ၾူၼ်တူၵ်းထပ်းၵၼ်လၢႆဝၼ်းလႄႈ ၼမ်ႉတဵင်းယိုင်ႈ ၼႂ်ၼႆႉၵိုင်ႉၵၢင်ႉၼွင်းထူမ်ႈ ဝဵင်းမိူင်းၵိုင် လၢႆးၶႃႈ လႄႈလၢင်းၶိူဝ်း။

ၼႂ်ၼႆႉဝၼ်းတီႈ 10/09/2024 ၼမ်ႉတဵင်းၼွင်းထူမ်ႈတူင်ႈၼႃး ႁိူၼ်းယေးၵူၼ်းမိူင်းၵိုင် – ၵူၼ်းမိူင်းၵိုင် လၢတ်ႈၽူႈတွႆႇ ႁွၵ်ႈ ၼင်ႇၼႆ။

“ၶမ်ႈဝႃးတဵင်ႈၶိုၼ်း ၾူၼ်တူၵ်းႁႅင်းၼႃႇသေ ၼႂ်ၼႆႉ 3 မူင်းၵေႃႈ ၼမ်ႉတႄႇၶိုၼ်ႈ။ ထူမ်ႈၸွမ်း ၼႂ်းပွၵ်ႉလွႆပူႇတၢဝ်ႉ၊ ဝၢၼ်ႈပၢင်ၵၢတ်ႇ၊ ဝၢၼ်ႈၵျွင်း၊ ၼႂ်းပွၵ်ႉ 5 ၸိူဝ်းၼႆႉ ထူမ်ႈၼမ်။ ထိုင်မႃးၵၢင်ၼႂ်မွၵ်ႈ 9 မူင်း တႄႉၼမ်ႉယွမ်းလူင်းဢိတ်ႉ ၼိုင်ႈသေ မိူဝ်ႈလဵဝ်သမ်ႉ ၾူၼ်တူၵ်းၶိုၼ်းလႄႈ ၼမ်ႉၶိုၼ်ႈၶိုၼ်းၶႃႈ ဢေႃႈ။ ၼမ်ႉတဵင်းၵေႃႈၶိုၼ်ႈ ၼမ်ႉၶမ်း(ၼမ်ႉၶီႈ) ၵေႃႈၶိုၼ်ႈယဝ်ႉၶႃႈ”- ဝႃႈၼႆ။

လိူဝ်ၼၼ်ႉ ယၢမ်းလဵဝ် ယွၼ်ႉၼမ်ႉၵိုင်ႉၵၢင်ႉၶိုၼ်ႈၶိုၼ်းလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇ ႁိမ်းၸမ်မႄႈၼမ်ႉၶဝ် မိူၼ် ၼင်ႇ – ဝၢၼ်ႈၼမ်ႉဢုၼ်ႇ၊ လွႆပူႇတၢဝ်ႉ၊ ပွၵ်ႉ 5 ၸိူဝ်းၼႆႉ လႆႈၼႅတ်ႈၶၢႆႉၶူဝ်းပၢႆႈ။

“ၸႂ်ႈၶႃႈဢေႃႈ။ မိူဝ်ႈၵၢင်ၼႂ်ၼႆႉ ယူပ်ႈလူင်းၶိုၼ်းယဝ်ႉ။ ယၢမ်းၵၢင်ဝၼ်း ၵိုင်ႉၵၢင်ႉၶိုၼ်ႈမႃး ထူမ်ႈႁိူၼ်းထူမ်ႈယေး ထူမ်ႈယွင်ၶဝ်ႈ ၸိူဝ်းၼႆႉ။ ၶဝ်ႈပိူၵ်ႇၵေႃႈ လွင်ႈပႃးၵႂႃႇၸွမ်းၼမ်ႉ။  မိူဝ်ႈလဵဝ် တိုၵ်ႉဢွၼ်ၵၼ် တေႃႉ ဢွၼ်ၵၼ်ပၢႆႈယူႇ။ ၼႂ်း ၼႃးၵေႃႈ ပဵၼ်ၼမ်ႉမူတ်းယဝ်ႉ။ ပေႃးၼမ်ႉဢမ်ႇယွမ်းၶိုၼ်းတႄႉ မႆႈၸႂ် ၵူဝ်တူၼ်ႈၶဝ်ႈလူႉၵူၺ်းယဝ်ႉ” – ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

ၼႂ်းၸႄႈဝဵင်းမိူင်းၵိုင်ၼႆႉ ပူၼ်ႉမႃးမိူဝ်ႈ 10 ပီၵေႃႈ ယွၼ်ႉၾူၼ်တူၵ်းထပ်းၵၼ်သေ ယၢမ်ႈထူမ်ႈယဝ်ႉ ပွၵ်ႈၼိုင်ႈ။ ဢၼ် ၼမ်ႉထူမ်ႈပွၵ်ႈၼႆႉၵေႃႈ ႁဵတ်းႁႂ်ႈၵူၼ်းမိူင်း လူႉသုမ်း ၶူဝ်းၶွင်ႁိူၼ်းယေး တူၼ်ႈၶဝ်ႈ ဢၼ်တိုၵ်ႉၽုၵ်ႇဝႆႉ ၸိူဝ်းၼၼ်ႉလႄႈ ၶဝ်ႈသၢၼ်ၶဝ်ႈပိူၵ်ႇ ဢၼ်ဝႆႉၸွမ်းၼႂ်းယွင်ၶဝ်ႈတင်းၼမ်။

