မိူဝ်ႈၼႆႉ ဝၼ်းတီႈ 04/09/2024 ယၢမ်းၵၢင်ၼႂ် ၵူၼ်းယွင်ႇယႃႈမဝ်းၵမ် ဢဝ်ၵွင်ႈသတ်းယၢမ်း ယိုဝ်းသႂ်ႇ ၸၢႆးၼုတ်း ဢႃယု 48 ပီ ၵူၼ်းဝၢၼ်ႈလူင်ပွၵ်ႉဢွၵ်ႇ ဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း လူႉတၢႆ တီႈၼႂ်းသူၼ် ဝႃႈၼႆ။
ၵူၼ်းပိုၼ်ႉတီႈ ဝဵင်းလၢင်းၶိူဝ်း ၽူႈယိင်း ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵေႃႉၺႃးယိုဝ်းတၢႆၼၼ်ႉ ပဵၼ်ပီႈၸၢႆးၼုတ်း ဢႃယု 48 ပီ။ ထုၵ်ႇၸၢႆးသႂ် ဢႃယုမွၵ်ႈ 30 ပီ ဢၼ်ပႂ်ႉသူၼ်ဝႆႉၼၼ်ႉ ဢဝ်ၵွင်ႈသတ်းယၢမ်း (ၵွင်ႈတႆး) သေ ယိုဝ်းပီႈၼုတ်း လူႉတၢႆတီႈၼႂ်းသူၼ်။ ၶဝ်မီးလွင်ႈၽိတ်းမေႃး သင်ၵၼ်တႄႉ ဢမ်ႇႁူႉၶႃႈ။ တီႈသူၼ်ၼၼ်ႉသမ်ႉ မီးႁိမ်းၶႅပ်ႇဝဵင်းၼႆႉၵူၺ်းၶႃႈ။ ပီႈၼုတ်းၼႆႉ ပဵၼ်လုၵ်ႈၸၢႆး ၽူႈၵွၼ်းဝၢၼ်ႈလူင်ပွၵ်ႉတူၵ်းၶႃႈ ဢေႃႈ”- ဝႃႈၼႆ။
ၸၢႆးၼုတ်းၼႆႉ ပဵၼ်လုၵ်ႈၸၢႆး လုင်းမႃႇလႃႇလႄႈ ပႃႈၸေႃး ယူႇဝၢၼ်ႈလူင်ပွၵ်ႉတူၵ်း ဝဵင်းလၢင်းၶိူဝ်း။ မၼ်းၸၢႆး ၶၢႆႉမႃးယူႇတီႈ ဝၢၼ်ႈလူင်ပွၵ်ႉဢွၵ်ႇသေ ပိုတ်ႇႁၢၼ်ႉၶၢႆၶူဝ်းၵုၼ်ႇၶွင်ၵိၼ်ယႅမ်ႉ တီႈႁိမ်းၸလွပ်ႈပွၵ်ႉဢွၵ်ႇ ဝႃႈၼႆ။
“ပီႈၸၢႆးၼုတ်းၼႆႉ ပဵၼ်ၵူၼ်းၸႂ်လီၵေႃႉၼိုင်ႈဢေႃႈ။ ဢမ်ႇမေႃၽိတ်းၽႂ်ၶႃႈ ႁဵတ်းႁိုဝ်လႄႈ ၺႃးယိုဝ်းတၢႆတႄႉ ႁဝ်းၶႃႈ ဢမ်ႇႁူႉ။ ၸၢႆးသႂ်ၼၼ်ႉ ပဵၼ်လုၵ်ႈၸၢႆး ၸၢႆးထုတ်ႉလႄႈ ၼၢင်းလႃႉတဵင်း ယူႇဝၢၼ်ႈလူင်ပွၵ်ႉတူၵ်း။ ယၢမ်းလဵဝ် ယူႇတီႈ ပလိၵ်ႈမၢၼ်ႈၶဝ် တီႉၺွပ်းၵုမ်းတူဝ်ဝႆႉယဝ်ႉ”- ၵူၼ်းပိုၼ်ႉတီႈ ဝဵင်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၸၢႆးၼုတ်းၼႆႉ ၵိုတ်းဝႆႉ လုၵ်ႈယိင်း 2 ၵေႃႉလႄႈ မေးၼၢင်း။ တေပူၼ်ႉၶၢပ်ႈတူဝ် မၼ်းၸၢႆးၼႂ်း ဝၼ်းတီႈ 5 (မိူဝ်ႈၽုၵ်ႈ) ၼႆႉ ဝႃႈၼႆ။
