သင်ၶၸဝ်ႈ ဝဵင်းပၢင်ႇသၢႆး ၸတ်းပၢင်မၢႆတွင်း 25 ပီတဵမ် (ပီၵွၼ်းငိုၼ်း) တီႈလႆႈပိုတ်ႇတိူၵ်ႈသွၼ်လိၵ်ႈ ဝိႁၢရ်ႇ သွၼ်ထမ်းပရိယၢတ်ႈ ဝတ်ႉဢွင်ႇမင်ႇၵလႃႇမႃး ဝႃႈၼႆ။

တႄႇဢဝ် ဝၼ်းတီႈ 1-5/7/2024 ၶၢဝ်းတၢင်း 5 ဝၼ်းမႃးၼႆႉ ယူႇတီႈ သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ်သေ ၸတ်းပၢင်ပူႇၸေႃႇလွတ်ႈႁေႃးထမ်း (ပထၢၼ်း) ပွၵ်ႈၵမ်း 37 လႄႈ ၶၢဝ်းတၢင်း ပိုတ်ႇတိူၵ်ႈသွၼ်လိၵ်ႈမႃး ၶွပ်ႈတဵမ် 25 ပီသေ ၸင်ႇလႆႈၸတ်းပႃး ပၢင်မၢႆတွင်း ပီၵွၼ်းငိုၼ်း တီႈတိူၵ်ႈ သွၼ်လိၵ်ႈဝိႁၢၼ်ႇသွၼ်ထမ်း ပရိယၢတ်ႈ ဝတ်ႉဢွင်ႇမင်ႇၵလႃႇ ဝဵင်းပၢင်ႇသၢႆး ၸႄႈဝဵင်းမူႇၸေႊ လႅၼ်လိၼ်တႆး – ၶႄႇ။

သင်ၶၸဝ်ႈ ဝဵင်းပၢင်ႇသၢႆး တူၼ်ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်း ဝၢၼ်ႈမိူင်းသုၵ်ႉ ၸိူင်ႉၼႆသေ ပေႃးဢမ်ႇၸတ်းၵေႃႈ သမ်ႉတေဢမ်ႇယဝ်ႉလႄႈ ၸင်ႇလႆႈၸတ်းႁဵတ်းတီႈၵႅပ်ႈမၼ်းဢဝ်။ ၶႂ်ႈႁႂ်ႈၸဝ်ႈတႃႇၼ တီႈၸမ်ၵႆ ဢၼ်ယၢမ်ႈလူႇတၢၼ်းမႃး တႃႇသၢင်ႈဝတ်ႉဝႃးလႄႈသင် ဢၼ်ၵမ်ႉၸွႆႈဝႆႉၵူႈ လွင်ႈလွင်ႈ ၸိူဝ်းၼၼ်ႉ လႆႈႁူႉလႆႈငိၼ်းၵၼ်။ ၵူၺ်းၵႃႈ လႅင်းၾူၼ်း လႅင်းဢိၼ်ႊထိူဝ်ႊၼႅတ်ႊ ဢမ်ႇလီလႄႈ ဢမ်ႇၸၢင်ႈႁဵတ်းႁိုဝ် ပွင်ႇၶၢဝ်ႇပၼ်ၵၼ် လွင်ႈပၢင်ၵႅဝ်ႈ ၼႆႉ”- ဝႃႈၼႆ။

ၼႂ်းပၢင်လူႇတၢၼ်းၼႆႉ မိူၼ်ၼင်ႇ ၸတ်းပီၵွၼ်းငိုၼ်း တိူၵ်ႈသွၼ်လိၵ်ႈဝတ်ႉဢွင်ႇမင်ႇၵလႃႇ ၶွပ်ႈတဵမ် 25 ပီ ၊ ပၢင်လူႇတၢၼ်း သၢင်းၵၢၼ်းၶဝ်ႈဝႃႇ ၊ ပၢင်ယွင်ႈၵုင်ႇႁူမ်ၸူမ်း ၸဝ်ႈႁပ်ႉလႆႈၸုမ်းၶူး “ဢၽိပႃလ” လႄႈ ပၢင်မွပ်ႈယိုၼ်ႈဝႂ်ဢွင်ႇပူၼ်ႉၸၼ်ႉလိၵ်ႈ လုၵ်ႈႁဵၼ်းသင်ၶၸဝ်ႈ တီႈဝဵင်းပၢင်ႇသၢႆး 69 တူၼ်၊ ယိုၼ်ႈမွပ်ႈပႃးသူးၼမ်ႉၸႂ်လႄႈ ထၢပ်ႈၵၢမ်ႇယေႃးမုၼ် ၶူးပူင်သွၼ် 8 တူၼ် ၼႆယဝ်ႉ။

လိူဝ်ၼၼ်ႉယဝ်ႉ လူႇတၢၼ်းယၢတ်ႇၼမ်ႉ တႃႇႁူင်းထမ်း ထမ်ႇမယူင်ႇ ၊ ၵျွင်းပီၵွၼ်းၶမ်း ၊ ၵျွင်းသွမ်း၊ မူၵ်ႉဢူး၊ ႁူင်း ႁဵၼ်းထမ်ႇမ၊ ႁူဝ်ႉဢုတ်ႇဝၢင်းၵျွင်း၊ ဢွင်ႈတီႈလဵင်ႉလူတႃႇၶဝ်ႈယေႃးၵီႇ ၸဵမ်ၸိူဝ်းၼႆႉ။

ပၢင်လူႇတၢၼ်းၼႆႉ မီးတၵ်ႉၵႃႇသတ်ႉထႃး မႃးၶဝ်ႈႁူမ်ႈ မိူၼ်ၼင်ႇ ၸဝ်ႈတႃႇၼ ၼႂ်းဝဵင်းပၢင်ႇသၢႆး၊ မိူင်းၶွၼ်၊ ၸေႈၾၢင်၊ မိူင်းမၢဝ်း (သူၺ်ႇလီႇ)၊ ၼမ်ႉၶမ်းလႄႈ မူႇၸေႊ ၸိူဝ်းၼႆႉ။