ၾင်ႇမိူင်းၶႄႇ ဢဝ်ၵႃးၵၢပ်ႇလဵၵ်း မႃးပၼ်ႇဢဝ်ႁူမ်ႇလူမ်ႈ ၸွမ်းလႅၼ်လိၼ်တႆး – ၶႄႇ

မိူဝ်ႈၼႆႉ ဝၼ်းတီႈ 26/08/2024 ယၢမ်းၵၢင်ၼႂ် ၾင်ႇမိူင်းၶႄႇ တူင်ႉၼိုင်ၵၢၼ်သိုၵ်း ဢဝ်ႁႅင်းသိုၵ်း ၵႃးၵၢပ်ႇလဵၵ်း ဢမ်ႇယွမ်း 6 လမ်း မႃးပၼ်ႇလဵပ်ႈထိုင် တီႈၽၵ်းတူလူင် ၸေႊၵဝ်ႇ – မူႇၸေႊ လႅၼ်လိၼ်တႆး – ၶႄႇသေ ႁဵတ်းႁႂ်ႈၵူၼ်းပိုၼ်ႉတီႈ တင်းသွင်ၾင်ႇ မႆႈၸႂ်ၵူဝ်ပဵၼ်ပၢင်တိုၵ်း။  

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၾင်ႇမိူင်းၶႄႇ ဢဝ်ႁႅင်းသိုၵ်း ဢဝ်ၵႃးၵၢပ်ႇလဵၵ်း မႃးလဵပ်ႈပၼ်ႇၸွမ်းလႅၼ်လိၼ် ၽႅဝ်တီႈၽၵ်းတူလူင် ၸေႊၵဝ်ႇ – မူႇၸေႊၼၼ်ႉဢေႃႈ။ သိုၵ်းၶၢင် KIA ၵေႃႈ ဢွၵ်ႇမႃးထႅင်ႈ တီႈဝၢၼ်ႈၼွင်သႅင် ၼႂ်းၵႄႈၼမ်ႉၶမ်း – မူႇၸေႊ ပဵၼ်ဢၼ်လၢၵ်ႇလၢႆးဝႆႉ။ ထႅင်ႈၾၢႆႇၼိုင်ႈ မီးၶၢဝ်ႇလိုဝ်းၵၼ် ဢွၵ်ႇမႃးဝႃႈ ဝၼ်းတီႈ 28 ၼႆႉ ၸုမ်းဢူၺ်းလီပွတ်းႁွင်ႇၶဝ် တေၶဝ်ႈ လူမ်ႇယိုဝ်း ဝဵင်းမူႇၸေႊၼႆဢေႃႈ။ လွင်ႈၼႆႉတႄႉ ႁဝ်းၶႃႈ ပႆႇယိုၼ်ယၼ်။ ယူဝ်ၶႄးၶၢဝ်ႇၼႆႉသေ သိုၵ်းၶႄႇ ၶဝ် မႃးဢဝ်ႁူမ်ႇလူမ်ႈၸွမ်းလႅၼ်လိၼ်ၼႆႁိုဝ် ဢမ်ႇႁူႉ”- ဝႃႈ ၼႆ။

ထႅင်ႈၾၢႆႇၼိုင်ႈ ၼႂ်းဝူင်ႈဝၢင်ႈၼႆႉ တၢင်းၾင်ႇမိူင်းၶႄႇ ဢဝ်ၶိူင်ႈမိၼ်မႅင်းမီႈ မႃးပၼ်ႇလဵပ်ႈ ၸွမ်းလႅၼ်လိၼ် တႆး – ၶႄႇ တၢင်းၾင်ႇမိူင်းမၢဝ်း – ၸေႊၵဝ်ႇၼၼ်ႉ ၼိုင်ႈဝၼ်းလၢႆ မႃးပၼ်ႇလဵပ်ႈ 2-3 လမ်း မၢင်ဝၼ်း မႃးပၼ်ႇလဵပ်ႈ 1 လမ်း ဝႃႈ ၼႆ။

ယဝ်ႉၵေႃႈ ၼႂ်းၵႄႈၼွင်တဝ်းတင်း မိူင်းမၢဝ်းၼၼ်ႉ ယူႇတီႈ တပ်ႉသိုၵ်းၶႄႇၶဝ် ၾိုၵ်းၵၢၼ်သိုၵ်းဝႆႉ ၼၼ်ႉ ၵေႃႈ ၸႂ်ႉၶိူင်ႈမိၼ် ၵႃးၵၢပ်ႇလဵၵ်း ႁႅင်းသိုၵ်း တင်းၼမ် ၼႆယဝ်ႉ။