ယၢမ်းလဵဝ် ၵူၼ်းၼႂ်းဝဵင်းၼမ်ႉၶမ်း ဢွၼ်ၵၼ်ပၢႆႈဢွၵ်ႇဝဵင်း သွၼ်ႈၼွၼ်းၸွမ်းၼႂ်းမူႇဝၢၼ်ႈ ၸွမ်းသၢပ်ႇဝဵင်း မၢင်ၸိူဝ်းပၢႆႈႁွတ်ႈထိုင်မိူင်းၶႄႇ ၵူဝ်သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇထႅင်ႈ ယၢမ်းၵၢင်ၶမ်ႈၵၢင် ၶိုၼ်း။

ဝၢႆးလင် သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇတီႈပွၵ်ႉႁူဝ်ၵၢတ်ႇ၊ ပွၵ်ႉၼိူဝ် ၼႂ်းဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မိူဝ်ႈဝၼ်းတီႈ 06/09/2024 ၼၼ်ႉယဝ်ႉ ႁဵတ်းႁႂ်ႈၵူၼ်းၼႂ်းဝဵင်း ဢွၼ်ၵၼ်ပၢႆႈဢွၵ်ႇဝဵင်း ယၢမ်းႁူဝ်ၶမ်ႈ တွၼ်ႈတႃႇတေလွတ်ႈမၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပေႃးႁူဝ်ၶမ်ႈမႃး ၵူၼ်းၼႂ်းဝဵင်း ဢွၼ်ၵၼ်ၶၢႆႉၵႂႃႇၼွၼ်းၸွမ်းသၢပ်ႇဝဵင်း ၼႂ်းမူႇဝၢၼ်ႈ ႁိူၼ်းယေးပီႈၼွင်ႉၽႂ်မၼ်း။ ယွၼ်ႉဝႃႈ တေလွတ်ႈၽေးလိူဝ်သေ တီႈၼႂ်းဝဵင်းဢေႃႈ။ ဢၼ် ဢွၵ်ႇၵႂႃႇၼွၼ်းၼွၵ်ႈဝဵင်းၼႆႉ 3 ပုၼ်ႈ 2 ပုၼ်ႈယဝ်ႉ။ ပေႃးဝႃႈ ႁူဝ်ၶမ်ႈ ၵိၼ်ၶဝ်ႈ ယဝ်ႉၵေႃႈ ၵႂႃႇၵၼ်ယဝ်ႉ။ ပေႃးႁူဝ်ၼႂ်မႃး ၸင်ႇပွၵ်ႈမႃးၶိုၼ်း ၸိူင်ႉၼၼ်ဢေႃႈ။ ဢၼ်တႄႇပၢႆႈဢွၵ်ႇၵႂႃႇၼမ်တႄႉ တႄႇဝၼ်းတီႈ 7-8 ၼႆႉမႃးဢေႃႈ”- ဝႃႈၼႆ။

ၵမ်ႈၼမ် ဢၼ်ၵူၼ်းၼႂ်းဝဵင်းၼမ်ႉၶမ်း ပၢႆႈဢွၵ်ႇၵႂႃႇၼွၼ်းၼွၵ်ႈဝဵင်းၼမ်ၼၼ်ႉ တေပဵၼ်ၵူၼ်းမိူင်း ၸိူဝ်းယူႇၸွမ်း ႁိမ်းလုမ်းလူင်ပွင်ၸိုင်ႈမၢၼ်ႈ မိူၼ်ၼင်ႇ – လုမ်းပလိၵ်ႈမၢၼ်ႈ၊ လုမ်းၽူႈၵွၼ်းၸႄႈဝဵင်း၊ လုမ်းလိူမ်ႈလႆႇ၊ လုမ်းသႃႇသ ၼႃႇ၊ လုမ်း SP ၊ လုမ်းၵဵပ်းၶွၼ်ႇ (အခွန်ရုံး) ၸိူဝ်းၼႆႉ ယွၼ်ႉသိုၵ်းတဢၢင်း TNLA မႃးပုတ်ႈယူႇဝႆႉလႄႈ ၵူဝ်ပဵၼ်တီႈပဝ်ႉမၢႆ ၶွင်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ။