တီႈဝဵင်းလၢႆးၶႃႈ ဝဵင်းဢၼ်မီးႁိမ်းၾင်ႇၼမ်ႉတဵင်းၵေႃႈ ၼမ်ႉထူမ်ႈတူင်ႈႁႆႈတူင်ႈၼႃး ၼင်ႇၵဝ်ႇ။

တီႈဝဵင်းလၢင်းၶိူဝ်း ၼမ်ႉတဵင်းၸင်ႇႁႃယွမ်းၵႂႃႇဢမ်ႇတၼ်းထိုင်ဝူင်ႈ မိူဝ်ႈၼႆႉ 10/09/2024 ၼမ်ႉတဵင်း ၵိုင်ႉၵၢင်ႉၼွင်းထူမ်ႈၶိုၼ်းထႅင်ႈ။

ၼၢင်းယိင်း ဢႃယု 30 ပၢႆ မႄႈလုၵ်ႈဢွၼ်ႇ ၵူၼ်းဝၢၼ်ႈၼမ်ႉဢုၼ်ႇ လၢတ်ႈဝႃႈ – “မွၵ်ႈၶၢဝ်း 9 မူင်း 10 မူင်းၼႆႉ ၼမ်ႉၵိုင်ႉၵၢင်ႉၶဝ်ႈဝၢၼ်ႈမႃး။ ၵူၼ်းၼႂ်းဝၢၼ်ႈ ဢွၼ်ၵၼ်တူၵ်းၸႂ် တိုၼ်ႇသၢၼ်ႈ ဢဝ်ၶူဝ်းၶွင် ဢၼ်လမ်ႇလွင်ႈဢွၵ်ႇဝၢၼ်ႈ ၵႂႃႇဝႆႉၸွမ်းတၢင်းလူင် တီႈၵွင်းတီႈသုင်။ ၼမ်ႉထူမ်ႈပူၼ်ႉႁိူၼ်းႁဝ်း ဢူင် ၵူမ်ႇယင်းပႆႇႁႅင်ႈ မိူဝ်ႈၼႆႉထူမ်ႈၶိုၼ်းယဝ်ႉ။ လႆႈ ဢဝ်ၵူၼ်းထဝ်ႈလုၵ်ႈဢွၼ်ႇ ငိူင်ႉပၢႆႈၵႂႃႇယူႇၸွမ်းပီႈ ၼွင်ႉ ဢၼ်ယူႇတီႈသုင်”- ဝႃႈၼႆ။

ၼမ်ႉတဵင်း ထူမ်ႈတီႈဝဵင်းလၢင်းၶိူဝ်း မိူဝ်ႈၼႆႉ ၵိုင်ႉၵၢင်ႉထူမ်ႈသေ ယဝ်ႉၵေႃႈ ထူမ်ႈဝႆးထူမ်ႈၵႂၢင်ႈ လိူဝ်ၵမ်းဢွၼ်တၢင်း – ၼၢင်းယိင်းဢွၼ်ႇ ၵူၼ်းဝၢၼ်ႈၼမ်ႉဢုၼ်ႇ လၢတ်ႈၼင်ႇၼႆ။

ယၢမ်းလဵဝ်တႄႉ တိုၵ်ႉထူမ်ႈၶဝ်ႈတီႈဝၢၼ်ႈၼမ်ႉဢုၼ်ႇ ၵူၺ်းသေ ၼႂ်းပွၵ်ႉၼႂ်းဝဵင်း ၸွမ်းသၢပ်ႇၼမ်ႉတဵင်းတႄႉ ပႆႇထူမ်ႈ ၶဝ်ႈပႃးၼင်ႇၵဝ်ႇ။ ၵူၼ်းလၢင်းၶိူဝ်း လၢတ်ႈဝႃႈ တေႃႇထိုင်ယၢမ်းဝၢႆးဝၼ်း 3 မူင်းၼႆႉ တႄႉ ၼမ်ႉထူမ်ႈၶိုၼ်ႈမွၵ်ႈ 4 ပေႇ (ထတ်း) ၼႆႉ – ၵူၼ်းထဝ်ႈလႄႈ လုၵ်ႈဢွၼ်ႇ ထုၵ်ႇလီႁၢင်ႈႁႅၼ်းတူဝ်ႈတၼ်းဝႆႉ ပေႃးၼမ်ႉၵိုင်ႉၵၢင်ႉၶဝ်ႈထူမ်ႈ ၸၢင်ႈဢဝ်ၵၼ်ၶၢႆႉပၢႆႈဝႆး ဝႃႈၼႆ။