ၼမ်ႉတဵင်း ၼွင်းထူမ်ႈၼႂ်းဝဵင်းလၢင်းၶိူဝ်း ႁၢဝ်ႈႁႅင်း လုပ်ႇထူမ်ႈပႃး တူင်ႈၼႃးၵူၼ်းမိူင်း ဢမ်ႇယွမ်း 2,000 ဢေႊၶိူဝ်ႊ – ၵူၼ်းပိုၼ်ႉတီႈလၢတ်ႈ။

တႄႇဢဝ် ဝၼ်းတီႈ 24/08/2024 ၼၼ်ႉမႃး ၼမ်ႉတဵင်း လူၼ်ႉၾင်ႇၼွင်းထူမ်ႈ တၢင်းဝၢၼ်ႈမၢၵ်ႇဢုၼ်လဝ်း၊ ဝၢၼ်ႈၶုမ်ဢုတ်ႇ၊ ဝၢၼ်ႈၼႃးၵူင်း၊ ဝၢၼ်ႈၼမ်ႉဢုၼ်ႇ မိူဝ်ႈၼႆႉ ဝၼ်းတီႈ 26 ယၢမ်းၵၢင်ၼႂ်ၸဝ်ႉ ၼွင်းထူမ်ႈထႅင်ႈ တၢင်းဝၢၼ်ႈမၢၵ်ႇပိၼ်း၊ ဝၢၼ်ႈလူင်ပွၵ်ႉဢွၵ်ႇလႄႈ ပွၵ်ႉၵၢတ်ႇ ၼႂ်းဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း ၸိူဝ်းၼႆႉထႅင်ႈ ႁၢဝ်ႈႁႅင်း။

ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၾူၼ်တူၵ်းတၢင်းႁူဝ်ၼမ်ႉတဵင်းသေ လႆၼွင်းထူမ်ႈ။ ယွၼ်ႉဝႃႈ ၼမ်ႉတဵင်းၼႆႉ လႆလူင်းၶဝ်ႈၸူးၼမ်ႉၶူင်း တီႈတႃႈသူပ်းတဵင်းၼၼ်ႉ သင်ဝႃႈ ၼမ်ႉၶူင်းၶိုၼ်ႈၵေႃႈ ၼမ်ႉတဵင်းဢၼ်လႆၶဝ်ႈၼႆႉ ဢမ်ႇၸၢင်ႈလႆၶဝ်ႈသေ ႁဵတ်းႁႂ်ႈၼမ်ႉၼႆႉ ၸင်ႇယိုင်ႈၶိုၼ်ႈလူၼ်ႉၾင်ႇၶႃႈယဝ်ႉ။ ထႅင်ႈလွင်ႈၼိုင်ႈ တီႈၾၢႆၾႆးၾႃႉ ၵဵင်းတွင်းၼၼ်ႉ တီႈၼၼ်ႈၵေႃႈ ပေႃးဝႃႈၼမ်ႉၼမ်ၼႆ ၶဝ်ၵိုင်ႉၵၢင်ႉပွႆႇၼမ်ႉလူင်းလႄႈ ၼမ်ႉၾၢႆ ၼၼ်ႉ လူင်းသႂ်ႇထႅင်ႈၵေႃႈပိူင်ၼိုင်ႈ ၵွပ်ႈၼႆလႄႈ ၼမ်ႉၸင်ႇယိုင်ႈၶိုၼ်းဝႆး။ တီႈလၢင်းၶိူဝ်းၼႆႉ ၾူၼ်ဢမ်ႇတူၵ်းႁႅင်း ၶႃႈ”- ဝႃႈၼႆ။

ယွၼ်ႉၼမ်ႉထူမ်ႈၼႆႉသေ မိူၼ်ၼင်ႇ ၵူၼ်းမိူင်း ၸိူဝ်းယူႇတၢင်းၾၢႆႇတႂ်ႈ ဝဵင်းလၢင်းၶိူဝ်း ၸိူဝ်းၼၼ်ႉ ၵမ်ႈၼမ် လႆႈၽၢႆး ႁိူဝ်းၵႂႃႇမႃးဢဝ် ဝႃႈၼႆ။  

“ယၢမ်းလဵဝ် ပွၵ်ႉတီႈဢၼ်ၼမ်ႉထူမ်ႈႁႅင်းတႄႉ ပဵၼ်တီႈပွၵ်ႉၵၢတ်ႇ လင်ႁိူၼ်းဢမ်ႇယွမ်း 20 ယဝ်ႉ။ ယဝ်ႉၵေႃႈ ၸွမ်းသၢပ်ႇဝဵင်းထႅင်ႈ။ ဢၼ်လိူဝ်ႁႅင်းတႄႉ တၢင်းၾၢႆႇတႂ်ႈဝဵင်းၼၼ်ႉဢေႃႈ ၼၼ်ႉတႄႉ ထူမ်ႈမႃးမီးလၢႆဝၼ်းယဝ်ႉ ၵူၼ်းဝၢၼ်ႈၶဝ် ပေႃးလႆႈၽၢႆးႁိူဝ်းၶဝ်ႈဢွၵ်ႇၵႂႃႇမႃးဢဝ်ဢေႃႈ တၢင်းပွတ်းၼႃးၵူင်းၼၼ်ႉၶႃႈ”- ၵူၼ်းပိုၼ်ႉတီႈ ဝဵင်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တူင်ႈၼႃး ဢၼ်ၺႃးၼမ်ႉထူမ်ႈႁႅင်းၼၼ်ႉ ပဵၼ်ၾၢႆႇတႂ်ႈဝဵင်းလၢင်းၶိူဝ်း လွင်ႈလူႉသုမ်းတႄႉ ဢမ်ႇယွမ်း 2,000 ဢေႊၶိူဝ်ႊ ဝႃႈၼႆ။

