ၼမ်ႉၼွင်းထူမ်ႈ လိၼ်ၵူၼ်ႇ သဵၼ်ႈတၢင်းၵႂႃႇမႃးၶၢတ်ႇလႄႈ ၵူၼ်းမိူင်းဝဵင်းယႂႃႇငၢၼ်ႇ ၸိူဝ်းယူႇၵႆဝဵင်း ၵမ်ႈၽွင်ႈ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ် ဢမ်ႇၸၢင်ႈတေႃႉသူင်ႇၵႃႉၶၢႆ ၸူးၵၼ်။

တႄႇဢဝ် ၼႂ်းၵၢင်လိူၼ်ဢေႃႊၵတ်ႊသ်ၼႆႉမႃး ၾူၼ်တူၵ်းဢမ်ႇထၢတ်ႇ ၼႂ်းမိူင်းတႆးပွတ်းၸၢၼ်း လႄႈၼႂ်းမိူင်းႁူမ်ႈတုမ် ပတ်းပိုၼ်ႉ၊ ၼႂ်းမိူင်းတႆး ပွတ်းၸၢၼ်း လိၼ်လွႆၵူၼ်ႇတဵင်တၢင်း၊ မၢင်ပိုၼ်ႉတီႈ ၼမ်ႉထူမ်ႈ ဝၢၼ်ႈသူၼ်ႁိူၼ်းယေးလႄႈ သဵၼ်ႈတၢင်းၶၢတ်ႇ ဢမ်ႇၸၢင်ႈၵႂႃႇမႃး ႁႃၵၼ်။

တီႈဝဵင်းယႂႃႇငၢၼ်ႇၵေႃႈ ၶဝ်ႈသၢၼ်ႁႃသိုဝ်ႉယၢပ်ႇ လႆႈမႃး 5-6 ဝၼ်းယဝ်ႉ၊ ႁၢၼ်ႉၶၢႆၶဝ်ႈသၢၼ် လႆႈပိၵ်ႉဢိုတ်းဝႆႉ ဢမ်ႇမီးတႃႇၶၢႆ။ 

ၼၢင်းယိင်း ၸဝ်ႈၶွင်ႁၢၼ်ႉၶၢႆၶဝ်ႈသၢၼ် လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ႈသၢၼ်ၶၢတ်ႇလႆႈ 4-5 ဝၼ်း ယဝ်ႉ။ တေႃႇမိူဝ်ႈၼႆႉၵေႃႈ ၶဝ်ႈသၢၼ်ပႆႇၽႅဝ်မႃးၶႃႈ။ သဵၼ်ႈတၢင်းဢၼ်လုၵ်ႉ ဝဵင်းၵၢတ်ႇလေႃႉ မႃးၵေႃႈ ထုၵ်ႇသင်ႇပိၵ်ႉဝႆႉလႄႈ ရူတ်ႉ ၵႃးဢမ်ႇၸၢင်ႈမႃး။ ၶဝ်ႈသၢၼ်ၼႆႉ လႆႈဢဝ်တၢင်း ဝဵင်းတႃႈၵုင်ႈ ၶိုၼ်ႈမႃး ၶိုၼ်းဢေႃႈ။ တေမႃးၽႅဝ်ႁဝ်း မိူဝ်ႈလႂ်ၵေႃႈ ဢမ်ႇႁူႉယဝ်ႉၶႃႈ။ မိူဝ်ႈလဵဝ်ၼႆႉ တႃႇၶၢႆၵေႃႈ ဢမ်ႇၵိုတ်း တႃႇ ၵိၼ်ၵေႃႈယၢပ်ႇယဝ်ႉၶႃႈ” – ဝႃႈၼႆ။

