ႁွင်ႈၵၢၼ် ၾၢႆႇလိူမ်ႈလၢႆႇ (ၸီႇပိၼ်ႇ) တႂ်ႈသိုၵ်းမၢၼ်ႈ ယိုတ်းမိူင်း ဢွၵ်ႇလိၵ်ႈ ႁၢမ်ႈ ဢမ်ႇပၼ်ၶၢႆၵၢတ်ႇ ၵၢင်ၶမ်ႈ ႁိမ်းႁူင်း ႁဵၼ်းၸၼ်ႉသုင် မၢႆၼိုင်ႈ ၼႂ်းဝဵင်းတူၼ်ႈတီး သင်ဢမ်ႇႁဵတ်းၸွမ်း တေၺႃးဢဝ်လိူင်ႈ ဝႃႈၼႆ။
တႄႇဢဝ် ဝၼ်းတီႈ 11/08/2024 ၼႆႉၵႂႃႇ သိုၵ်းမၢၼ်ႈ ဢွၵ်ႇလိၵ်ႈႁၢမ်ႈ ဢမ်ႇပၼ်ၶၢႆၵၢတ်ႇၵၢင်ၶမ်ႈ (ညစျေး) ႁိမ်းႁူင်း ႁဵၼ်းၸၼ်ႉသုင် မၢႆၼိုင်ႈ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ယွၼ်ႉႁဵတ်းႁႂ်ႈၵူၼ်းၵႂႃႇမႃးၼမ် ရူတ်ႉၵႃးၵပ်ႉ ၽွင်းပလိၵ်ႈသိုၵ်းမၢၼ်ႈ ပၼ်ႇလဵပ်ႈဢဝ်ႁူမ်ႇလူမ်ႈ ၵူတ်ႇထတ်းယၢပ်ႇၽိုတ်ႇတႃႇၵႂႃႇမႃး သင်ဝႃႈ ဢမ်ႇႁဵတ်းၸွမ်း တိုၵ်ႉသိုပ်ႇၶၢႆယူႇၸိုင် ၸွမ်းၼင်ႇပၵ်းပိူင်မီးဝႆႉၼၼ်ႉ တေယူႇတီႈ ႁွင်ႈၵၢၼ်ၾၢႆႇလိူမ်ႈလၢႆႇသေ ဢဝ်လိူင်ႈၵႂႃႇ ဝႃႈၼႆ။
ၵူၼ်းၶၢႆၵၢတ်ႇ ၵၢင်ၶမ်ႈ လၢတ်ႈၽူႈတွႆႇႁွၵ်ႈဝႃႈ – “ပေႃးၵၢင်ၶမ်ႈမႃး ၵၢတ်ႇၼႆႉ ၵူၼ်းၵိုၼ်းၶွၼ်ႈတဵမ်တၢင်းဝႆႉလႄႈ ယွၼ်ႉဝႃႈ ပလိၵ်ႈသိုၵ်းမၢၼ်ႈၶဝ် လူဝ်ႇပၼ်ႇလဵပ်ႈဢဝ်ႁူမ်ႇလူမ်ႈဝဵင်း ပေႃးၵၢင်ၶမ်ႈ 8 မူင်းၼႆ ၶဝ်ပၼ်ႇလဵပ်ႈယဝ်ႉ ၼိုင်ႈ ၶိုၼ်းလၢႆ ၵႃးဢမ်ႇယွမ်း 5 လမ်းၶႃႈ။ ၵွပ်ႈၼႆလႄႈ ၶဝ်ၼႄၶေႃႈဢၢင်ႈၼႆႉသေ ႁၢမ်ႈၶၢႆၵၢတ်ႇၼႆႉဢေႃႈ”- ဝႃႈၼႆ။
ဝၢႆးလင် သိုၵ်းမၢၼ်ႈ ယိုတ်းမိူင်းမႃး ငဝ်းလၢႆးဝၢၼ်ႈမိူင်းဢမ်ႇၼိမ်သဝ်းသေ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇၽိုတ်ႇ၊ မၢင်ၸိူဝ်း ပိုတ်ႇႁၢၼ်ႉၶၢႆတၢင်းၵိၼ် ၼင်ႇပေႉလႆႈႁင်းၽႂ်မၼ်း။ ယၢမ်းလဵဝ် ယွၼ်ႉသိုၵ်းမၢၼ်ႈ ႁႄႉႁၢမ်ႈဢမ်ႇပၼ်ၶၢႆလွတ်ႈလႅဝ်းလႄႈ ယၢပ်ႇၽိုတ်ႇၵိၼ်းၸႂ် တႃႇႁႃၵိၼ်လဵင်ႉတွင်ႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