ၽွင်းပၢင် တိုၵ်းႁၢဝ်ႈႁႅင်း တီႈဝဵင်းလႃႈသဵဝ်ႈၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ် ယိုဝ်းမၢၵ်ႇလူင်း ၼႂ်းဝဵင်း ၽူႈ ၵုမ်းၶွၵ်ႈသမ်ႉ ဢမ်ႇပိုတ်ႇၽၵ်းတူၶွၵ်ႈလူင်၊ ဢမ်ႇၶၢႆႉၵူၼ်းတူၵ်းၶွၵ်ႈလႄႈ ႁဵတ်းႁႂ်ႈ ၵူၼ်းၼႂ်းၶွၵ်ႈ ၺႃးၸၢၵ်ႇမၢၵ်ႇသေ လူႉတၢႆ 100 ပၢႆၼႆ – ၵူၼ်းၸိူဝ်းပူၼ်ႉလွတ်ႈဢွၵ်ႇမႃး လၢတ်ႈၼင်ႇၼႆ။
သိုၵ်းၵဝ်ႈၵၢင်ႉ MNDAA ၶဝ်ႈယိုဝ်းဝဵင်းလႃႈသဵဝ်ႈ မိူဝ်ႈဝၼ်းတီႈ 24/07/2024 ၊ ထိုင်မႃးဝၼ်းတီႈ 28/07/2024 ၽူႈၵုမ်း ၶွၵ်ႈ ၶတ်းသေႃးၽၵ်းတူၶွၵ်ႈသေ ပၢႆႈဢဝ်တူဝ်လွတ်ႈ။
ၽိူဝ်ႇသိုၵ်းမၢၼ်ႈ ယိုဝ်းမၢၵ်ႇလူင် ၵွင်ႈလူင်မႃးႁႅင်း ၵူၼ်းၶွၵ်ႈဢွၼ်ၵၼ်ပၢႆႈ၊ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းၼႂ်းဝၢင်းၶွၵ်ႈ တၢႆ 40 ၊ ၵူၼ်းၸိူဝ်းပၢႆႈလွတ်ႈဢွၵ်ႇမႃးၼွၵ်ႈၶွၵ်ႈယဝ်ႉ ၸိူဝ်းၼၼ်ႉသမ်ႉ ၺႃးၸၢၵ်ႇမၢၵ်ႇ တၢႆ 80 ၵေႃႉၼႆ ၵူၼ်းၸိူဝ်းလွတ်ႈ ဢွၵ်ႇၶွၵ်ႈမႃးသေ လွတ်ႈၽေးယဝ်ႉၼၼ်ႉ လၢတ်ႈၼႆ – သိုဝ်ႇၶၢဝ်ႇ DVB ပိုၼ် ၽၢဝ်ႇလၢတ်ႈၼင်ႇၼႆ။
ဝၢႆးလင် ၶွၵ်ႈလူင်လႃႈသဵဝ်ႈပိုတ်ႇ၊ ၵူၼ်းတူၵ်းၶွၵ်ႈ ပၢႆႈလွတ်ႈပူၼ်ႉၽေးၼၼ်ႉ ၵမ်ႈၽွင်ႈ ၵႂႃႇယူႇၶိုၼ်း တီႈ မူႇၸုမ်း ဢၼ်ၵဵဝ်ႇၶွင်ႈ၊ ၵမ်ႈၽွင်ႈသမ်ႉ ၸုမ်းဢူၺ်းလီပွတ်းႁွင်ႇ ႁွင်ႉလုမ်းလႃးဝႆႉသေ ဝၼ်းတီႈ 07/08/2024 ၼၼ်ႉ ဢွၼ် ၵၼ်ႁွတ်ႈထိုင် ၶိုၼ်းႁိူၼ်းယေးၽႂ်မၼ်းယဝ်ႉၼႆ ၵူၼ်းပူၼ်ႉလွတ်ႈၶွၵ်ႈမႃး ၵေႃႉၼိုင်ႈ လၢတ်ႈတီႈ သိုဝ်ႇၶၢဝ်ႇ DVB ဝႆႉၼင်ႇၼႆထႅင်ႈ။
