ၵူၼ်းမိူင်း ထုင်ႉၸၢမ်ၵႃး ၸႄႈဝဵင်းယွင်ႁူၺ်ႈ ႁူပ်ႉၽေးၼမ်ႉထူမ်ႈၼမ်ႁႅင်း မၢင်တီႈ ယွၼ်ႉၸဝ်ႈတႃႇၼ ဢမ်ႇထိုင်လႄႈ လႆႈၵိၼ်ၶဝ်ႈၼိုင်ႈဝၼ်းၼိုင်ႈတႃႇၵူၺ်း ဝႃႈၼႆ။

ၼႂ်းႁူဝ်လိူၼ်သႅပ်ႊထႅမ်ႊပိူဝ်ႊၼႆႉ ၾူၼ်တူၵ်းထပ်းၵၼ်လၢႆလၢႆဝၼ်းသေ ႁဵတ်းႁႂ်ႈၼမ်ႉၼွင်းထူမ်ႈ မိူင်းတႆးပွတ်း ၸၢၼ်းတင်း ပွတ်းဢွၵ်ႇ လၢႆတီႈ မိူၼ်ၼင်ႇၼႂ်းၸႄႈဝဵင်းယွင်ႁူၺ်ႈ ထုင်ႉၼွင်ႁၢႆးယႃႈ ထုင်ႉၸၢမ်ၵႃး ၸိူဝ်းၼႆႉၵေႃႈ ၼမ်ႉထူမ်ႈႁၢဝ်ႈႁႅင်း။

ၵူၼ်းထူပ်းၽေးၼမ်ႉ ၼႂ်းထုင်ႉၸၢမ်ၵႃး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းဝၢၼ်ႈၵျွၵ်ႉတၢၼ်း၊ သႃႇယႃႇၵုင်းၸၢၼ်း/ ႁွင်ႇ၊ ဝဵင်းၵဝ်ႇ ဢိၵ်ႇထႅင်ႈ လၢႆလၢႆတီႈ ၸဝ်ႈတႃႇၼ ဢမ်ႇထိုင်လႄႈ ၵူၼ်းပိုၼ်ႉတီႈ ယၢပ်ႇၽိုတ်ႇၵိၼ်းၸႂ်ႁႅင်းဢေႃႈ။ ပေႃးပဵၼ်ႁိူၼ်းၸၼ်ႉလဵဝ်တႄႉ ၼမ်ႉထူမ်ႈမူတ်းၶႃႈ ပေႃးပဵၼ်သွင် ၸၼ်ႉတႄႉ တေႃႉတႄႉၵိုတ်းပၢႆမၼ်း၊ ၸွမ်မၼ်း ၸိူင်ႉၼၼ်ၵူၺ်းယဝ်ႉ။ ယၢမ်းလဵဝ် ၵူၼ်းပိုၼ်ႉတီႈ ဢွၼ် ၵၼ်ပၢႆႈသွၼ်ႈယူႇသဝ်းဝႆႉ တီႈဝတ်ႉတီႈၵျွင်း ၸၼ်ႉတၢင်းၼိူဝ်ၶႃႈဢေႃႈ”- ဝႃႈၼႆ။

လိူဝ်ၼၼ်ႉ ၼမ်ႉၵိၼ်၊ ၼမ်ႉတႃႇတူမ်ႈႁုင်လႄႈ ၶွင်ၵိၼ်ယႅမ်ႉ ယႃႈယႃ ၸိူဝ်းၼႆႉၵေႃႈ ယၢပ်ႇၽိုတ်ႇႁႅင်းဝႆႉ – ၽူႈၸွႆႈထႅမ် ၵူၼ်းထူပ်းၽေးၼမ်ႉ ၵေႃႉၼိုင်ႈ လၢတ်ႈၼင်ႇၼႆ။

မိူၼ်ၼႆ ၼႂ်းဝဵင်းယွင်ႁူၺ်ႈၵေႃႈ ၼမ်ႉၼွင်းထူမ်ႈတင်းၼမ်၊ ၼမ်ႉႁူၺ်ႈၼမ်ႉလွႆ လၢႆလၢႆတီႈ လႆၶဝ်ႈၼႂ်းၼွင်ႁၢႆးယႃႈ၊ တႃႇၼမ်ႉၼွင်ႁၢႆးယႃႈ တေဢွၵ်ႇသမ်ႉ မီးဝႆႉၾၢႆမိူင်းပၢႆး တီႈလဵဝ်ၵူၺ်းလႄႈ ပေႃးပိုတ်ႇၾၢႆၵေႃႈ ၼမ်ႉတေၼွင်းထူမ်ႈႁႅင်း ၼႂ်းထုင်ႉမိူင်းယၢင်းလႅင် ဝႃႈၼႆ။

ၼႂ်းထုင်ႉၼွင်ႁၢႆးယႃႈၼႆႉ မီးဝႆႉ 35 ဢိူင်ႇ 445 ဝၢၼ်ႈ ၼႂ်းၼၼ်ႉ ဝၢၼ်ႈ 170 ပၢႆ ၺႃးၽေးၼမ်ႉ ၼွင်းထူမ်ႈဝႆႉ။