ၽူႈတူင်ႉၼိုင် တူင်ႇဝူင်းၵူၼ်း ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “တူင်ႈၼႃး ဢၼ်ၺႃးၼမ်ႉထူမ်ႈ ၼမ်ၼႆႉ ပဵၼ်တၢင်းပွတ်းတႂ်ႈလၢင်းၶိူဝ်း တၢင်းဝၢၼ်ႈမၢၵ်ႇဢုၼ်လဝ်း၊ ဝၢၼ်ႈၶုမ်ဢုတ်ႇ၊ ဝၢၼ်ႈၼႃးၵူင်း တၢင်းသၢႆၼၼ်ႉ တူင်ႈ ၼႃးမီး ဢမ်ႇယွမ်း 5,000 ဢေႊၶိူဝ်ႊ။ ယၢမ်းလဵဝ် ဢၼ်ၺႃးၼမ်ႉ လုပ်ႇထူမ်ႈတႄႉ ဢမ်ႇယွမ်း 2,000 ဢေႊၶိူဝ်ႊ။ သင်ဝႃႈ ၼမ်ႉၼႆႉ ယိုင်ႈၼွင်းယူႇၸိူင်ႉၼႆတႄႉ တူင်ႈၼႃးၼၼ်ႉ လူႉသုမ်းဢမ်ႇႁၢၼ်ႉယဝ်ႉ။ ယွၼ်ႉဝႃႈ ၸဝ်ႈၼႃး မၢင်ၸိူဝ်း တိုၵ်ႉၽုၵ်ႇၶဝ်ႈ၊ မၢင်ၸိူဝ်း တိုၵ်ႉထူၺ်ႈၵႃႈ ပႆႇလႆႈသွမ်ႈ ၸိူဝ်းၼႆႉၵေႃႈ မီးၼမ်လႄႈ လွင်ႈလူႉသုမ်းတႄႉ တေမီးၼမ် ဢေႃႈ။ တႃႇၸဝ်ႈၼႃးတႄႉ လႆႈဢွၼ်ၵၼ်မႆႈ ၸႂ်ႁႅင်းဢေႃႈ”- ဝႃႈၼႆ။

ၼမ်ႉတဵင်းၼႆႉ ၵႆႉလူၼ်ႉၾင်ႇ ၼွင်းထူမ်ႈ ဝဵင်းလၢင်းၶိူဝ်းမႃးယူႇၵူႈပီ ဝႃႈၼႆသေတႃႉ ဢၼ်လုပ်ႇထူမ်ႈႁႅင်းတႄႉ မိူဝ်ႈပီ 2022 ၼၼ်ႉ ၵမ်းၼိုင်ႈ။ မိူဝ်ႈပီ 2004 လိူၼ်သႅပ်ႊထႅမ်ႊပိူဝ်ႊ ၼၼ်ႉၵေႃႈ လုပ်ႇထူမ်ႈႁႅင်း ၶိုၼ်ႈထိုင် 18 ထတ်း/ ပေႇ။ ၵွပ်ႈၼႆလႄႈ ၵူၼ်းမိူင်းလၢင်းၶိူဝ်းတႄႉ ဢွၼ်ၵၼ်မႆႈၸႂ်ဝႆႉ ၵူဝ်လုပ်ႇထူမ်ႈႁႅင်း မိူၼ်မိူဝ်ႈ ၵူႈပီပူၼ်ႉမႃးၼၼ်ႉ ဝႃႈၼႆ။

ၽွင်းၶၢဝ်းၾူၼ် ၵၢင်လိူၼ်ၼႆႉ ၼမ်ႉႁူၺ်ႈၼမ်ႉလွႆ လုပ်ႇထူမ်ႈတူင်ႈႁႆႈၼႃး ၵူၼ်းမိူင်းၼၢႆး ဢမ်ႇယွမ်း 7,000 ဢေႊၶိူဝ်ႊ ယဝ်ႉၵေႃႈ ႁိူၼ်းယေးၵူၼ်းမိူင်းထႅင်ႈ မိူၼ်ၼင်ႇ – ဝၢၼ်ႈသၢႆးၽေႇ၊ ဝၢၼ်ႈၼႃးၶၢၼ်၊ ပွၵ်ႉၼွင်ၵႅဝ်း၊ ပွၵ်ႉၼႃးႁွင်ႇ၊ ပွၵ်ႉပေႃႈမိူင်း ၸိူဝ်းၼႆႉ။

လိူဝ်ၼၼ်ႉ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ၼၼ်ႉၵေႃႈ ၼမ်ႉသၢႆ လူၼ်ႉၾင်ႇၼွင်းထူမ်ႈ ၼႂ်းဝဵင်းႁၢဝ်ႈႁႅင်း တႄႇဢဝ် လိူၼ်ၵျူႊလၢႆႊမႃး တေႃႇထိုင် လိူၼ်ဢေႃႊၵတ်ႊသ်ၼႆႉ ၼမ်ႉၼွင်းထူမ်ႈ ဢမ်ႇယွမ်း 5 ပွၵ်ႈယဝ်ႉ။