တီႈဝဵင်းၼွင်ၶဵဝ် ၊ သီပေႃႉ ၸိုင်ႈတႆးပွတ်းႁွင်ႇ ပၢင်တိုၵ်းတိုၵ်ႉသိုပ်ႇပဵၼ်ႁၢဝ်ႈႁႅင်း၊ သိုၵ်းမၢၼ်ႈၵႆႉဢဝ် ၶိူင်ႈမိၼ်ၵႂႃႇလၢမ်းလိမ်းပွႆမၢၵ်ႇသေဢမ်ႇၵႃး သိုၵ်းမၢၼ်ႈ ၸီႉသင်ႇပျီႇတူ့ၸိတ်ႉ တင်းၸိုင်ႈတႆးပွတ်းၸၢၼ်း ထႅမ်ႁႅင်းသိုၵ်း ၵႂႃႇတၢင်းပွတ်း ႁွင်ႇ ဝႃႈၼႆ။

ႁၢင်လိူၼ်သႅပ်ႊထႅမ်ႊပိူဝ်ႊၼႆႉမႃး သိုၵ်းမၢၼ်ႈလႄႈ ပျီႇတူႉၸိတ်ႉ ၼႂ်းၸိုင်ႈတႆးပွတ်းၸၢၼ်း ဢၼ်တူင်ႉၼိုင်တၢင်းဝဵင်း ၼမ်ႉၸၢင် – ႁူဝ်ပူင်း ထႅမ်ႁႅင်းၵႂႃႇ တၢင်းမိူင်းယႆ ၊ တၢင်ႉယၢၼ်း။

ၵူၼ်းႁူႉၸၵ်း ၸမ်ၸႂ်မိုတ်ႈၵိုဝ်း ၸုမ်းယိပ်းၵွင်ႈၵၢင်ႇ တီႈမိူင်းယႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈထႅမ်ႁႅင်းသိုၵ်းၶႂ်ႈဝႃႈၵူႈဝၼ်း၊ ၵႃးသိုၵ်းမွၵ်ႈ 20 လမ်း၊ ပႃးတင်းၵူၼ်းလႄႈ တင်းၶူဝ်း။ ရူတ်ႉၵႃး သိုၵ်းမၢၼ်ႈၵႂႃႇၵႂႃႇမႃးမႃး ၵူၼ်းမိူင်းပေႃးၶႂ်ႈလိုၼ်ႈပႅတ်ႈယဝ်ႉ ဢမ်ႇတူၵ်းၸႂ်ၵႃႈႁိုဝ်ယဝ်ႉ။ လႆႈငိၼ်းဝႃႈ တေလေႃႇတိုၵ်းၶိုၼ်း လႃႈသဵဝ်ႈၼႆ၊ တေလေႃႇတိုၵ်းတင်းၼႆႉ ဢွၼ်တင်းႁႃႉ ဢမ်ႇၼၼ် တေၵႂႃႇတၢင်းၼွင်ၶဵဝ် ဢွၼ်တင်းႁႃႉတႄႉ ပႆႇလၢမ်းလႆႈ”- ဝႃႈၼႆ။

တႄႇႁၢင်လိူၼ်သႅပ်ႊထႅမ်ႊပိူဝ်ႊၼႆႉမႃး သိုၵ်းမၢၼ်ႈ ထႅမ်ႁႅင်းသိုၵ်း ၶိုၼ်ႈၵႂႃႇတၢင်းလႃႈသဵဝ်ႈ၊ ထႅမ်တၢင်းလိၼ်လႄႈ တၢင်းၵၢင်ႁၢဝ်။  

ပျီႇတူႉၸိတ်ႉ တင်းၸိုင်ႈတႆးပွတ်းၸၢၼ်း ထႅမ်ႁႅင်းၵႂႃႇ တၢင်းၼွင်ၶဵဝ် ဢဵၼ်ႁႅင်းမီး 100 ပၢႆ ၵူၼ်းပိုၼ်ႉတီႈတႄႉ ယိုၼ်ယၼ်လၢတ်ႈၼင်ႇၼႆ။ ၵူၺ်းၵႃႈ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈတႄႉ ၶတ်းၸႂ်တိတ်းတေႃႇၵပ်းသိုပ်ႇတူၺ်း ယူႇသေတႃႉ တိတ်းတေႃႇဢမ်ႇလႆႈ။

ၵူၼ်းပိုၼ်ႉတီႈ ၸမ်ၸႂ်ၾၢႆႇသိုၵ်း လၢတ်ႈၽူႈတွႆႇႁွၵ်ႈဝႃႈ – “ ပေႃးၵႂႃႇထႅမ်ႁႅင်း ၼိုင်ႈပွၵ်ႈမီး 30 ပၢႆ။ မီးမွၵ်ႈ 3 ၵမ်းယဝ်ႉ၊ တင်းပုၼ်ႉတေမီးမွၵ်ႈ 100 ပၢႆၼႆႉ။ ၶဝ်တေၼုင်ႈၶူဝ်းၵူၼ်းႁိူၼ်းၵႂႃႇ။ ပေႃးသိုၵ်းမၢၼ်ႈ ၸီႉသင်ႇလူင်းမႃး ဢမ်ႇၵႂႃႇၵေႃႈ ဢမ်ႇလႆႈယဝ်ႉလူး၊ ပေႃးဢမ်ႇၵႂႃႇၵေႃႈ မိူၼ်တင်း လုၵ်ႉၽိုၼ်ႉသၢၼ်ၶတ်းၶဝ်ၵူၺ်း၊ ယွၼ်ႉဝႃႈ ၶဝ်ၵေႃႈမီးတႂ်ႈၸုမ်းသိုၵ်းမၢၼ်ႈၵူၺ်းၼႃႇ”- ဝႃႈၼႆ။

