ၼႂ်းဝၼ်းတီႈ 20/08/2024 သိုၵ်းမၢၼ်ႈ ႁွတ်ႈထိုင်မႃး တီႈဝတ်ႉၵျွင်းပၢင်ႇၽႅတ်ႈ ၸႄႈဝဵင်းလွၵ်ႉၸွၵ်ႇသေ လဝ်ႈလၢတ်ႈတီႈ ၸဝ်ႈတူၼ်ၶူးၼင်ႈၵျွင်း တႃႇမႃးယွၼ်းၶႂၢင်ႉၾိုၵ်းၵၢၼ်သိုၵ်း ၼႂ်းဝၢင်းၵျွင်းမုၼ်ၸဝ်ႈ ဝႃႈၼႆ။

ၵူၼ်းဝၢၼ်ႈ လၢတ်ႈဝႃႈ – “သိုၵ်းမၢၼ်ႈ ၶဝ်ႈမႃးၼႂ်းၵျွင်းပၢင်ႇၽႅတ်ႈသေ မႃးယွၼ်ႉၶႂၢင်ႉတီႈၸဝ်ႈသြႃႇ ႁဝ်းၶႂ်ႈပိုတ်ႇပၢင်သွၼ် ၵၢၼ်သိုၵ်းၼႆၶႃႈဝႃႇ။ ၸဝ်ႈသြႃႇလႄႈတၵ်ႉၵႃႇ ဢမ်ႇပၼ်ၶႂၢင်ႉလႄႈ ၶဝ်ၶိုၼ်းၵႂႃႇ တၢင်းဝၢၼ်ႈသပ်ႉပေႇပုၼ်ႉထႅင်ႈၶႃႈဢေႃႈ” – ဝႃႈၼႆ။

ယၢမ်းလဵဝ် ပဵၼ်ၽွင်းသိုၵ်းမၢၼ်ႈ ဢဝ်ပၵ်းပိူင်မၢႆမီႈ 2008 သေ ၵဵပ်းသိုၵ်းၵူၼ်းမိူင်း ပဵၼ်တၢင်းၵၢၼ်။ ၵူၼ်းမိူင်း ဢမ်ႇ ၶႂ်ႈၶဝ်ႈသိုၵ်းမၢၼ်ႈသေ ဢွၼ်ၵၼ်ပၢႆႈ။ ၾၢႆႇၼိုင်ႈ ၸုမ်းယိပ်းၵွင်ႈၵၢင်ႇ ၸိူဝ်းလုၵ်ႉ ၽိုၼ်ႉသိုၵ်းမၢၼ်ႈၵေႃႈ ၸွမ်းႁႄႉႁၢမ်ႈ ပိုတ်းယိုဝ်းသိုၵ်းမၢၼ်ႈယူႇပတ်းပိုၼ်ႉ ၸိုင်ႈမိူင်း။

လိူဝ်ၼၼ်ႉ သိုၵ်းမၢၼ်ႈၵေႃႈ ထႅမ်ႁႅင်းသိုၵ်း ၶိုၼ်ႈၵႂႃႇတၢင်း ဝဵင်းလွၵ်ႉၸွၵ်ႇထႅင်ႈ တင်းၼမ်။

“သိုၵ်းမၢၼ်ႈ ထႅမ်ႁႅင်းသိုၵ်း မႃးတူင်ႉၼိုင်ယူႇ ၾၢႆႇလင်ၵျွင်းမုၼ်ၸဝ်ႈ ဝၢၼ်ႈပၢင်ႇၽႅတ်ႈ။ ၵူၺ်းၵႃႈ သဵင်ၵွင်ႈဢမ်ႇတႅၵ်ႇ။ ၵူၼ်းမိူင်းတႄႉၵေႃႈ ဢွၼ်ၵၼ် ႁၢင်ႈႁႅၼ်းၶူဝ်း ဝႆႉယဝ်ႉၶႃႈ။ ပေႃးပဵၼ်ပၢင်တိုၵ်းမႃးၵေႃႈ ႁႂ်ႈၸၢင်ႈပၢႆႈလႆႈၵမ်းလဵဝ်” – ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

ၼႂ်းၸႄႈဝဵင်းလွၵ်ႉၸွၵ်ႇၼႆႉ မီးသိုၵ်း SSPP/SSA လႄႈ  RCSS/SSA တူင်ႉၼိုင်ၵႂႃႇမႃးဝႆႉ။ သိုၵ်းတင်း သွင်ၾၢႆႇၼႆႉ ၵေႃႈ ၵႆႉပိုတ်းယိုဝ်း ႁၢင်ႈမၢၵ်ႇတေႃႇၵၼ် ၸဵမ်ၸိူဝ်းၼႆႉပႃး ဝႃႈၼႆ။

မိူဝ်ႈဝၼ်းတီႈ 08/08/2024 ၵေႃႈ သိုၵ်းမၢၼ်ႈတင်း ၸုမ်းပူတ်းပွႆႇၸိူဝ်ႉၸၢတ်ႈထၼု DPLA/ DPLF  ပဵၼ်ပၢင်တိုၵ်း ၵၼ်ႁိမ်းဝၢၼ်ႈၵျွၵ်ႉၵူႇသေ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ်သိုၵ်း မႃးပွႆႇမၢၵ်ႇယူႇ – ၵူၼ်း ဝၢၼ်ႈလၢတ်ႈၼင်ႇၼႆ။

တႅမ်ႈ – Eugene (ၽူႈသိုဝ်ႇၶၢဝ်ႇၾိုၵ်းၵၢၼ်)