မႄႈၼမ်ႉၵူၵ်း လုပ်ႇၼွင်းထူမ်ႈ သူၼ်ႁႆႈၼႃး ႁိူၼ်းယေးၵူၼ်းမိူင်း ၼႂ်းဢိူင်ႇတႃႈတွၼ်း ဝဵင်းမႄႈဢၢႆး ႁၢဝ်ႈႁႅင်း ၵမ်ႈၼမ် ပဵၼ်မူႇဝၢၼ်ႈၸၢဝ်းတႆး၊ ထႆးလႄႈ လႃးႁူႇ ၸိူဝ်းၼႆႉ။

ဝၼ်းတီႈ 11/09/2024 ယၢမ်းၵၢင်ႁူဝ်ၼႂ်ၸဝ်ႉ မွၵ်ႈ 3 မူင်း မႄႈၼမ်ႉၵူၵ်း လူၼ်ႉၾင်ႇ လုပ်ႇၼွင်းထူမ်ႈ တီႈဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ဝဵင်းမႄႈဢၢႆး ၸႄႈတွၼ်ႈၵဵင်းမႂ်ႇ ၸိုင်ႈထႆး ႁိူၼ်းယေး ၵူၼ်းဝၢၼ်ႈ ၺႃးၼမ်ႉထူမ်ႈ ဢမ်ႇယွမ်း 200 လင် ယဝ်ႉၵေႃႈ သူၼ်ႁႆႈၼႃး ၸိူဝ်းၼႆႉ လူႉသုမ်းၸွမ်းထႅင်ႈ တင်းၼမ်လၢႆ။  

ၼၢင်းသႅင်မိူင်းလီ တီႈတိူင်ႇပၢင်ႇ သမႃးၶူမ်းပၢႆးပၺ်ႇၺႃႇလႄႈ ၾိင်ႈငႄႈတႆး လၢတ်ႈတီႈၽူႈတွႆႇႁွၵ်ႈဝႃႈ – “တီႈဝၢၼ်ႈမႂ်ႇမွၵ်ႇၸၢမ်ၼႆႉ ၼမ်ႉၵူၵ်းဢမ်ႇတွၼ်ႉထူမ်ႈ ၸိူင်ႉၼႆမႃးသေပွၵ်ႈ ၵူၼ်းထဝ်ႈ ဢႃယု 70-80 ပီ လၢတ်ႈဝႃႈ ဢမ်ႇယၢမ်ႈ ႁၼ်ၼမ်ႉၵူၵ်းထူမ်ႈ ၸိူင်ႉၼႆမႃးသေပွၵ်ႈ။ တၢင်းလိုၵ်ႉၼမ်ႉၼႆႉ ပူၼ်ႉႁူဝ်ၵူၼ်း ၵူၺ်းဢမ်ႇၵႃး ႁိူၼ်းသွင်ၸၼ်ႉၼႆႉ လိူဝ်ထႅင်ႈလင်ၶႃးမၼ်းၵူၺ်းယဝ်ႉ။ လွင်ႈလူႉသုမ်းတႄႉ ၼမ်ဝႃႈ ၼမ်ၼၼ်ႉယဝ်ႉ ၸဵမ်ၶူဝ်းႁိူၼ်းယေး သူၼ်ႁႆႈၼႃး ၸိူဝ်းၼႆႉ”- ဝႃႈၼႆ။

