ၸဝ်ႈၵုၼ်ႇ – ၵူၼ်းပိုၼ်ႉတီႈ ဢွၼ်ၵၼ်မွင်းပႂ်ႉ ၾၢႆႇမိူင်းႁူမ်ႈတုမ် ပိုတ်ႇၽၵ်းတူလႅၼ်လိၼ် တီႈဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ဢၼ်လႆႈပိၵ်ႉဢိုတ်းမႃးၶၢဝ်းတၢင်းၸမ် 3 ပီ ၼၼ်ႉ ယွၼ်ႉလူဝ်ႇၵႃႉၶၢႆ သူင်ႇၶူဝ်းၵုၼ်ႇ/ ၶူဝ်းသူၼ် ၶဝ်ႈၸူးၼႂ်းမိူင်းၶႄႇ။

တႄႇဢဝ် ဝၼ်းတီႈ 8/1/2023 ၼၼ်ႉမႃး ယူႇတီႈ လူင်ပွင်ၸိုင်ႈၶႄႇ ပိုၼ်ၽၢဝ်ႇပိုတ်ႇၽၵ်းတူၸွမ်းလႅၼ်လိၼ်တႆး – ၶႄႇမႃး ပဵၼ်တၢင်းၵၢၼ်ယဝ်ႉသေတႃႉ ၵူၺ်းၵႃႈ တၢင်းၾၢႆႇမိူင်းႁူမ်ႈတုမ်တႄႉ ပႆႇပိုတ်ႇ ႁၢၼ်ႉတေႃႇထိုင်ယၢမ်းလဵဝ် ၸဝ်ႈၵုၼ်ႇ – ၸဝ်ႈ သူၼ်လႄႈ ၵူၼ်းပိုၼ်ႉတီႈ ၸွမ်းလႅၼ်လိၼ် ၸိူဝ်းၼႆႉ မွင်းပႂ်ႉႁႂ်ႈၾၢႆႇမိူင်းႁူမ်ႈတုမ် ၸဵဝ်းပိုတ်ႇပၼ် ၶၼ်ၽႂ်း ၼႆယဝ်ႉ။

ၸဝ်ႈၵုၼ်ႇၵႃႉၶၢႆ တီႈဝဵင်းၼမ်ႉၽႃႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ဢၼ်ၶဝ်ပၼ်ၵႃးလႄႈ ၵူၼ်း ႁေႃႈၵႃးၶဝ်ႈၵႂႃႇ ၼႂ်း မိူင်းၶႄႇၼၼ်ႉ ပဵၼ်ၵႃးဢွႆးမဵဝ်းလဵဝ်ၵူၺ်း။ ၵူၺ်းၵႃႈ ၵႃးတၢင်ႇၶူဝ်းၵုၼ်ႇ – ထူဝ်ႇ ၸိူဝ်းၼႆႉတႄႉ ၶဝ်ဢမ်ႇပၼ်ၵူၼ်းႁေႃႈၵႃး – ၵူၼ်းၸွမ်းၵႃးၶဝ်ႈၶႃႈ။ ၶဝ်ႁႂ်ႈၵူၼ်းမိူင်းၶႄႇ မႃးႁေႃႈၶဝ်ႈၵႂႃႇ ႁဵတ်းၼၼ် ၵူၺ်း။ သင်ဝႃႈ ၶဝ်ပိုတ်ႇသေ ပၼ်ႁဝ်းၶႃႈ ၶဝ်ႈၵႂႃႇ ၵမ်းသိုဝ်ႈတႄႉ တီႈလီ။ တေလႆႈၶဝ်ႈၵႂႃႇၶၢႆၵမ်းသိုဝ်ႈ”- ဝႃႈၼႆ။