“ဢၼ်သိုၵ်းမၢၼ်ႈ မႃးပွႆႇမၢၵ်ႇၼႆႉ ပဝ်ႉမၢႆၶဝ်ပဵၼ်သိုၵ်းလွႆ။ တီႈပွၵ်ႉၼိူဝ်ၼၼ်ႉ ၵႅမ်တပ်ႉသိုၵ်းလွႆၶဝ် မႃးယူႇဝႆႉ။ ဢွင်ႈတီႈမၢၵ်ႇမႃးတူၵ်းလႄႈ တီႈမၼ်းယူႇၼၼ်ႉ တေယၢၼ်ၵၼ်ႁိူၼ်းမွၵ်ႈ 3 လင်ၵူၺ်း။ တီႈသိုၵ်းလွႆယူႇဝႆႉ ႁိူၼ်းတိုၵ်း 3 ၸၼ်ႉ တီႈပွၵ်ႉႁူဝ်ၵၢတ်ႇၼၼ်ႉၵေႃႈ မၢၵ်ႇလူင်မႃးတူၵ်းႁိမ်းၼၼ်ႉ တေယၢၼ်တီႈၶဝ်ယူႇမွၵ်ႈ 15 ထတ်း/ ပေႇ ၼႆႉ ၵူၺ်း။ ပဝ်ႉမၢႆ ဢၼ်သိုၵ်းမၢၼ်ႈ မႃးပွႆႇမၢၵ်ႇၼႆႉ ဢမ်ႇတိူဝ်ႉႁိူၼ်းသိုၵ်းလွႆၶဝ်ယူႇ ၵူၺ်းၵႃႈ မႃးတိူဝ်ႉႁိူၼ်းယေးၵူၼ်းမိူင်း ၸိူင်ႉၼႆဢေႃႈ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈ ၼႄၼင်ႇၼႆ။

ဝၢႆးသေ သိုၵ်းမၢၼ်ႈ မႃးပွႆႇမၢၵ်ႇၸိူင်ႉၼႆယဝ်ႉ ၸိူဝ်းၵူၼ်းထဝ်ႈ ဢႃယုယႂ်ႇတႄႉ ၵမ်ႈၼမ် ဢွၼ်ၵၼ်ပၢႆႈၵႂႃႇ တၢင်းမူႇ ၸေႊသေ ၶဝ်ႈၵႂႃႇၼႂ်းမိူင်းၶႄႇ။ ယၢမ်းလဵဝ် ၼႂ်းဝဵင်းၼမ်ႉၶမ်းၼႆႉ မိူၼ်ၼင်ႇ – ၵၢတ်ႇလူင်၊ ႁူင်းႁဵၼ်း ၸိူဝ်းၼႆႉတႄႉ ပိၵ်ႉဢိုတ်းမူတ်းယဝ်ႉ။ လိူဝ်ၼၼ်ႉ ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆႉထႅင်ႈ တင်းၼမ်။

ၵူၼ်းၶၢႆၵုၼ်ႇ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ႁၢၼ်ႉၶၢႆၶူဝ်းၵုၼ်ႇ ၸွမ်းႁိမ်းၵၢတ်ႇ၊ ယဝ်ႉၵေႃႈ ၵၢတ်ႇလူင် ၸိူဝ်းၼႆႉ ပိၵ်ႉဢိုတ်းမူတ်းယဝ်ႉ။ ပႃးၸဵမ်ႁူင်းႁဵၼ်းဢေႃႈ။ ယွၼ်ႉဝႃႈ ပိူၼ်ႈဢဝ် တွၼ်ႈသွၼ်တီႈၵူတ်ႉၶၢႆ ဢၼ်ယၢမ်ႈပဵၼ်မႃးၼၼ်ႉဢေႃႈ။ ပေႃးဢဝ် ပိူဝ်ႊသႅၼ်ႊဝႃႈၸိုင် ဢၼ်ပိုတ်ႇ ႁၢၼ်ႉၶၢႆၶူဝ်းၵုၼ်ႇ ယူႇယၢမ်းလဵဝ်ၼႆႉ တေမီးမွၵ်ႈ 50 % ၸိူင်ႉၼၼ်ၵူၺ်း တႃႇ 50 % တႄႉ ပိၵ်ႉဢိုတ်းဝႆႉဢေႃႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 6 ယၢမ်းၵၢင်ၼႂ်ၸဝ်ႉ 1 မူင်းၶိုင်ႈၼၼ်ႉ သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇ တီႈပွၵ်ႉၼိူဝ် 2 လုၵ်ႈလႄႈ ပွၵ်ႉႁူဝ်ၵၢတ်ႇ 2 လုၵ်ႈ တင်းမူတ်း 4 လုၵ်ႈ။ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 13 ၵေႃႉ၊ မၢတ်ႇၸဵပ်း 12 ၵေႃႉ။

