ၶၢဝ်းတၢင်း သွင်ဝၼ်းမႃးၼႆႉ ၶၼ်ငိုၼ်းမၢၼ်ႈ ၶိုၼ်ႈၶိုၼ်း

သွင်ဝၼ်းထပ်းၵၼ်မႃးၼႆႉ ၶၼ်ငိုၼ်းမၢၼ်ႈ ပုင်ႈၶိုၼ်ႈၶိုၼ်း ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 47,000 ပျႃး ငိုၼ်းထႆး 1,050 ဝၢတ်ႇ လႆႈငိုၼ်းမၢၼ်ႈ 100,000 ပျႃး ။

မိူဝ်ႈၼႆႉ ဝၼ်းတီႈ 22/8/2023 ယၢမ်းၵၢင်ၼႂ် ၶၼ်ငိုၼ်းၶႄႇ – မၢၼ်ႈ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 47,000 ပျႃး။ ယၢမ်းဝၢႆးဝၼ်းသမ်ႉ 100 ယႂၼ်ႊ လႆႈငိုၼ်းမၢၼ်ႈ 48,500 ပျႃး၊ မၢင်တီႈ 48,700 ပျႃး၊ မၢင်တီႈတိုၵ်ႉပဵၼ် 49,000 ပျႃးယူႇ ၼႆယဝ်ႉ။

ၵူၼ်းလႅၵ်ႈငိုၼ်းၶႄႇ – မၢၼ်ႈ တီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉၶၼ်ငိုၼ်းမၢၼ်ႈ တူၵ်းမႃးႁၢဝ်ႈႁႅင်း ၼႂ်း ဝူင်ႈဝၢင်ႈၼႆႉ ယွၼ်ႉပၼ်ႁႃ ၶူဝ်မျႃႉဝတီႇပိၵ်ႉဢိုတ်း ၶူဝ်းၵုၼ်ႇ ဢမ်ႇၶိုၼ်ႈမႃးၵေႃႈပိူင်ၼိုင်ႈ၊ ယွၼ်ႉၶႅပ်းမၢင် 2 မိုၼ်ႇ တေဢွၵ်ႇ မႃးၵေႃႈပိူင်ၼိုင်ႈလႄႈ လွင်ႈပၢၼ်ႇမိူင်းမၢၼ်ႈ ထုၵ်ႇပိၵ်ႉဢိုတ်း တီႈၼွၵ်ႈမိူင်း ၸိူဝ်းၼၼ်ႉၵေႃႈပႃးလႄႈ ၵွပ်ႈၼႆ ၶၼ်ငိုၼ်း မၢၼ်ႈၼႆႉ ၸင်ႇတူၵ်းႁႅင်း”- ဝႃႈၼႆ။

သိုပ်ႇလၢတ်ႈဝႃႈ – “ဝၼ်းသွင်ဝၼ်းမႃးၼႆႉ လႆႈႁူႉဝႃႈ လူင်ပွင်ၸိုင်ႈ တႂ်ႈသိုၵ်းမၢၼ်ႈၵုမ်းၵမ် ၽွတ်ႈၵေႃႇမတီႇသေ ႁူပ်ႉ ထူပ်း ၵူၼ်းႁဵတ်းၵၢၼ်ပၢႆးမၢၵ်ႈမီးလူင် ၼႂ်းမိူင်းမၢၼ်ႈ ။ ပၼ်ႁႅင်းဢီး ႁႂ်ႈၽူႈမၢၵ်ႈၵူၼ်းမီးၵုမ်းၶၼ်ငိုၼ်းတေႃႇလႃႇလႄႈ ၶၼ်ၶမ်းၸိူဝ်းၼႆႉ ယႃႇႁႂ်ႈတူင်ႉၼိုင်ႁႅင်း။ ၵွပ်ႈၼႆလႄႈ တၢင်းမူႇၸေႊၼႆႉၵေႃႈ ၶၼ်ငိုၼ်းမၢၼ်ႈ ၸင်ႇၶိုၼ်ႈမႃး ဢိတ်းၼိုင်ႈ ၼႂ်းဝၼ်းသွင်ဝၼ်းၼႆႉ”- ဝႃႈၼႆ။

တႄႇဢဝ် မိူဝ်ႈဝႃး ဝၼ်းတီႈ 21 ၼႆႉမႃး ၶၼ်ၶိုၼ်းမၢၼ်ႈ ၸင်ႇပုင်ႈၶိုၼ်ႈမႃး ယၢမ်းၵၢင်ၼႂ် ငိုၼ်းၶႄႇ 100 ယႂၼ်ႊ လႆႈငိုၼ်း မၢၼ်ႈ 50,500 ပျႃး။ ယၢမ်းဝၢႆးဝၼ်း 100 ယႂၼ်ႊ 49,500 ပျႃး။ ငိုၼ်းထႆးသမ်ႉ ယၢမ်းၵၢင်ၼႂ် 1,000 ဝၢတ်ႇ လႆႈငိုၼ်းမၢၼ်ႈ 100,000 ပျႃး။ ယၢမ်းဝၢႆးဝၼ်း 1,015 ဝၢတ်ႇ လႆႈငိုၼ်းမၢၼ်ႈ 100,000 ပျႃး ၼႆယဝ်ႉ။

ၶၼ်ငိုၼ်းထႆး လႅၵ်ႈငိုၼ်းမၢၼ်ႈ ဝၼ်းတီႈ 22/8/2023 ၼႆႉသမ်ႉ 1,030 ဝၢတ်ႇ လႆႈငိုၼ်းမၢၼ်ႈ 100,000 ပျႃး ဢူၼ်းတင်း Kpay ။ 1,050 ဝၢတ်ႇ လႆႈငိုၼ်းမၢၼ်ႈ 100,000 ပျႃး ၼႆႉတႄႉ ႁပ်ႉတူဝ်ငိုၼ်း ၵမ်းသိုဝ်ႈ ၼႆယဝ်ႉ။