သိုၵ်းမၢၼ်ႈတင်း ပျီႇတူႉၸိတ်ႉ ပဢူဝ်း ၵဵပ်းသိုၵ်းတၢင်းထုင်ႉလွႆမႆ ၸႄႈဝဵင်းႁူဝ်ပူင်း ၸိုင်ႈတႆး ပွတ်းၸၢၼ်းလႄႈ ၵူၼ်း ၼုမ်ႇ ဢွၼ်ၵၼ်ပၢႆႈၵႂႃႇယူႇတၢင်ႇဝၢၼ်ႈတၢင်ႇဝဵင်း ထိုင်တီႈဢမ်ႇမီးၵူၼ်းႁဵတ်းၵၢၼ်ၽုၵ်ႇသွမ်ႈ။
တင်ႈတႄႇ ပျီႇတူႉၸိတ်ႉပဢူဝ်း PNO ႁူမ်ႈ သိုၵ်းမၢၼ်ႈ ပိုတ်းယိုဝ်းၵၼ်တင်း သိုၵ်းပဢူဝ်း PNLA တၢင်းၸႄႈဝဵင်းသီႇသႅင်ႇ – ႁူဝ်ပူင်း မႃးတေႃႇထိုင်ယၢမ်းလဵဝ် ၼႂ်းၶၢဝ်းတၢင်း 8 လိူၼ်ၼႆႉ ၾၢႆႇတၢင်းသိုၵ်းမၢၼ်ႈ သင်ႇၵဵပ်းၵူၼ်းသိုၵ်းမႂ်ႇ ပၼ်ၵူႈလိူၼ် ႁဵတ်းႁႂ်ႈၵူၼ်းပိုၼ်ႉတီႈဢွၼ်ၵၼ်ပၢႆႈ။ ထိုင်ၶၢဝ်း ၶဝ်ႈသူၼ်လူင်းၼႃး ဢမ်ႇမီးၵူၼ်းၽုၵ်ႇသွမ်ႈ ၵူၼ်းမိူင်းယၢပ်ႇၽိုတ်ႇၵိၼ်းၸႂ်။
ၵူၼ်းၸၢႆးၼုမ်ႇ ဢႃယု 20 ပၢႆ ၸဝ်ႈသူၼ်တွင်လႅၼ်းယႃႈ ဢိူင်ႇၸၢမ်ၽူး ဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝၢၼ်ႈ တေၵိုတ်းၵူၼ်းထဝ်ႈလႄႈ လုၵ်ႈဢွၼ်ႇလဵၵ်ႉၵူၺ်း ယွၼ်ႉသိုၵ်းမၢၼ်ႈ ၵဵပ်းၵူၼ်း ၼုမ်ႇလႄႈ ၵူၼ်းၼုမ်ႇ ၸိူဝ်းႁဵတ်းလႆႈႁႃလႆႈၼၼ်ႉ ပၢႆႈၵႂႃႇၼွၵ်ႈမိူင်း မူတ်းယဝ်ႉ ၊ တႃႇႁဵတ်းသူၼ် ၼႂ်းဝၢၼ်ႈ ၼႂ်းၼႃးဢမ်ႇမီးယဝ်ႉ”- ဝႃႈၼႆ။
ဢိင်ၼိူဝ် ၵူၼ်းၼုမ်ႇၼႂ်းပိုၼ်ႉတီႈ ဢမ်ႇမီးယဝ်ႉသေ ၸဝ်ႈသူၼ်ၸိူဝ်းယၢမ်ႈႁဵတ်းမႃး 4-5 သူၼ် ၼၼ်ႉၵေႃႈ ယၢမ်းလဵဝ် ဢမ်ႇၸၢင်ႈၽုၵ်ႈ တင်း 4-5 သူၼ်ယဝ်ႉ။ လႆႈယွမ်းသေ ၽုၵ်ႇသွမ်ႈ၊ တႃႇၵူၼ်းႁဵတ်းၵၢၼ်သမ်ႉ လႆႈၵႂႃႇႁႃၸၢင်ႈ တၢင်ႇတီႈတၢင်ႇဝဵင်းမႃးလူၺ်ႈၵႃႈယႂ်ႇၵႃႈပႅင်း။
ၸဝ်ႈသူၼ်တွင်လႅၼ်းယႃႈ တီႈဝၢၼ်ႈၸၢမ်ၽူး လၢတ်ႈထႅင်ႈဝႃႈ – “ၵၢၼ်သူၼ်တွင်လႅၼ်းယႃႈ ႁဝ်းၶႃႈၼႆႉ လႆႈၸႂ်ႉ ဢဵၼ်ၸႂ်ႉႁႅင်း၊ ၽိုၼ်းၵေႃႈလႆႈႁႃႁင်းၵူၺ်းလႄႈ လူဝ်ႇဢဵၼ်ႁႅင်းၵူၼ်းၼုမ်ႇၼမ်၊ တေႃႈလဵဝ် ၵူၼ်း ၼုမ်ႇ ၼႂ်းဝၢၼ်ႈဢမ်ႇမီး ၵူၼ်းႁဵတ်းၵၢၼ်ၵေႃႈ ႁႃယၢပ်ႇ သူၼ်ၵေႃႈပႅတ်ႈႁၢမ်းဝႆႉ၊ လႆႈၽုၵ်ႇၵိၼ် မၢၵ်ႇၶဝ်ႈ တဝ်ႈၼမ်ႉ ၶၢဝ်းပွတ်းၵူၺ်းယဝ်ႉ”- ဝႃႈၼႆ။