ႁိူၼ်းယေး ဢၼ်လႆႈလူႉၵွႆယွၵ်းယွႆသမ်ႉ မွၵ်ႈ 10 လင်၊ ဢၼ်တိူဝ်ႉၺႃးလူႉၵွႆ မွၵ်ႈ 50 % သမ်ႉ မီးမွၵ်ႈ 20 လင်။ လိူဝ် ၼၼ်ႉ တိူဝ်ႉၺႃး ၽၵ်းတူ၊ ႁူင်းလႅင်း၊ လင်ၶႃးႁိူၼ်း ၸိူဝ်းၼႆႉ လူႉၵွႆ ဢိတ်းဢွတ်းထႅင်ႈ ၸိူဝ်းၼၼ်ႉသမ်ႉ မီးၼမ် ပေႃးႁူမ်ႈၵၼ် တင်းမူတ်း လူႉၵွႆ ဢမ်ႇယွမ်း 70 လင်။

ဢိင်ၼိူဝ် လွင်ႈၼႆႉသေ ယူႇတီႈ တပ်ႉသိုၵ်းတဢၢင်းၶဝ် လႆႈၵဵပ်းသဵၼ်ႈမၢႆဝႆႉ လွင်ႈႁိူၼ်းယေး လူႉသုမ်း ၶၼ်ငိုၼ်းဢမ်ႇယွမ်း 13,000 သႅၼ်ပျႃး – ၵူၼ်းပိုၼ်ႉတီႈ ဝဵင်းၼမ်ႉၶမ်းလၢတ်ႈ။

“တႃႇလွင်ႈႁူမ်ႇလူမ်ႈၵူၼ်းမိူင်းတႄႉ ဢမ်ႇမီးၸုမ်းလႂ် ဢဝ်ပုၼ်ႈၽွၼ်းပၼ်ႁဝ်းလႆႈ တေႃႈၼင်ႇ သိုၵ်းလွႆ ဢၼ်မႃးၶၢတ်ႈယူႇၸွမ်းႁိူၼ်းယေးလႄႈ တီႈလုမ်းလူင်ပွင်ၸိုင်ႈမၢၼ်ႈ ၸိူဝ်းၼၼ်ႉ ၶဝ်ယင်းဢမ်ႇႁတ်းယူႇ ပေႃးၵၢင်ၶမ်ႈၵၢင်ၶိုၼ်းမႃး ပၢႆႈၸွမ်းပိူၼ်ႈမူတ်း။ ပေႃးမိူင်းလႅင်းမႃး ၸင်ႇႁၼ်ၼႃႈၶဝ် ၶိုၼ်းဢေႃႈ။ ၼၼ်ႉတႄႉ ၶဝ်ပၢႆႈၵႂႃႇၼွၼ်းတီႈလႂ်တႄႉ ဢမ်ႇႁူႉၶႃႈ”- ၵူၼ်းဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ၵွပ်ႈၼႆလႄႈ သင်ပဵၼ်လႆႈ ဢွင်ႈတီႈ ၸုမ်းယိပ်းၵွင်ႈၵၢင်ႇၶဝ် ပၵ်းလုမ်းယူႇဝႆႉၼၼ်ႉ ၵူၼ်းမိူင်းထုၵ်ႇလီ ငိူင်ႉဝႄႈယူႇၵႆ သင်ပဵၼ်လႆႈ ထုၵ်ႇလီၶုတ်းလုၵ်းပဵမ်ႇ (လုၵ်းထႅင်ႉ) ဝႆႉ ယိုင်ႈၶႅၼ်းလီ – ၵူၼ်းပိုၼ်ႉတီႈလၢတ်ႈ။