သိုၵ်းၵဝ်ႈၵၢင်ႉ MNDAA သင်ႇဢိုတ်းႁူင်းႁဵၼ်း ၸၼ်ႉသုင် ဢထၵ ဝဵင်းပၢင်ႇသၢႆး ဝႆႉတႃႇ 2 ဝၼ်း မႆႈၸႂ်ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးယိုဝ်းသႂ်ႇ ဝႃႈၼႆ။

မိူဝ်ႈဝႃး ဝၼ်းတီႈ 09/09/2024 ယၢမ်းၵၢင်ၼႂ် သိုၵ်းၵဝ်ႈၵၢင်ႉ ၵိုင်ႉၵၢင်ႉ သင်ႇႁႂ်ႈႁူင်းႁဵၼ်းၸၼ်ႉသုင် တီႈဝဵင်းပၢင်ႇသၢႆး ၸႄႈဝဵင်းမူႇၸေႊ ၵိုတ်းလိုဝ်ႈၵၢၼ်သွၼ်ဝႆႉ ၸူဝ်ႈၶၢဝ်း ႁဵတ်းႁႂ်ႈၵူၼ်းမိူင်းတူၵ်းၸႂ် ၼႅတ်ႈ ပိၵ်ႉၽၵ်းတူႁိူၼ်းယေး ႁၢၼ်ႉတၢင်းၶၢႆ။

ၵူၼ်းမိူင်း ဝဵင်းပၢင်ႇသၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းၵဝ်ႈၵၢင်ႉ မႃးသင်ႇႁႂ်ႈပိၵ်ႉႁူင်းႁဵၼ်း 2 ဝၼ်းၶႃႈဝႃႇ။ ၵူဝ်ၽေးသိုၵ်းတၢင်းၵၢင်ႁၢဝ်ၼႆ။ ႁဵတ်းႁႂ်ႈၵူၼ်းတၢင်းဝဵင်းလႄႈ တၢင်းဝၢၼ်ႈ တူၵ်းတိုၼ်ႇၵူဝ် ႁႄၵၼ်မူတ်း။ ၵမ်ႈၽွင်ႈ ၵေႃႈ ၼႅတ်ႈၵဵပ်းၶူဝ်းၶွင် ပိၵ်ႉၽၵ်းတူႁိူၼ်းယေးလႄႈ ႁၢၼ်ႉၶၢႆၶူဝ်း ၸိူဝ်းၼႆႉ။ တေႃႇထိုင်မိူဝ်ႈလဵဝ် တိုၵ်ႉၾၢင်ႉသေၵူဝ်ဝႆႉယူႇ”- ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈ ႁၢင်ပီ 2023 ၊ ၸဵမ်မိူဝ်ႈသိုၵ်းၵဝ်ႈၵၢင်ႉ တႄႇၵုမ်း ဝဵင်းပၢင်ႇသၢႆးသေ ပၼ်ႇၵၢၼ်ၽွင်းငမ်းႁင်းၶဝ်မႃးၼႆႉ တီႈႁူင်းႁဵၼ်းၵေႃႈ ဢဝ်မေႃသွၼ် ၶူးသွၼ် ၸိူဝ်းႁဵတ်း CDM မႃးႁၢပ်ႇၵၢၼ်သေ ပၼ်ႇၵၢၼ်ဝႆႉ၊ တီႈႁူင်းႁဵၼ်းၸၼ်ႉသုင် ဢထၵ ပၢင်ႇသၢႆးၼႆႉ မီးလုၵ်ႈႁဵၼ်း တင်းမူတ်း 800 ပၢႆ။ 

ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ယၢမ်းလဵဝ်တႄႉ ၵူဝ်ငဝ်းလၢႆးမၼ်း မိူၼ်တီႈဝဵင်းၼမ်ႉၶမ်း ၵူၺ်းယဝ်ႉ ၶႃႈ ဢေႃႈ။ ၵူဝ်သိုၵ်းမၢၼ်ႈ ယူႇယူႇဢဝ်ၶိူင်ႈမိၼ်သိုၵ်း မႃးပွႆႇမၢၵ်ႇ ယၢမ်းၵၢင်ၶမ်ႈၵၢင်ၶိုၼ်း။ ဢွၼ်ၵၼ်ၶုတ်းလုၵ်းပဵမ်ႇဝႆႉဢေႃႈ။ ပေႃးငိၼ်းသဵင်ၵွင်ႈသဵင်မၢၵ်ႇၵေႃႈ လူဝ်လူင်းလုၵ်းပၢႆႈမႅပ်းယဝ်ႉၶႃႈ”- ဝႃႈၼႆ။

တီႈဝဵင်းပၢင်ႇသၢႆးၼႆႉ မိူဝ်ႈဢွၼ်တၢင်း တေမီးႁူင်းႁဵၼ်း တင်းၼွၵ်ႈဝဵင်းတၢင်းဝၢၼ်ႈလွတ်ႈဢိင်ႇ၊ ၵဵင်းယၢင်း၊ မၢၼ်ႈၶူင်ႈလူင်၊ မၢၼ်ႈၶူင်ႈၵၢင် ၊ ဝၢၼ်ႈၸႄႈၼမ်ႉႁူး ၸိူဝ်းၼႆႉသေ ယၢမ်းလဵဝ် ဝၢႆးလင်ၽႅၼ်ယၼ်ႇ သိုၵ်း 1027 ၵမ်းၼိုင်ႈ ၼၼ်ႉ လုၵ်ႈႁဵၼ်းဢွၼ်ၵၼ် မႃးၶဝ်ႈႁူင်းႁဵၼ်း တီႈဝဵင်းပၢင်ႇသၢႆး မူတ်းယဝ်ႉ ပေႃႈမႄႈလုၵ်ႈႁဵၼ်း ၵေႃႉၼိုင်ႈၵေႃႈ လၢတ်ႈၼင်ႇၼႆ။

လိူၼ်သႅပ်ႊထႅမ်ႊပိူဝ်ႊ ဝၼ်းတီႈ 6 ၼႆႉ သိုၵ်းမၢၼ်ႈပွႆႇမၢၵ်ႇ တီႈဝဵင်းၼမ်ႉၶမ်း၊ လႃႈသဵဝ်ႈ ၸိုင်ႈတႆးပွတ်းႁွင်ႇ၊ ၵူၼ်းမိူင်းပိုၼ်ႉတီႈ မႆႈၸႂ်ၵူဝ်မၼ်းလၢမ်းမႃး ထိုင်ဝဵင်းပၢင်ႇသၢႆး၊ ဢွၼ်ၵၼ်ႁၢင်ႈႁႅၼ်းဝႆႉ ဢမ်ႇၸၢင်ႈ ႁဵတ်းၵၢၼ် ႁႃၵိၼ်လဵင်ႉတွင်ႉလီလီ ၵူၼ်းမိူင်း ဝဵင်းပၢင်ႇသၢႆး လၢတ်ႈၽူႈတွႆႇႁွၵ်ႈထႅင်ႈ ၼင်ႇၼႆ။

ၽႅၼ်ၵၢၼ်ယၼ်ႇသိုၵ်း1027 ပွၵ်ႈၵမ်းၼိုင်ႈ မိူဝ်ႈလိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 2 သိုၵ်းၵဝ်ႈၵၢင်ႉ MNDAA ယိုတ်းလႆႈဝဵင်းပၢင်ႇသၢႆး။ ယၢမ်းလဵဝ် တီႈဝဵင်းပၢင်ႇသၢႆးၼႆႉ သိုၵ်းမၢၼ်ႈတႄႉ ဢမ်ႇမီးယဝ်ႉ။ မီးသိုၵ်းၵဝ်ႈၵၢင်ႉ၊ သိုၵ်း SSPP/ SSA လႄႈ သိုၵ်းၶၢင် KIA  ၵႂႃႇမႃးတူင်ႉၼိုင်ဝႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)