တႄႇဢဝ် ဝၼ်းတီႈ 27/08/2024 ၼႆႉမႃး တပ်ႉသိုၵ်းပူတ်းပွႆႇ ၵူၼ်းမိူင်းၶႄႇ (PLA)  တႄႇၾိုၵ်းၽွၼ်ႉၵၢၼ်သိုၵ်း ၸွမ်းလႅၼ်လိၼ်တႆး – ၶႄႇသေ တေၾိုၵ်းၽွၼ်ႉႁိုင် ၶၢဝ်းတၢင်း (3) ဝၼ်း – ဝႃႈၼႆ။

ငဝ်ႈငုၼ်းၵုမ်းၵမ် တိူင်းသိုၵ်းပွတ်းၸၢၼ်း PLA (PLA တောင်ပိုင်းစစ်နယ်ဝန်းကွပ်ကဲမှုဌာနချုပ်) ပိုၼ်ၽၢဝ်ႇဝႆႉဝႃႈ – တႃႇလွင်ႈႁူမ်ႇလူမ်ႈလႄႈ တႃႇလွင်ႈၼိမ်သဝ်းၸွမ်းလႅၼ်လိၼ်ၼႆသေ ၼႂ်းပၢင်ၾိုၵ်းၽွၼ်ႉ ၵၢၼ်သိုၵ်းပွၵ်ႈၼႆႉ တေမီးပႃးတပ်ႉလိၼ်တင်း တပ်ႉၼမ်ႉ သိုၵ်းၶႄႇ ယဝ်ႉၵေႃႈ တေၸႂ်ႉမၢၵ်ႇၵွင်ႈဢၼ်တႄႉသေ ၾိုၵ်းၽွၼ်ႉၵႂႃႇ – ဝႃႈၼႆ။

ၸဝ်ႈသိုၵ်းလူင် တၢၼ်ႊၵျွၼ်ႊလီႊ (တန်ကျွန်းလီ) လၢတ်ႈပဵၼ်တၢင်းၵၢၼ် တီႈၼႂ်းသိုဝ်ႇ WeChat  ဝႃႈ – မိူဝ်ႈၽွင်းႁူပ်ႉၺႃး ငဝ်းလၢႆးၶိုၵ်ႉၶၵ်ႉၼၼ်ႉ ၼင်ႇႁိုဝ် တေၵႅတ်ႇၶႄႁႄႉၵင်ႈ ပၼ်သၢႆၸႂ် ႁိူၼ်းယေးၵူၼ်းမိူင်းလႄႈ တႃႇလွင်ႈမၼ်ႈ ၼိမ်သဝ်း ၸွမ်းလႅၼ်လိၼ်ၼၼ်ႉ တပ်ႉသိုၵ်းၶႄႇ တိုၼ်းလႆႈႁၢင်ႈႁႅၼ်းၾိုၵ်း ၽွၼ်ႉဝႆႉယူႇတႃႇသေႇ – ဝႃႈၼႆ။

လွင်ႈဢၼ် PLA တေၾိုၵ်းၽွၼ်ႉၵၢၼ်သိုၵ်း ဝၼ်းတီႈ 27 – 29 ၼႆႉ ယူႇတီႈ လူင်ပွင်ၸိုင်ႈ ၸႄႈမိူင်းယူႊၼၢၼ်ႊ မိူင်းၶႄႇ ဢၼ်လႅၼ်လိၼ်တိတ်းၸပ်းၵၼ် တၢင်းမိူင်းတႆးပွတ်းႁွင်ႇ ႁဵင်လၵ်းပၢႆၼၼ်ႉၵေႃႈ လႆႈပိုၼ်ၽၢဝ်ႇဝႆႉ ၸဵမ်မိူဝ်ႈဝၼ်းၸၼ်ပူၼ်ႉမႃးၼႆႉယဝ်ႉ – ဝႃႈၼႆ။

ၽွင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်း ၸုမ်းလုၵ်ႉၽိုၼ်ႉၶဝ် ဢွၼ်ၵၼ်တိုၵ်းတေႃး သိုၵ်းမၢၼ်ႈယူႇ ၼႂ်းမိူင်းတႆးပွတ်းႁွင်ႇၼႆႉ သိုၵ်းၶႄႇ ၸင်ႇမီးလွင်ႈၾိုၵ်းၽွၼ်ႉၵၢၼ်သိုၵ်း ၸွမ်းလႅၼ်လိၼ်မႃး။

ငဝ်ႈငုၼ်း ၵုမ်းၵမ်တိူင်းသိုၵ်းပွတ်းၸၢၼ်း PLA (PLA တောင်ပိုင်းစစ်နယ်ဝန်းကွပ်ကဲမှုဌာနချုပ်) ၼႆႉ မိူဝ်ႈလိူၼ် ဢေႊပိူဝ်ႊ ပူၼ်ႉမႃးၼၼ်ႉၵေႃႈ ယၢမ်ႈဢဝ်မၢၵ်ႇၵွင်ႈဢၼ်တႄႉသေ ၾိုၵ်းၽွၼ်ႉၵၢၼ်သိုၵ်းၸွမ်း လႅၼ်လိၼ်တႆး – ၶႄႇ မႃးယဝ်ႉၵမ်းၼိုင်ႈ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။