တႄႇဢဝ် ဝၼ်းတီႈ 1/4/2020 ၼၼ်ႉမႃး ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းလႄႈ ယူႇတီႈ လူင်ပွင်ၸိုင်ႈ ၶႄႇ သင်ႇပိၵ်ႉဢိုတ်းၽၵ်းတူမိူင်းလႅၼ်လိၼ်တႆး – ၶႄႇ မႃးတင်းမူတ်း၊ ႁဵတ်းႁႂ်ႈၵၢၼ်ၵႃႉၶၢႆ တုမ်ႉတိူဝ်ႉတၢင်းၾင်ႇမိူင်းတႆး မိူင်း ႁူမ်ႈတုမ် ဢွၼ်ၵၼ်သုမ်းတင်းၼမ်လၢႆ။ ယၢမ်းလဵဝ် တၢင်းၾင်ႇမိူင်းၶႄႇ ပိုၼ်ၽၢဝ်ႇပိုတ်ႇပဵၼ်တၢင်းၵၢၼ် ယဝ်ႉသေတႃႉ ၵူၺ်းၵႃႈ တၢင်းၾၢႆႇမိူင်းႁူမ်ႈတုမ်တႄႉ ပႆႇပိုတ်ႇပၼ်ၵူၼ်းမိူင်းၶဝ်ႈဢွၵ်ႇၵႂႃႇမႃးသေတီႈ ၼႆယဝ်ႉ။

“ၶဝ်ဝႃႈတႄႉ တၢင်းၾၢႆႇမၢၼ်ႈၼႆႉ ပေႃးလိူၼ်ၼႆႉသဵင်ႈ တေႁဵတ်းပပ်ႉၶၢမ်ႈမိူင်းပၼ် ၸဝ်ႈၵႃး တၢင်ႇၶူဝ်းၵုၼ်ႇတင်းမူတ်း ႁႂ်ႈလႆႈ ၶဝ်ႈၵႂႃႇမႃးၵၼ်ၼႆဝႃႇ။ ၸွင်ႇတေပိုတ်ႇတႄႉ ဢမ်ႇပိုတ်ႇတႄႉ ဢၼ်ဝႃႈၼၼ်ႉ တေပႂ်ႉတူၺ်းတေႃႇထိုင်လိူၼ်ၼႆႉသဵင်ႈ။ ႁဝ်းၶႃႈ တႄႉ မွင်းပႂ်ႉႁႂ်ႈၶဝ်ပိုတ်ႇဢေႃႈ ယၢမ်းလဵဝ် ၵိုတ်းတၢင်းၾၢႆႇမိူင်းမၢၼ်ႈၼႆႉၵူၺ်း ပႆႇပိုတ်ႇ”- ၸဝ်ႈၵုၼ်ႇ ၵႃႉၶၢႆ သိုပ်ႇလၢတ်ႈ ၼႄ ၼင်ႇၼႆ။

သဵၼ်ႈတၢင်းၵႃႉၶၢႆ တီႈၽၵ်းတူ ဝဵင်းၼမ်ႉၽႃႈ – မိူင်းတိင် ဢၼ်ၵၢႆႇၸူးၵၼ်ၼႆႉ ၵမ်ႈၼမ် ၶူဝ်းၵုၼ်ႇ ဢၼ်လုၵ်ႉတၢင်းမိူင်းတႆး၊ မိူင်းႁူမ်ႈတုမ် တေႃႉသူင်ႇၶဝ်ႈၸူးသမ်ႉ တေပဵၼ်ဢွႆႈ၊ ၶဝ်ႈၵၢပ်ႇ၊ တႅင်၊ ထူဝ်ႇ ၸိူဝ်းၼႆႉ။

ၼွၵ်ႈလိူဝ်ၼၼ်ႉ မိူၼ်ၼင်ႇ တၢင်းၽၵ်းတူလႅၼ်လိၼ်တႆး – ၶႄႇ မၢၼ်ႈဝဵင်း၊ သျိၼ်ႊသၢၼ်ႊၵျေႃႉ၊ ႁေႃၶမ်းလူင် (သူၺ်ႇ ၼၢၼ်းတေႃႇ) ၸိူဝ်းၼႆႉ တၢင်းၾင်ႇမိူင်းၶႄႇ ပိုၼ်ၽၢဝ်ႇပိုတ်ႇၽၵ်းတူမိူင်းယဝ်ႉသေတႃႉ တၢင်းၾၢႆႇမိူင်းႁူမ်ႈတုမ်တႄႉ ႁၢၼ်ႉ တေႃႇထိုင်ယၢမ်းလဵဝ် ပႆႇပိုတ်ႇ။