ၼမ်ႉမၼ်းၸိူဝ်ႉၾႆးၶၢတ်ႇ တီႈဝဵင်းယႂႃႇငၢၼ်ႇ ႁႃသိုဝ်ႉတီႈလႂ်ဢမ်ႇလႆႈ ၸဝ်ႈသူၼ်လႆႈၵိုတ်း ၵၢၼ်ၽုၵ်ႇသွမ်ႈထႆသူၼ် ဝႆႉၸူဝ်ႈၶၢဝ်း။
တႄႇလိူၼ်ဢေႃႊၵတ်ႊသ် ဝၼ်းတီႈ 11 ၼၼ်ႉမႃး ၼမ်ႉမၼ်းၸိူဝ်ႉၾႆး ႁႃသိုဝ်ႉယၢပ်ႇ ၼႂ်းၸႄႈဝဵင်းယႂႃႇငၢၼ်ႇ မိူင်းတႆးပွတ်းၸၢၼ်း တီႈပမ်ႉၼမ်ႉမၼ်းယႂ်ႇ ဢမ်ႇမီးၼမ်ႉမၼ်းၶၢႆ၊ ၵူၼ်းမိူင်း ဢမ်ႇၸၢင်ႈႁဵတ်း ၵၢၼ်ႁႃၵိၼ်လဵင်ႉတွင်ႉ – ၵၢၼ်ၽုၵ်ႇသွမ်ႈလႆႈၵိုတ်းဝႆႉ ဝႃႈၼႆ။
ၸဝ်ႈသူၼ်ၼဵင်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“တႃႇၽဵဝ်ႈယိူဝ်ႈယႃႈ သမ်ႉလႆႈၸႂ်ႉၸၢၵ်ႈတီႇ။ ယၢမ်းလဵဝ် ဢမ်ႇမီးၼမ်ႉမၼ်းၸိူဝ်ႉၾႆးလႄႈ ဢၼ်တေလႆႈၸႂ်ႉၼမ်ႉမၼ်းၸၢၵ်ႈသေ ႁဵတ်းၵၢၼ်ၼၼ်ႉ ၵႃႈလႆႈၵိုတ်းလိုဝ်ႈဝႆႉမူတ်း”- ဝႃႈ ၼႆ။
လိူဝ်ၼၼ်ႉ တႃႇၵႂႃႇသူၼ် ၵႂႃႇၼႃးၵေႃႈ ဢမ်ႇၸၢင်ႈၶီႇရူတ်ႉၵႃးၵႂႃႇ၊ လႆႈဢွၼ်ၵၼ်ပႆၵႂႃႇ ပၼ်ႇရူတ်ႉထိပ်ႇၵႂႃႇ ႁဵတ်းၵၢၼ် လႆႈၸႂ်ႉၶၢဝ်းယၢမ်းၼမ် ဝႃႈၼႆ။
ၵူၼ်းပိုၼ်ႉ တီႈဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ -“ၼမ်ႉမၼ်း 1 လိတ်ႉ ငိုၼ်းမၢၼ်ႈ 5,000 ပျႃး။ ႁႃသိုဝ်ႉ ပေႃး ၸေးၸွတ်ႇတီႈမၼ်းၵေႃႈ ႁႃသိုဝ်ႉဢမ်ႇလႆႈ။ ၵတ်းၵႃႈ ၼမ်ႉမၼ်း ဢမ်ႇသဵင်ႈၸွမ်းတၢင်းၵူၺ်း။ တေႃႈလဵဝ် ၶၼ်ၵုၼ်ႇ ၶိုၼ်ႈလႄႈ ၶႅၼ်းယၢပ်ႇၸႂ်”- ဝႃႈၼႆ ။
ၵူၼ်းမိူင်း ဝဵင်းယႂႃႇငၢၼ်ႇၼႆႉ ပိူင်လူင် ႁဵတ်းၵၢၼ်ၽုၵ်ႇသွမ်ႈ ႁႃၵိၼ်လဵင်ႉတွင်ႉ မိူၼ်ၼင်ႇ သူၼ်မၢၵ်ႇၸွၵ်း ၊ ၼဵင်ႈ ၊ ၽၵ်းၵၢတ်ႇပီ ၊ ၽၵ်းၵၢတ်ႇမွၵ်ႇ ၊ ဢႃႇလူး ။ ၸိူဝ်းၽုၵ်ႇၽၵ်းယိူဝ်ႈၼၢင်း ၶဵဝ်ၶၢဝ်းပွတ်း ႁဵတ်းၵိၼ် ႁႃလဵင်ႉတွင်ႉၵေႃႈမီး – ဝႃႈၼႆ။
ယၢမ်းလဵဝ် ဝဵင်းယႂႃႇငၢၼ်ႇ ၼမ်ႉမၼ်းၸၢၵ်ႈ ဢမ်ႇမီးၵူၺ်းဢမ်ႇၵႃး ဢမ်ႇလႆႈပႃးၾႆးၾႃႉလႄႈ လႆႈၸႂ်ယႂ်ႇ ၾႆးတဵၼ်း ၊ ၾႆးသူဝ်ႊလႃႊ ၵူၺ်းယဝ်ႉ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