ပျီႇတူႉၸိတ်ႉတင်းပွတ်းၸၢၼ်းၼႆႉ ထႅမ်ႁႅင်းသိုၵ်း ၵႂႃႇတင်းပွတ်းႁွင်ႇ 3 ၵမ်းယဝ်ႉ။ ၵူၼ်းၸမ်ၸႂ်သိုၵ်းမၢၼ်ႈတႄႉ လၢတ်ႈတီႈၽူႈတွႆႇႁွၵ်ႈဝႃႈ – ဝၢႆးလင်မီးၶၢဝ်ႇဝႃႈ သိုၵ်းၵူၼ်းမိူင်းသႅင်ၵႅဝ်ႉ ၶဝ်ႈႁူမ်ႈၸူး SSPP တီႈငဝ်ႈငုၼ်းဝၢၼ်ႈႁႆးၶိုၼ်းယဝ်ႉၼႆၼၼ်ႉ သိုၵ်းမၢၼ်ႈလႅပ်ႈၶႂ်ႈသူင်ႇႁႅင်းသိုၵ်းၶိုၼ်ႈၵႂႃႇ တႅၼ်းတီႈယူႇ သိုၵ်းၵူၼ်းမိူင်းၸိူဝ်းၼၼ်ႉၶိုၼ်း – ဝႃႈၼႆ။ 

ၼႂ်းလိူၼ်သႅပ်ႊထႅမ်ႊပိူဝ်ႊ ဝၼ်းတီႈ 5 ၼႆႉ ပျီႇတူႉၸိတ်ႉ သႅင်ၵႅဝ်ႉတင်း ပျီတူႉၸိတ်ႉ မိူင်းၶိူဝ်း ၶဝ်ႈႁူမ်ႈ သိုၵ်း SSPP /SSA ဢဵၼ်ႁႅင်းၸမ် 1,000 ။  

ၽွင်းသိုၵ်းမၢၼ်ႈ ၵဵပ်းသိုၵ်းၵူၼ်းၼုမ်ႇႁၢပ်ႇၵၢၼ်သိုၵ်း၊ တႃႇပၢႆႈႁၢပ်ႇၵၢၼ်သိုၵ်းမၢၼ်ႈ ၵူၼ်းၼုမ်ႇတင်း ၸိုင်ႈတႆးပွတ်း ၸၢၼ်း ၶဝ်ႈၵႂႃႇၼႂ်းၸုမ်းပျီႇတူႉၸိတ်ႉ ၸိူဝ်းမီးၼႂ်းၸိုင်ႈတႆးပွတ်းၸၢၼ်း တင်းၼမ်။  

ယၢမ်းလဵဝ် ၼႂ်းဝဵင်းၼွင်ၶဵဝ်ၼႆႉ သိုၵ်းတဢၢင်း TNLA ပိုၼ်ၽၢဝ်ႇ ယိုတ်းၵုမ်းဝႆႉ၊ တီႈဝၢၼ်ႈတွင်ၶမ်း ယၢၼ်ၵႆဝဵင်းမွၵ်ႈ 20 လၵ်း တီႈမီးတပ်ႉၵွင်ႈယႂ်ႇ သိုၵ်းမၢၼ်ႈ ၼၼ်ႉၵေႃႈ သိုၵ်းမၢၼ်ႈလႄႈ သိုၵ်းလွႆ TNLA ႁူမ်ႈ PDF  တိုၵ်ႉသိုပ်ႇပိုတ်းယိုဝ်းၵၼ်ယူႇ ႁၢဝ်ႈႁႅင်း။

မိူၼ်ၼႆၼင်ႇၵဝ်ႇ တီႈဝဵင်းသီႇပေႃႉလႄႈ ဝဵင်းလႃႈသဵဝ်ႈ ၸိူဝ်းၼၼ်ႉၵေႃႈ ယၢမ်းၵၢင်ၶမ်ႈၵၢင်ၶိုၼ်း ၶိူင်ႈမိၼ်သိုၵ်းမၢၼ်ႈ တင်ႈၸႂ် ပွႆႇမၢၵ်ႇတူၵ်းတႅၵ်ႇသႂ်ႇႁိူၼ်းယေးၵူၼ်းမိူင်း လူႉၵွႆလၢႆလင် ႁဵတ်းႁႂ်ႈၵူၼ်းမိူင်း ဢမ်ႇႁတ်းယူႇသဝ်း ထၢင်ႇႁၢင်ႈလွတ်ႈလႅဝ်း။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)