ၼႂ်းဝူင်ႈထီႉ 2 လိူၼ်သႅပ်ႊထႅမ်ႊပိူဝ်ႊၼႆႉ ၾူၼ်တူၵ်းႁႅင်းထပ်းၵၼ်လၢႆဝၼ်း ၼႂ်းၸိုင်ႈတႆး ပွတ်းၸၢၼ်း ၼမ်ႉထူမ်ႈဢမ်ႇယွမ်း 20 ၸႄႈဝဵင်း တီႈဝဵင်းမိူင်းပွၼ်ၼၼ်ႉ လိၼ်လွႆၵူၼ်ႇတဵင် သဵၼ်ႈတၢင်း ၵႃးၵူၼ်ႇတဵင်ဝၢၼ်ႈ ၵူၼ်းတၢႆ 10 ပၢႆ ဝႃႈၼႆ။

ဝၼ်းတီႈ 11/09/2024  ၼႆႉ လိၼ်လွႆၵူၼ်ႇ တီႈဝၢၼ်ႈၶွၵ်းၼွႆႉ ဝဵင်းမိူင်းပွၼ် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ၵူၼ်းဝၢၼ်ႈမၢတ်ႇၸဵပ်း လူႉတၢႆ 10 ပၢႆ ဝႃႈၼႆ။

ၵဵဝ်ႇလူၺ်ႈ လွင်ႈၼႆႉ ၽူႈၸၢႆး သႅၼ်းပၢၼ်ၶၢဝ်ႉ ၵူၼ်းမိူင်းပွၼ် လၢတ်ႈတီႈၽူႈတွႆႇႁွၵ်ႈဝႃႈ – “ၾူၼ်ၼႆႉ တႄႇတူၵ်းႁႅင်း မိူဝ်ႈဝၼ်းတီႈ 10 ၶႃႈဢေႃႈ။ မိူဝ်ႈဝႃးၼႆႉ ၼႂ်းဝၢၼ်ႈၶွၵ်းၼွႆႉၵေႃႈ လိၼ် ၵူၼ်ႇတဵင်ၵူၼ်း တၢႆ 10 ပၢႆ။ ၸၢႆးလၢႆၵေႃႉ ယိင်းလၢႆၵေႃႉတႄႉ ပႆႇလႆႈႁူႉသဵၼ်ႈမၢႆတႅတ်ႈတေႃးၶႃႈ။ ဝၢၼ်ႈၶွၵ်းၼွႆႉၼႆႉ မီးၼႂ်းၵႄႈမိူင်းပွၼ်လႄႈ လွႆလႅမ် ၶႃႈဢေႃႈ။ ၸွမ်းတၢင်းၵေႃႈ လိၼ်လွႆၵူၼ်ႇလႄႈ ဢမ်ႇၸၢင်ႈၵႂႃႇတူၺ်း ၶႃႈ။ လႅင်းၾူၼ်းၵေႃႈႁၢႆ ၵပ်းသိုပ်ႇၵၼ် ယၢပ်ႇဝႆႉၶႃႈဢေႃႈ” – ဝႃႈၼႆ။

လိူဝ်ၼၼ်ႉ ၼႂ်းဝၼ်းတီႈ 11 ယၢမ်းၵၢင်ၼႂ် ၵူၺ်းၼင်ႇၵဝ်ႇ ယွၼ်ႉၼမ်ႉႁူၺ်ႈၼမ်ႉလွႆၵိုင်ႉၵၢင်ႉ လေႃႈလူင်းမႃးလႄႈ ႁဵတ်းႁႂ်ႈၵူၼ်းမိူင်း ၼႂ်းဝဵင်းမိူင်းပွၼ်လႄႈ ၸဝ်ႈၵႃး ၵေႃႉၼိုင်ႈ လႆလွင်ႈၵႂႃႇၸွမ်းၼမ်ႉ လူႉတၢႆ ဝႃႈၼႆ။

“မိူဝ်ႈဝႃးၼႆႉ တီႈဝၢၼ်ႈၶဵဝ်ၶမ်း ၸဝ်ႈၵႃးလူင် ၵေႃႉၼိုင်ႈ ဢႃယု 40 ပၢႆ တိုၵ်ႉၼွၼ်းလပ်းယူႇသေ ၼမ်ႉႁူၺ်ႈၼမ်ႉလွႆ ၼႆႉ လႆလေႃႈလူင်းမႃး ပႃးဢဝ်မၼ်းၸၢႆးၵႂႃႇၸွမ်းၶႃႈဢေႃႈ။ ယဝ်ႉၵေႃႈ မိူဝ်ႈယၢမ်း 2 မူင်း ၵၢင်ၼႂ် မိူဝ်ႈဝႃးၼႆႉ ၵူၼ်းလဵင်ႉၵႆႇ တိုၵ်ႉၼွၼ်းလပ်းယူႇသေ ၼမ်ႉႁူၺ်ႈလေႃႈမႃး ဢဝ်မၼ်းၸၢႆးၵႂႃႇ တေႃႇမိူဝ်ႈလဵဝ် ပႆႇႁၼ်တူဝ်မၼ်းၶိုၼ်းၶႃႈ”- ဝႃႈၼႆ။

မိူၼ်ၼႆၼင်ႇၵဝ်ႇ တီႈဝဵင်းမိူင်းပွၼ်ၵေႃႈ ၵေးၼမ်ႉပွၼ် ၵိုင်ႉၵၢင်ႉယိုင်ႈၶိုၼ်ႈ ၼွင်းထူမ်ႈဝဵင်း၊ ထူမ်ႈၶဝ်ႈ သူၼ်ႁႆႈၼႃး ၵူၼ်းမိူင်းလူႉၵွႆ ႁူဝ်ပၢၵ်ႇဢေႊၶိူဝ်ႊ။ ၸဝ်ႈရူတ်ႉၸဝ်ႈၵႃး ၵႂႃႇမႃး တူၼ်ႈတီးလႄႈ မိူင်းတႆး ပွတ်းၸၢၼ်း ဢမ်ႇၸၢင်ႈလတ်းၼမ်ႉထူမ်ႈ ထိုင်တီႈလႆႈဝၢႆႇ ႁူဝ်ရူတ်ႉၶိုၼ်ႈ မိူဝ်းၶိုၼ်းတၢင်း ဝဵင်းတူၼ်ႈတီး – ပီႈၼၢင်းလႅင် ၸဝ်ႈရူတ်ႉၵႃး တၢင်ႇၶူဝ်း လၢတ်ႈတီႈၽူႈတွႆႇႁွၵ်ႈၼင်ႇၼႆ။

သဵၼ်ႈတၢင်း တၢင်းဝၢၼ်ႈၶွၵ်းၼွႆႉၼႆႉ ပေႃးထိုင်ၶၢဝ်းၾူၼ် လိၼ်လွႆၵႆႉၵူၼ်ႇတဵင် သဵၼ်ႈတၢင်း ရူတ်ႉၵႃး ၵူႈပီယူႇသေတႃႉ ပီၼႆႉ ႁဵတ်းႁႂ်ႈၵူၼ်းတၢႆထိုင် 10 ပၢႆၼႆႉ ပဵၼ်ဢၼ်ႁၢဝ်ႈႁႅင်း တႄႉတႄႉ ဝႃႈၼႆ။