မိူဝ်ႈၼႆႉ ဝၼ်းတီႈ 15/08/2024 ယၢမ်းၵၢင်ၼႂ် 8 မူင်းထိုင် 10 မူင်း ယူႇတီႈ ၵူၼ်းပိုၼ်ႉတီႈ ႁူမ်ႈလူၺ်ႈ ၵူၼ်း ၼုမ်ႇသေ ၸတ်းပၢင်ႁႅၼ်းသွမ်းတၢင်တူဝ် လူႇတၢၼ်းယိူင်းၸူးပၼ် ၸဝ်ႈၸၢႆးလိုၼ်း ႁူဝ်ပဝ်ႈ ၼႃႈလိၼ် ၶိုၵ်ႉတွၼ်း မၢႆ 4 NDAA မိူင်းလႃး ၸတ်းႁဵတ်းတီႈၼႃႈမိုဝ်ႉၵူၼ်းၼုမ်ႇ ပွၵ်ႉ 4 ဝဵင်းပၢင်ႇသၢႆး ၸႄႈတွၼ်ႈမူႇ ၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မီးၽူႈၶဝ်ႈႁူမ်ႈ 400 ပၢႆ။
ၵူၼ်းၼုမ်ႇ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “ၵွပ်ႈပိူဝ်ႈဝႃႈ ၸဝ်ႈၸၢႆးလိုၼ်း မိူင်းလႃးၼႆႉ ပဵၼ် ၵူၼ်းၸႃႇတိ ဝဵင်းပၢင်ႇသၢႆးလႄႈ ယဝ်ႉၵေႃႈ မၼ်းၸဝ်ႈ ၸွႆႈထႅမ်မႃး တီႈဝဵင်းပၢင်ႇသၢႆးၼႆႉ ယူႇတႃႇသေႇ မိူၼ်ၼင်ႇ လွင်ႈၵေႃႇသၢင်ႈဝတ်ႉ/ ၵျွင်း၊ ၽွင်းၶူဝ်ႊဝိတ်ႉလႄႈ ဢိၵ်ႇထႅင်ႈ ၵူႈလွင်ႈလွင်ႈ ၸိူဝ်းၼႆႉ ၵွပ်ႈၼႆလႄႈ ႁဝ်းၶႃႈၵေႃႈ ဢမ်ႇလိုမ်းၵုင်ႇမုၼ် မၼ်းၸဝ်ႈသေ ၸင်ႇလႆႈၸတ်းပၢင်ႁႅၼ်းသွမ်း တၢင်တူဝ်ပၼ်ၶႃႈဢေႃႈ”- ဝႃႈၼႆ။
ပၢင်ႁႅၼ်းသွမ်း တၢင်တူဝ် ၸဝ်ႈၸၢႆးလိုၼ်း တီႈဝဵင်းပၢင်ႇသၢႆးၼႆႉ ယၢမ်းၵၢင်ၼႂ် လူႇတၢၼ်း ယိူင်းၸူး မၼ်းၸဝ်ႈ၊ ဝၢင်းၶူဝ်းမွၵ်ႇမွင်ၸႂ် တင်းမူတ်း 12 တူင်ႇ၊ ၽူႈၶဝ်ႈႁူမ်ႈ ဢွၼ်ၵၼ် ၸုၵ်းၼိမ် 1 မိၼိတ်ႉ၊ ဝၢႆးၼၼ်ႉ ပိုတ်ႇၽဵင်းၵႂၢမ်း မွင်ၸႂ် 2 ႁူဝ်၊ ၸႃႇၵ လဵင်ႉလူၽူႈၶဝ်ႈႁူမ်ႈပၢင်လူႇတၢၼ်းသေ ႁူမ်ႈၵၼ် သူင်ႇမႃႇသႃႇ ၶူဝ်း မွၵ်ႇမွင်ၸႂ် ဢွင်ႈတီႈပႃႇႁဵဝ်ႈ ဢၼ်ပီႈ ၼွင်ႉၸဝ်ႈၸၢႆးလိုၼ်းၶဝ် မီးဝႆႉႁင်းၶေႃ တီႈဝဵင်းပၢင်ႇသၢႆး ႁိမ်းဝၼ်းတဵင်ႈ (ယီႊၵွင်လီႊ) ၼႆႉ ဝႃႈၼႆ။
မိူဝ်ႈဝႃး ဝၼ်းတီႈ 14 ယၢမ်းၵၢင်ၶမ်ႈ 7 မူင်း ထိုင် 8 မူင်း ယူႇတီႈ ၵူၼ်းၼုမ်ႇ ဝဵင်းပၢင်ႇသၢႆး ႁူမ်ႈၵၼ် ၸတ်းပၢင်တႆႈတဵၼ်းယွၼ်းသူးပၼ် ၸဝ်ႈၸၢႆးလိုၼ်းလႄႈ ႁူမ်ႈၵၼ် ၼပ်ႉယမ် ၸုၵ်းတဵတ်ႇယဵၼ် တၢင်းႁိုင် 1 မိ ၼိတ်ႉ တီႈႁၢၼ်ႉၶဵင်ႇပၢင်မူၼ်ႈသိူဝ်း ဝဵင်းပၢင်ႇသၢႆး။
ၸဝ်ႈၸၢႆးလိုၼ်း ႁူဝ်ပဝ်ႈ ၼႃႈလိၼ်ၶိုၵ်ႉတွၼ်း မၢႆ 4 NDAA မိူင်းလႃးၼႆႉ သဵင်ႈၵၢမ်ႇသုတ်းမုၼ်းၵႂႃႇ မိူဝ်ႈဝၼ်းတီႈ 07/08/2024 ယၢမ်းၵၢင်ၶမ်ႈ ယွၼ်ႉတၢင်းပဵၼ်ၶႅၼ်ႊသိူဝ်ႊ ၽွင်းဢႃယု 76 ပီ ၽွင်းၵႂႃႇယူတ်းယႃ တူဝ် တီႈႁူင်းယႃ ၾင်ႇမိူင်းၶႄႇ။ ဝၼ်းတီႈ 9 ပူၼ်ႉမႃးၼႆႉ ၸင်ႇဢဝ်ၶၢပ်ႈတူဝ် မၼ်းၸဝ်ႈ မႃးဝႆႉတီႈဝဵင်းမိူင်းလႃးၼႆႉသေ ၸတ်းပၢင်ၸႃႇပၼပၼ် ဝႃႈၼႆ။
ပေႃးထိုင် ဝၼ်းတီႈ 23/08/2024 ၼႆႉ တေယူႇတီႈ ၵူၼ်းမုင်ႉႁေႃႁိူၼ်းလႄႈ လုၵ်ႈၼွင်ႉပွင်ႈပၢႆ ၸဝ်ႈၸၢႆးလိုၼ်း ႁူမ်ႈတင်း ၵူႈမူႇၵူႈၸုမ်း ၼႂ်းမိူင်းလႃးသေ တေႁူမ်ႈၵၼ်သူင်ႇသင်ႇ ပူၼ်ႉၶၢပ်ႈတူဝ်မၼ်းၸဝ်ႈၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