ယွၼ်ႉၶဝ်ႈသၢၼ် တႃႇၶၢႆၼႂ်းၵၢတ်ႇဢမ်ႇမီးယဝ်ႉလႄႈ ၵူၼ်းမိူင်းၸိူဝ်းမီးငိုၼ်း ၵမ်ႈၽွင်ႈ ဢႅဝ်ႇႁႃသိုဝ်ႉ ၶဝ်ႈမႃးၵဵပ်းႁွမ်ဝႆႉ။ ႁဵတ်းႁႂ်ႈၵူၼ်းႁဵတ်းၵိၼ်ၵၢၼ် ဝၼ်းလႂ်ဝၼ်းၼၼ်ႉ ထူပ်းတၢင်းယၢပ်ႇတႃႇသိုဝ်ႉၶဝ်ႈၵိၼ်။

ၵဵဝ်ႇလူၺ်ႈ လွင်ႈၼႆႉ ၼၢင်းယိင်းၵူၼ်းႁဵတ်းၵၢၼ်ႁႃၵိၼ် ဝၼ်းလႂ်ဝၼ်းၼၼ်ႉ လၢတ်ႈဝႃႈ – “ၵူၼ်းဢၼ်မီးငိုၼ်းၶဝ်ႈတႄႉၵေႃႈ သိုဝ်ႉၶဝ်ႈႁွမ်ဝႆႉၶႃႈဢေႃႈ။ ၶႃႈၶဝ်တႄႉ ယွၼ်ႉႁဵတ်း ၵိၼ်ၵၢၼ် ဝၼ်းလႂ် ဝၼ်းၼၼ်ႉၵူၺ်းလႄႈ ဢမ်ႇႁူႉဝႃႈတေႁဵတ်းႁိုဝ်သိုဝ်ႉႁွမ်ၶဝ်ႈ ဝႆႉၶႃႈ။ မိူဝ်ႈလဵဝ်ၵေႃႈ ဢမ်ႇမီးၵၢၼ် ၶဝ်ႈသၢၼ်တႃႇၵိၼ်ၵေႃႈ ဢမ်ႇမီး။ လႆႈထူပ်းၽေးဢိုပ်းဝႆႉ ၶႃႈဢေႃႈ” – ဝႃႈၼႆ။

 မၼ်းၼၢင်း သိုပ်ႇလၢတ်ႈထႅင်ႈဝႃႈ တီႈႁိူၼ်းၶဝ် ၶဝ်ႈတႃႇၵိၼ်ၵိုတ်းမွၵ်ႈ 5 ပေႇၵူၺ်းယဝ်ႉလႄႈ လႆႈ ဢဝ်ၶဝ်ႈၵၢပ်ႇ မႃး ႁုင်လေႃးသေၵိၼ် ဝႃႈၼႆ။

“မိူဝ်ႈလဵဝ်ၼႆႉ တီႈႁိူၼ်းၵေႃႈ မီးၶဝ်ႈ 5 ပေႇၵူၺ်းယဝ်ႉ။ တေႃႈလဵဝ်ၼႆႉ ပေႃးမီးငိုၼ်း ၼႅတ်ႈၵႂႃႇသိုဝ်ႉမႃး ၵမ်းပေႇ ၵမ်းၶၵ်ႉ ၵူၺ်းဢေႃႈ။ ပေႃးဢမ်ႇမီးငိုၼ်းၵေႃႈ ဢိုပ်းၶႃႈယဝ်ႉ။ ယၢမ်းလဵဝ်ၵေႃႈ ၶဝ်ႈသၢၼ် ဢၼ်ၵိုတ်းဝႆႉၼၼ်ႉ လႆႈဢဝ်ၶဝ်ႈၵၢပ်ႇမႃးႁုင်လေႃးသေၵိၼ်၊ ႁႂ်ႈမၼ်းၶၢမ်ႇႁိုင်ဢိတ်းၼိုင်ႈၶႃႈ”- မၼ်းၼၢင်း သိုပ်ႇလၢတ်ႈထႅင်ႈၼင်ႇၼႆ။