ၼမ်ႉၵူၵ်း ဢၼ်လုပ်ႇၼွင်းထူမ်ႈ ႁိူၼ်းယေးၵူၼ်းမိူင်း ၼႂ်းဢိူင်ႇတႃႈတွၼ်းၼႆႉသမ်ႉ မိူၼ်ၼင်ႇ ဝၢၼ်ႈၵႅင်ႇယုင်ႈ၊ ဝၢၼ်ႈၵႅၼ်ႇသၢႆးမူၼ်း၊ ဝၢၼ်ႈတႃႈတွၼ်း၊ သၼ်တူၼ်ႈလူႇ၊ တႃႈမၢၵ်ႇၵႅင်း၊ ႁူၺ်ႈၼမ်ႉယဵၼ်း၊ ဝၢၼ်ႈၽႃတႂ်ႈ ၸိူဝ်းၼႆႉ။ ယဝ်ႉၵေႃႈ သူၼ်ႁႆႈၼႃး ဢၼ်လႆႈလူႉသုမ်းသမ်ႉ မိူၼ်ၼင်ႇ သူၼ်ၽၵ်းမီႇ၊ ၶဝ်ႈၵၢပ်ႇ၊ မၢၵ်ႇမူင်ႈ၊ မၢၵ်ႇၸွၵ်းလႄႈ တူင်ႈၼႃး ၸိူဝ်းၼႆႉ တင်းမူတ်း ဢမ်ႇယွမ်း 1,000 ဢေႊၶိူဝ်ႊ။

“ၵမ်ႈၼမ် ႁိူၼ်းယေး ဢၼ်ၺႃးၼမ်ႉထူမ်ႈႁႅင်းတႄႉ တေပဵၼ်ၸွမ်းႁိမ်းၾင်ႇၼမ်ႉၵူၵ်း ယဝ်ႉၵေႃႈ ပဵၼ်မူႇဝၢၼ်ႈၸၢဝ်းတႆး၊ ထႆးလႄႈ လႃးႁူႇ ၸိူဝ်းၼႆႉ။ မၢင်ဝၢၼ်ႈၼႆႉ ယွၼ်ႉၼမ်ႉထူမ်ႈႁႅင်း လိၼ်ၵူၼ်ႇတဵင်တၢင်း။ ယဝ်ႉၵေႃႈ ဢမ်ႇမီးလႅင်းၾူၼ်း၊ ၾႆးၾႃႉၵေႃႈ ထုၵ်ႇတၢတ်းၶၢတ်ႇလႄႈ ယွၼ်ႉၼၼ် ယူႇတီႈ ၸုမ်းၸွႆႈထႅမ် ႁဝ်းၶႃႈ လႆႈဢဝ်ၶဝ်ႈၼမ်ႉတၢင်း ၵိၼ် တၢင်ႇၵႃးၶိုၼ်ႈတၢင်းလွႆ တေႃႉသူင်ႇၸွႆႈၶႃႈဢေႃႈ”- ၼၢင်းသႅင်မိူင်းလီ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ်ၼႆႉ ယူႇတီႈ ၽူႈယႂ်ႇဝၢၼ်ႈၽႂ်မၼ်းသေ ၶၢႆႉၵူၼ်းမိူင်း ၸိူဝ်းထူပ်းၽေးၼမ်ႉထူမ်ႈၼၼ်ႉ ယူႇဝႆႉ ၸွမ်းသႃလႃး၊ ႁူင်းႁဵၼ်းလႄႈ ဝတ်ႉဝႃးၽႃသိူဝ်ႇ ၸိူဝ်းၼႆႉ။

မႄႈၼမ်ႉၵူၵ်းၼႆႉ တေမီးမႄႈၼမ်ႉၾၢင်၊ ၼမ်ႉမႄႈသၢဝ်၊ ၼမ်ႉလွႆလၢင်း၊ ၼမ်ႉယွၼ်း ၸိူဝ်းၼႆႉ လႆၶဝ်ႈႁူမ်ႈဝႆႉ။ ဝၼ်းတီႈ 10 ၼႆႉ ယွၼ်ႉၾူၼ်တူၵ်းႁႅင်းသေ ႁဵတ်းႁႂ်ႈလိၼ်ၵူၼ်ႇ တဵင်ၵူၼ်းဝၢၼ်ႈလွႆလႅမ် မူႇ 8 ဝဵင်းမႄႈဢၢႆး ၵူၼ်းဝၢၼ်ႈလူႉတၢႆ 5 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇလဵၵ်ႉ 5 လိူၼ် ၵေႃႉၼိုင်ႈလႄႈ ၵူၼ်း ဝၢၼ်ႈလၢႆႇဢၢႆး လူႉတၢႆ 1 ၵေႃႉ။ ယဝ်ႉၵေႃႈ မၢတ်ႇၸဵပ်း 3 ၵေႃႉ – သိုဝ်ႇၶၢဝ်ႇထႆးဢွၵ်ႇ ဝႆႉၼင်ႇၼႆ။

