ၼႂ်းဝူင်ႈၼႆႉ ၶၼ်ငိုၼ်းမၢၼ်ႈ တူၵ်းႁႅင်းသုတ်း ၼိုင်ႈတေႃႊလႃႊထိုင် 5,800 ပျႃး ၊ ၼိုင်ႈယႂၼ်ႊ ထိုင် 800 ပျႃးလႄႈ ၼိုင်ႈဝၢတ်ႇ ထိုင် 200 ပျႃး ၶၼ်ၶမ်းၼိုင်ႈၵျၢပ်ႈမီးထိုင် 75 သႅၼ်ပျႃး။
ၼႂ်းဝၼ်းတီႈ 16/08/2024 ၼႆႉတႄႉ ၶၼ်ငိုၼ်းမၢၼ်ႈ ၶိုၼ်းၶိုၼ်ႈမႃး ဢိတ်းၼိုင်ႈ – 1 ဝၢတ်ႇ 156 ပျႃး၊ 1 တေႃႊလႃႊ 5,700 ပျႃး 1 ယႂၼ်ႊ 680 ပျႃးလႄႈ ၶမ်းၼိုင်ႈၵျၢပ်ႈ 70 သႅၼ်ပၢႆ 5 မိုၼ်ႇပျႃး ၼႆယဝ်ႉ။
“ၵွပ်ႈၼႆလႄႈ ႁဵတ်းႁႂ်ႈၵၢၼ်ၵႃႉၶၢႆ ၵၢၼ်လႅၵ်ႈငိုၼ်း ၸွမ်းလႅၼ်လိၼ် ၵိုတ်းယင်ႉၵႂႃႇ။ ၵူၼ်းယူႇတၢင်း ၾင်ႇမိူင်းမၢၼ်ႈၼႆႉ ဢမ်ႇႁတ်းယိပ်းငိုၼ်းမၢၼ်ႈဝႆႉ ၼႂ်းမိုဝ်း။ ယူႇလႅၼ်လိၼ်ၶႄႇၵေႃႈ လႅၵ်ႈငိုၼ်းၶႄႇဝႆႉ ယူႇလႅၼ်လိၼ်ထႆးၵေႃႈ လႅၵ်ႈငိုၼ်းထႆးဝႆႉ။ ၶူဝ်းၵုၼ်ႇၵေႃႈ မီးဢၼ်ၶၢႆၵူၺ်း ဢမ်ႇၸၢင်ႈသိုဝ်ႉ မႃးထႅမ်သႂ်ႇ ၼႂ်းႁၢၼ်ႉထႅင်ႈ”- ၵူၼ်းၵႃႉတႃႈၶီႈလဵၵ်း လၢတ်ႈၼင်ႇၼႆ။
ၵူၼ်းပၵ်းတႃ ၵၢၼ်မိူင်းၶဝ်တႄႉလၢတ်ႈဝႃႈ – လႅပ်ႈပဵၼ်ယွၼ်ႉ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ဝၼ်ႊယိ မႃးႁူပ်ႉထူပ်း ၸွမ်ၸိၵ်းသိုၵ်းမၢၼ်ႈယိုတ်းမိူင်းလႄႈ ၸွမ်ၸိၵ်းသိုၵ်းမၢၼ်ႈၵေႃႉၵဝ်ႇ – ၵွၼ်ႇတေၵႂႃႇပၢင်ၵုမ် မႄႈၶူင် – လၢၼ်ႉၸၢင်ႉ တီႈမိူင်းထႆး။ မၼ်းၸၢႆး လႆႈမႃးဢုပ်ႇဢူဝ်းလွင်ႈၵၢၼ်ၵႃႉၶၢႆသွင်ၸိုင်ႈမိူင်း – တႃႇ သိုပ်ႇပဵၼ်ၵၢၼ် လွင်ႈသိူဝ်ႇသဵၼ်ႈတၢင်းမႆလၢႆႈ – ယွၼ်ႉၼၼ်လႄႈ ၶၼ်ငိုၼ်းမၢၼ်ႈ ၶိုၼ်းၶိုၼ်ႈမႃး ၶိုၼ်းဢိတ်းၼိုင်ႈ ဝႃႈၼႆ။
ဢၼ်ၶၼ်ငိုၼ်းမၢၼ်ႈ တူင်ႉၼိုင် ၶိုၼ်ႈလူင်းႁၢဝ်ႈႁႅင်းၼႆႉ ပဵၼ်ယွၼ်ႉသိုၵ်းမၢၼ်ႈ ဢိတ်ႇငိုၼ်းၸေႈမၢင် 2 မိုၼ်ႇ ဢွၵ်ႇၼမ် ၊ ယွၼ်ႉၶိုၼ်ႈငိုၼ်းလိူၼ် ပၼ်ၶႃႈႁၢပ်ႇၵၢၼ်ၶုၼ် – ၵူၼ်းၵႃႉၶၢႆတႄႉလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