃယုသႅၼ်းပၢၼ်မွၵ်ႈ 40 ပီ လၢတ်ႈၽူႈတွႆႇႁွၵ်ႈဝႃႈ -“ မိူဝ်ႈပွၵ်ႈဢွၼ်တၢင်းၵေႃႈ ၼမ်ႉၼွင်းလႄႈ ၶူဝ်/ သဵၼ်ႈတၢင်းၵွႆ မီးႁွႆးငၢၵ်ႈ ဝႆႉယူႇယဝ်ႉ။ မိူဝ်ႈဝႃးသမ်ႉ ၼမ်ႉၼွင်းႁႅင်းထႅင်ႈလႄႈ သဵၼ်ႈတၢင်းယၢတ်ႇ ၶူဝ် ၵေႃႈၵွႆ။ ဢမ်ႇၸၢင်ႈၵႂႃႇမႃး တူင်ႈၼႃး ႁိမ်းႁွမ်းၵေႃႈ လူႉပႃးၽွင်ႈ”- ဝႃႈၼႆ။

ဢိင်ၼိူဝ် ၶူဝ်သႃးတေႃး ႁၵ်းၵွႆၵႂႃႇၸိူင်ႉၼႆၼႆႉသေ  ႁဵတ်းႁႂ်ႈသဵၼ်ႈတၢင်းဢၼ်ၵပ်းသိုပ်ႇ ၸိုင်ႈတႆးပွတ်းၸၢၼ်း – ပွတ်းႁွင်ႇ ၵိုတ်းၶၢတ်ႇၵႂႃႇ။ ၵူၼ်းမိူင်းတႆးပွတ်းႁွင်ႇၵေႃႈ ဢမ်ႇၸၢင်ႈပၢႆႈၽေးသိုၵ်းမႃးမိူင်းတႆး ပွတ်းၸၢၼ်း။ ၵၢၼ်တေႃႉသူင်ႇၶူဝ်းၶွင်ၵေႃႈ ၵိုတ်းၶၢတ်ႇလႄႈ ၵူၼ်းပိုၼ်ႉတီႈၵေႃႈ ယၢပ်ႇၸႂ်။ 

မၼ်းၸၢႆး လၢတ်ႈထႅင်ႈဝႃႈ -“သင်ၸိူဝ်ႉဝႃႈ သဵင်ၵွင်ႈတႅၵ်ႇတၢင်းသီႇပေႃႉ၊ မိူင်းၶိူဝ်း၊ ႁူဝ်ယ၊ ၼမ်ႉလၼ်ႈ ၸိူဝ်းၼႆႉမႃးၸိုင် ၵူၼ်းမိူင်းတႆးပွတ်းႁွင်ႇ တေပၢႆႈၽေးသိုၵ်းမႃးတၢင်းပွတ်းၸၢၼ်းၼႆႉ တေယၢပ်ႇၸႂ်။ ၵႂႃႇ တၢင်ႇတၢင်းသမ်ႉၵႆ။ သမ်ႉလီမႆႈၸႂ် လွင်ႈလွတ်ႈၽေး”- ဝႃႈၼႆ။

ပေႃးၵူၼ်းမိူင်းၵိုင် တေမိူဝ်းၼမ်ႉလၼ်ႈၵေႃႈ ၸႂ်ႉသဵၼ်ႈတၢင်းတူင်ႇလၢဝ်းၼႆႉ ၵမ်ႈၼမ်။ ယွၼ်ႉပိူဝ်ႈဝႃႈ သဵၼ်ႈတၢင်း ဢၼ်လုၵ်ႉမိူင်းၵိုင် ၵႂႃႇတၢင်းၵေးသီးယဝ်ႉ ၸင်ႇၶိုၼ်ႈ မိူင်းယႆ – ဝၢၼ်ႈၸၢင်ႉ- သွင်ၵႄးယဝ်ႉ ၸင်ႇမႃး ၼမ်ႉလၼ်ႈၸိုင် ၶၢဝ်းတၢင်းယၢဝ်းၵႆ။ ပိူင်လူင်သမ်ႉ ပဵၼ်တၢင်းၸုမ်းယိပ်းၵွင်ႈၵၢင်ႇၼမ်သေ ပၢင်တိုၵ်းၸၢင်ႈပဵၼ်လႆႈၵူႈၶၢဝ်း။ ဢမ်ႇမီးလွင်ႈႁူမ်ႇလူမ်ႈ။

ၶူဝ်သႃးတေႃး ဢၼ်ႁၵ်းၵႂႃႇၼႆႉ ယၢမ်းလဵဝ် လႆႈဢဝ်မႆႉၵၢႆႇဝႆႉသေၸႂ်ႉဝႆႉ ၸူဝ်ႈၶၢဝ်း။ ၵူၼ်းတႄႉ တႆႇၵႂႃႇမႃး လႆႈယူႇသေတႃႉ ရူတ်ႉၶိူင်ႈလႄႈ ၵႃးတႄႉ ပႆႇၸၢင်ႈၵႂႃႇမႃး။     

ပီၼႆႉ လူမ်းလႅင်ႉယႃႊၵီႊ လုၵ်ႈယႂ်ႇၽတ်ႉပဝ်ႇလႄႈ တုမ်ႉတိူဝ်ႉထိုင် မိူင်းတႆး၊ မိူင်းမၢၼ်ႈ။ တိူင်းၼေႇပျီႇတေႃႇ၊ ပႃႇၵိူဝ်၊ မၵူၺ်း၊ မိူင်းယၢင်းၽိူၵ်ႇ၊ ယၢင်းလႅင်၊ မွၼ်း၊ မိူင်းတႆးပွတ်းဢွၵ်ႇ၊ မိူင်းတႆးပွတ်းၸၢၼ်း ၸိူဝ်း ၼႆႉ ထူပ်းၽေးၼမ်ႉထူမ်ႈ 59 ၸႄႈဝဵင်း၊ ၵူၼ်းမိူင်းထူပ်းၽေးၼမ်ႉ 631,000 ၵေႃႉ၊ ၵူၼ်းတၢႆယွၼ်ႉၼမ်ႉထူမ်ႈ မီးပၢၵ်ႇပၢႆၼႆ UNOCHA  ပိုၼ် ၽၢဝ်ႇ မိူဝ်ႈလိူၼ်သႅပ်ႊထႅမ်ႊပိူဝ်ႊၼၼ်ႉၼင်ၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)