ၾူၼ်တူၵ်း ဢမ်ႇထၢတ်ႇလႄႈ ၼမ်ႉထူမ်ႈဝဵင်းတႃႈၶီႈလဵၵ်း ႁၢႆႉႁႅင်းလိူဝ်ၵဝ်ႇ

ဝၼ်းတီႈ 17/08/2024  ၾူၼ်တူၵ်းထႅင်ႈႁႃႇယႂ်ႇလႄႈ ၼမ်ႉၶိုၼ်းထူမ်ႈၼႂ်း ၵၢတ်ႇတႃႈလေႃႉ  ပွၵ်ႉမၢၵ်ႇၵႃႇ ႁူဝ်ၶမ်း  ဝဵင်းတႃႈၶီႈလဵၵ်း ။

ၼမ်ႉၼႆႉ ထူမ်ႈၼႂ်းဝဵင်းတႃႈၶီႈလဵၵ်းမႃးၶၢဝ်းတၢင်း 3 ဝၼ်းယဝ်ႉ။ မိူဝ်ႈဝႃး ဝၼ်းတီႈ 16 ၼမ်ႉယွမ်းလူင်းၵႂႃႇယဝ်ႉသေတႃႉ ၵၢင်ၶိုၼ်းမႃးတူၵ်းတင်းၶိုၼ်းတေႃႇထိုင်ၼႂ်ၼႆႉ တူၵ်းမႃးႁႃႇယႂ်ႇ ၊ ႁဵတ်းႁႂ်ႈၼမ်ႉၶိုၼ်းထူမ်ႈၵၢင်ဝဵင်း။   

ၵဵဝ်ႇလူၺ်ႈလွင်ႈၼႆႉၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈၶႃႈဢေႃႈ ၶမ်ႈဝႃးလႄႈၼႂ်ၼႆႉ ၾူၼ်တူၵ်းႁႅင်း ၊ ၵၢင်ဝၼ်းၼႆႉယင်းပႆႇႁိူတ်ႇ။ မိူဝ်ႈၼႆႉၸွမ်းပွၵ်ႉသၼ်သၢႆး တႃႈလေႃႉ မၢၵ်ႇၵႃႇႁူဝ်ၶမ်းၸိူဝ်းၼႆႉ ၼမ်ႉယိုင်ႈၶိုၼ်းယဝ်ႉၶႃႈ။   မိူဝ်ႈဝႃးမၢင်တီႈၼမ်ႉယွမ်း/ႁႅင်ႈၵႂႃႇယဝ်ႉ။ ၵူၼ်းၼႂ်းပွၵ်ႉပေႃးဢွၼ်ၵၼ်လၢင်ႉၽဵဝ်ႈၶီႈၵူမ်ႇမူတ်းယဝ်ႉ။    မိူဝ်ႈၼႆႉၶိုၼ်းယိုင်ႈၶိုၼ်ႈမႃးၶိုၼ်း  မွၵ်ႈ 2-3 ထတ်းၼႆႉဢေႃႈ ” – ဝႃႈၼႆ။

ၼႂ်းၸႄႈဝဵင်းတႃႈၶီႈလဵၵ်းၼႆႉ ၼႂ်းပီ 2024 ၼႆႉၵူၺ်း  ၼမ်ႉထူမ်ႈႁႅင်း  2 ပွၵ်ႈယဝ်ႉ။ ပွၵ်ႈၵမ်းသွင်ၼႆႉလႆႈဝႃႈ ထူမ်ႈႁိုင် လႄႈသုင်လိူဝ်ပွၵ်ႈၵမ်းၼိုင်ႈ ႁဵတ်းႁႂ်ႈၵူၼ်းမိူင်းၸိူဝ်းယူႇတီႈတႅမ်ႇတီႈယၢၼ်း   ထူပ်းတၢင်းယၢပ်ႇ တႃႇႁႃ ၵိၼ်လဵင်ႉတွင်ႉ ။

“ၼမ်ႉထူမ်ႈပွၵ်ႈၼႆႉလႆႈဝႃႈႁိုင်တေႉၶႃႈဢေႃႈ။  ၸဝ်ႈႁၢၼ်ႉၶၢႆၶူဝ်းၵေႃႈ ဢမ်ႇၸၢင်ႈပိုတ်ႇႁၢၼ်ႉ၊ ၵူၼ်းၶၢတ်ႈႁွင်ႈယူႇတီႈတႅမ်ႇၸိူဝ်းၼၼ်ႉၵေႃႈ လႆႈဢွၼ်ၵၼ်ၶၢႆႉၶူဝ်းပၢႆႈ ။ ဢမ်ႇၸၢင်ႈၵႂႃႇႁဵတ်းၵၢၼ်။  ပီၼႆႉတေႉလႆႈဝႃႈယၢပ်ႇလိူဝ် ၵူႈပီယဝ်ႉၶႃႈ။ ပေႃးပဵၼ်လႆႈတေႉၶႂ်ႈႁႂ်ႈပလိၵ်ႈၽူႈမီးပုၼ်ႈၽွၼ်းၶဝ် ၵႄႈလိတ်ႈပၼ် ပၼ်ႁႃလွင်ႈၼမ်ႉထူမ်ႈၼႆႉၶႃႈဢေႃႈ ” –  ၵူၼ်းမိူင်း ဝဵင်းတႃႈၶီႈလဵၵ်း သိုပ်ႇလၢတ်ႈၼင်ႇၼႆ။

 တႃႇၵႄႈလိတ်ႈပၼ်ႁႃၼမ်ႉထူမ်ႈၸွမ်းလႅၼ်လိၼ်တႆးထႆးတီႈဝဵင်းတႃႈၶီႈလဵၵ်းၼႆႉ ယူႇတီႈၵေႃႇမတီႇ ဢုပ်ႇဢူဝ်းလႅၼ်လိၼ် မိူင်းမၢၼ်ႈမိူင်းထႆး ၸၼ်ႉၸေႈဝဵင်း  (TBC )  ဢုပ်ႇၵၼ် 3 လိူၼ်ၼိုင်ႈပွၵ်ႈယူႇၼၼ်ႉ ဢုပ်ႇၵၼ်ၸွမ်းပႃးၵူႈၵမ်းယူႇသေတႃႉ  ဢမ်ႇတွၼ်ႉၵႄႈလိတ်ႈလႆႈသေပွၵ်ႈ။ ၵူၼ်းမိူင်းတိုၵ်ႉထူပ်းပၼ်ႁႃ လွင်ႈၼမ်ႉထူမ်ႈယူႇၵူႈပီ။