ယၢမ်းလဵဝ် ယူႇတီႈ မုၼ်ၼိထိ လူမ်ႈၽူဝ်းလႄႈ သမႃးၶူမ်းပၢႆးပၺ်ႇၺႃႇလႄႈ ၾိင်ႈငႄႈတႆး ႁူမ်ႈၵၼ် ႁပ်ႉ တၢင်းၸွႆႈထႅမ် တႃႇၸွႆႈၵူၼ်းထူပ်းၼမ်ႉထူမ်ႈၼႆႉ တီႈဝတ်ႉၼမ်ႉယွၼ်း သင်ဝႃႈ ပီႈၼွင်ႉတီႈၸမ်ၵႆ ၵမ်ႉၸွႆႈ ထႅမ်မႃးၸိုင် ၵပ်းသိုပ်ႇလႆႈတီႈ ၼၢင်းသႅင်မိူင်းလီ ၽူႈတိူင်ႇပၢင်ႇ သမႃးၶူမ်းပၢႆးပၺ်ႇၺႃႇလႄႈ ၾိင်ႈငႄႈတႆး မၢႆၾူၼ်း 0857089547 ဢမ်ႇ ၼၼ် ၸၢႆးၼၢၼ်ပၼ် ၽူႈတိူင်ႇပၢင်ႇ မုၼ်ၼိထိ လူမ်ႈၽူဝ်း မၢႆၾူၼ်း 0895586706 ၼႆယဝ်ႉ။

လိူဝ်ၼၼ်ႉ မိူၼ်ၼင်ႇ ၵူၼ်းမိူင်း တၢင်းဢိူင်ႇမွၼ်ႈပိၼ်ႇ ဝဵင်းမိူင်းၾၢင် ၸိူဝ်းယူႇႁိမ်းသၢပ်ႇၼမ်ႉမၢဝ်း ၸိူဝ်းၼၼ်ႉ ၵေႃႈ ၼမ်ႉလုပ်ႇၼွင်းထူမ်ႈႁႅင်း မိူၼ်ၵၼ် ဝႃႈၼႆ။

ၼွၵ်ႈလိူဝ် တၢင်းဝဵင်းမႄႈဢၢႆး – မိူင်းၾၢင်ၼႆႉယဝ်ႉ မိူၼ်ၼင်ႇ ဝဵင်းမႄႈသၢႆ ၸႄႈတွၼ်ႈၵဵင်းႁၢႆး လႅၼ်လိၼ် တႆး – ထႆး (တႃႈၶီႈလဵၵ်း – မႄႈသၢႆ) ၼၼ်ႉၵေႃႈ မႄႈၼမ်ႉသၢႆ လုပ်ႇၼွင်းထူမ်ႈ တင်းသွင်ၾင်ႇႁၢဝ်ႈႁႅင်း။ ၼၼ်ႉၵေႃႈ ႁဵတ်းႁႂ်ႈ ၵူၼ်းမိူင်းတင်းသွင်ၾင်ႇ ထူပ်းတၢင်းယၢပ်ႇၽိုတ်ႇႁႅင်းသေဢမ်ႇၵႃး ၶူဝ်းႁိူၼ်းယေး ၸိူဝ်းၼႆႉၵေႃႈ လူႉၵွႆသုမ်းၼမ် ၼႆယဝ်ႉ။