ၵူၼ်းမိူင်း ၼႂ်းၸႄႈဝဵင်းယႂႃႇငၢၼ်ႇၼႆႉ ၵမ်ႈၼမ် ၽုၵ်ႇမၢၵ်ႇၸွၵ်းလႄႈ မၢၵ်ႇမူင်ႈ။ ပေႃးမၢၵ်ႇမႆႉဢွၵ်ႇ ၼိုင်ႈၸုပ်ႈ ဢဝ် ၵႂႃႇၶၢႆ လႆႈငိုၼ်းမႃးသိုဝ်ႉၸၢႆႇၵိၼ်တင်းပီ။ ၵူၼ်းမိူင်း ၸိူဝ်းဢမ်ႇမီးသူၼ် မၢၵ်ႇၸွၵ်း လႆႈႁဵတ်းၵၢၼ် ၵိၼ်ၸၢင်ႈႁႃငိုၼ်းဝၼ်းလႂ်ဝၼ်းၼၼ်ႉ ဢမ်ႇၸၢင်ႈသိုဝ်ႉၶဝ်ႈဝႆႉၵိၼ်။ 

ယွၼ်ႉၼမ်ႉထူမ်ႈ ႁၢဝ်ႈႁႅင်းလႄႈ သူၼ်ႁႆႈၼႃး တူၼ်ႈၶဝ်ႈၵူၼ်းမိူင်းၵေႃႈ လူႉသုမ်းမူတ်း၊ ၸဝ်ႈၼႃးမႆႈ ၸႂ်ၶဝ်ႈတႃႇၵိၼ် ၼႂ်းပီတေမႃး။ တေလႆႈသိုဝ်ႉၵိၼ်ၵႃႈယႂ်ႇၵႃႈပႅင်း။ 

“ပီၼႆႉ ၶဝ်ႈၼႃးႁဝ်း လႆႈ 3 ပုၼ်ႈ 1 ပုၼ်ႈ ၵူၺ်းၶႃႈ။ မိူဝ်ႈပီၵၢႆတႄႉ ၶဝ်ႈလႆႈၼမ်လႄႈ လႆႈၵဵပ်းဝႆႉ တႃႇၵိၼ်ၼမ်ဢိတ်း ၼိုင်ႈဢေႃႈ။ ပီၼႆႉတႄႉ လႅပ်ႈဢမ်ႇပေႃးၵိၼ် တႃႇတင်းပီယဝ်ႉ” – ၵူၼ်းၵႃႉၶဝ်ႈသၢၼ် လၢတ်ႈၼင်ႇၼႆ။

ယၢမ်းလဵဝ် ၼႂ်းၸႄႈဝဵင်းယႂႃႇငၢၼ်ႇ ၶဝ်ႈသၢၼ်ၼိုင်ႈထူင် လႆႈသိုဝ်ႉ 1 သႅၼ်ပျႃးပၢႆ ၶူဝ်းၵုၼ်ႇၶွင်ၵိၼ် တၢင်ႇၸိူဝ်ႉတၢင်ႇပိူင်ၵေႃႈ ၵႃႈၶၼ်ပုင်ႈၶိုၼ်ႈ ယူႇတိၵ်းတိၵ်း။

မိူၼ်ၼင်ႇ ထုင်ႉပူင်း၊ ဝဵင်းမိူင်းၼၢႆး၊ ဝဵင်းမိူင်းပၼ်ႇ မိူင်းတႆးပွတ်းၸၢၼ်း ဢၼ်ၽုၵ်ႇသွမ်ႈ ၶဝ်ႈၼမ်သုတ်း ၼၼ်ႉၵေႃႈ ပီၼႆႉ ၺႃးၼမ်ႉထူမ်ႈ တူင်ႈၼႃးမိူၼ်ၵၼ်လႄႈ သုမ်းၼပ်ႉႁူဝ်ႁဵင်ႁူဝ်မိုၼ်ႇ ဢေႊၶိူဝ်ႊ။ ၶဝ်ႈသၢၼ် တႃႇတေၶၢႆၵေႃႈ တေမီးဢႄႇ ဢမ်ႇႁၢင်ႉ ဝႃႈၼႆ။