ပေႃးတူၺ်းၵူၼ်းၼုမ်ႇ ၼႂ်းဝၢၼ်ႈ ၵျွၵ်ႉၵၶျႃး၊ တလျႃႉၼိူဝ်ႉ၊ ၸၢမ်ၽူး၊ ပၢင်ၸွၵ်ႇ၊ ပၢင်လႅမ်၊ ၼမ်ႉႁူး၊ ၼမ်ႉတႅမ်ႈလိၵ်ႈ ၸိူဝ်းၼႆႉ လႆႈႁၼ်ယွမ်းဢႄႇၵႂႃႇမွၵ်ႈၶိုင်ႈပၢႆ။
ယွၼ်ႉပိူဝ်ႈ ဢမ်ႇယွမ်းႁပ်ႉလႆႈၸဝ်ႈဢႃႇၼႃႇသိုၵ်းသေ ၵမ်ႈၽွင်ႈၵေႃႈ ပၢႆႈၵႂႃႇႁဵတ်းၵၢၼ် ႁႃၵိၼ်လဵင်ႉတွင်ႉ ၸွမ်းမိူင်းႁိမ်းႁွမ်း။ ၵမ်ႈၽွင်ႈၵေႃႈ ၵႂႃႇၶဝ်ႈႁူမ်ႈ ၸုမ်းၵႅတ်ႇၶႄၵူၼ်းမိူင်း PDF ဢၼ်မီးႁိမ်းပိုၼ်ႉတီႈ ၽႂ်မၼ်း။
ၵူၼ်းၼုမ်ႇပၢႆႈဢွၵ်ႇ မိူင်းထႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ဢၼ်လႆႈပၢႆႈဢွၵ်ႇႁိူၼ်းယေးမႃးၼႆႉ ပဵၼ်ယွၼ်ႉ သိုၵ်းမၢၼ်ႈ ၵဵပ်းၵူၼ်းသိုၵ်းမႂ်ႇ၊ တူဝ်ၶႃႈၵေႃႈ ယွၼ်ႉလိၵ်ႈသင်ႉထိုင်မႃးတီႈႁိူၼ်းလႄႈ ၸင်ႇလႆႈပၢႆႈ။ ယွၼ်ႉဢမ်ႇၶႂ်ႈယူႇတႂ်ႈသိုၵ်းမၢၼ်ႈလႄႈ ၸင်ႇပၢႆႈဢွၵ်ႇမႃး”- ဝႃႈၼႆ။
ပျီႇတူႉၸိတ်ႉ PNO သမ်ႉဝႃႈ ၽႂ်မီးလုၵ်ႈၸိူဝ်း ၵႂႃႇမီးၼွၵ်ႈမိူင်း တေလႆႈသႂ်ႇငိုၼ်းၼိုင်ႈလိူၼ် 3 သႅၼ်ပျႃး ထႅင်ႈၼႆလႄႈ ၸိူဝ်းယူႇၵေႃႈဢမ်ႇသႃႇ ၸိူဝ်းၵႂႃႇၵေႃႈၵိၼ်းၸႂ် – ၵူၼ်းပိုၼ်ႉတီႈလၢတ်ႈၼင်ႇၼႆ။
ယၢမ်းလဵဝ်သမ်ႉ ပျီႇတူႉၸိတ်ႉပဢူဝ်းဝႃႈ ဢဝ်ႁူမ်ႇလူမ်ႈဝၢၼ်ႈၼႆသေ ၼႄဢဵၼ်ႁႅင်းသိုၵ်း ၶဝ်ႈဝၢၼ်ႈဢွၵ်ႇဝၢၼ်ႈ – သင်ႇႁႂ်ႈၵူၼ်းမိူင်းႁႅၼ်းၶဝ်ႈႁႅၼ်းၼမ်ႉ – တၢင်းၵိၼ်လႄႈ တီႈယူႇတၼ်းသဝ်းပၼ်ၶဝ် – ႁဵတ်းႁႂ်ႈၵူၼ်းမိူင်းၵိၼ်းၸႂ်တႄႉတႄႉၼႆ – ၵူၼ်းမိူင်းဝဵင်းႁူဝ်ပူင်းလၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
