မိူဝ်ႈၼႆႉ ဝၼ်းတီႈ 05/07/2024 ယၢမ်းဝၢႆးဝၼ်း 4 မူင်းပၢႆ ၶၼ်ငိုၼ်းမၢၼ်ႈ တူၵ်းႁႅင်း ၸွမ်းလႅၼ်လိၼ်တႆး – ၶႄႇ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 62,300 ပျႃးယဝ်ႉ ဝႃႈၼႆ။  

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၶၼ်ငိုၼ်းမၢၼ်ႈတူၵ်းႁႅင်းၼႃႇ မိူဝ်ႈယၢမ်းၵၢင်ၼႂ် ၼၼ်ႉ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 65,500 ပျႃး။ ထိုင်မႃး ယၢမ်းဝၢႆးဝၼ်းမွၵ်ႈ 4 မူင်းပၢႆ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 62,300 ပျႃးၶႃႈ။ ၵမ်းၼႆႉ ပေႃးဢဝ်ငိုၼ်းမၢၼ်ႈ လႅၵ်ႈငိုၼ်းၶႄႇသမ်ႉ ငိုၼ်းမၢၼ်ႈ 64,516 ပျႃး ၸင်ႇလႆႈငိုၼ်းၶႄႇ 100 ယႂၼ်ႊ။ ၵူၺ်းၵႃႈ ၶၼ်ငိုၼ်းတႄႉ မီးလွင်ႈလႅၵ်ႈလၢႆႈၸွမ်းၵူႈၶၢဝ်းၶႃႈ”- ဝႃႈၼႆ။

လိူဝ်ၼၼ်ႉ ၶၼ်ငိုၼ်းထႆး – မၢၼ်ႈၵေႃႈ မိူၼ်ၵၼ် ငိုၼ်းထႆး 845 ဝၢတ်ႇ လႆႈငိုၼ်းမၢၼ်ႈ 100,000 ပျႃး ။ ပေႃးဢဝ်ငိုၼ်းမၢၼ်ႈ လႅၵ်ႈငိုၼ်းထႆးသမ်ႉ ငိုၼ်းမၢၼ်ႈ 100,000 ပျႃး လႆႈငိုၼ်းထႆး 790 ဝၢတ်ႇ ဝႃႈၼႆ။

ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ၶၢဝ်းတၢင်း 3 ပီပၢႆၼႆႉ ႁဵတ်းႁႂ်ႈၶၼ်ငိုၼ်းမၢၼ်ႈ တူၵ်းႁႅင်း ႁၢၼ်ႉတေႃႇထိုင်ယၢမ်းလဵဝ်။ ယဝ်ႉၵေႃႈ ၸဵမ်ၶၼ်ၵုၼ်ႇ၊ ၶၼ်ၶမ်း၊ ၶၼ်ၵူႈၸိူဝ်ႉၵူႈလွင်ႈ ၸိူဝ်းၼႆႉၵေႃႈ ပုင်ႈၶိုၼ်ႈထႅင်ႈ ၼႆယဝ်ႉ။