“ဝၼ်းတီႈ 24 ထိုင် 27 သိုၵ်းမၢၼ်ႈ ယိုဝ်းသႂ်ႇၼႂ်းၶွၵ်ႈလူင် ဢမ်ႇထၢတ်ႇ။ မၢၵ်ႇၵွင်ႈလဵၵ်ႉယႂ်ႇတူၵ်းသႂ်ႇၼိူဝ် ႁူင်းလိုဝ်ႈသဝ်း၊ ထိုင်မႃး ဝၼ်းတီႈ 28 မၢၵ်ႇလူင်သျွတ်ႉ တူၵ်းလူင်းမႃး ၵူၼ်းတူၵ်းၶွၵ်ႈတၢႆ 40 ။ ၶွၵ်ႈၵေႃႈ ၵူၼ်ႇ၊ ၽူႈမီးပုၼ်ႈၽွၼ်း ၵုမ်းၶွၵ်ႈဢွၼ်ၵၼ်ပၢႆႈ။ ၵူၼ်းၼႂ်းၶွၵ်ႈဢွၼ်ၵၼ်ႁွင်ႉ ႁႂ်ႈမႃးပိုတ်ႇၽၵ်းတူပၼ် ယွၼ်ႉပိူဝ်ႈမီးၵူၼ်းၼႂ်းၶွၵ်ႈတၢႆ။ ၽိူဝ်ႇယူႇဢမ်ႇႁိုင် မီးၶွၵ်ႈႁွင်ႈၼိုင်ႈ ပိုတ်ႇၽၵ်းတူလႆႈသေ ၵူၼ်းၼႂ်းၶွၵ်ႈ လွတ်ႈဢွၵ်ႇမႃး။ ၵူၼ်းတူၵ်းၶွၵ်ႈၵၢၼ်မိူင်းသမ်ႉမီးၵူႈႁွင်ႈလႄႈ ၸိူဝ်းလွတ်ႈဢွၵ်ႇမႃးၼၼ်ႉ မႃးပိုတ်ႇၽၵ်း တူပၼ်ၵူႈႁွင်ႈ ႁဵတ်းၼၼ်ၶႃႈဢေႃႈ”- ဝႃႈၼႆ။
သိုပ်ႇလၢတ်ႈဝႃႈ – “ၵူၼ်းၸိူဝ်းဢွၵ်ႇမႃးလႆႈၵေႃႈ မႃးၶွၼ်ႈၵၼ်ၵၢင်ဝၢင်း။ ဝၢႆးၼၼ်ႉ ဢွၼ်ၵၼ်ၵႂႃႇ ယႃႉႁူဝ်ႉ လင်ၶွၵ်ႈ ႁိုင်မွၵ်ႈၸူဝ်ႈမူင်းပၢႆ။ တီႈၼၼ်ႉၵေႃႈ သိုၵ်းမၢၼ်ႈ ယိုဝ်းၵွင်ႈယႂ်ႇၵွင်ႈဢွၼ်ႇ တၢႆၼမ်။ ၽိူဝ်ႇဢွၼ် ၵၼ် ပူၼ်ႉဢွၵ်ႇၶွၵ်ႈၵႂႃႇထိုင် တၢင်းၼွၵ်ႈယဝ်ႉ ၶိူင်ႈမိၼ်မႃးပွႆႇမၢၵ်ႇ 8 လုၵ်ႈ။ တပ်ႉၵွင်ႈလူင်ၵေႃႈ ယိုဝ်းမၢၵ်ႇ မႃးတူၵ်းသႂ်ႇ။ လူမ်ႉတၢႆထင်တီႈ 2 ၵေႃႉ။ ၶိူင်ႈမိၼ်သိုၵ်းမႃး ပွႆႇမၢၵ်ႇထႅင်ႈ 3 ၵမ်း။ တီႈၼၼ်ႉၵူၺ်း တၢႆမွၵ်ႈ 100 ၵေႃႉၼႆႉ”- ၵူဝ်ႇၵႃႇသႃႇ လၢတ်ႈၼင်ႇၼႆ။
ၵူၼ်းတူၵ်းၶွၵ်ႈ ၼႂ်းၶွၵ်ႈလူင်လႃႈသဵဝ်ႈၼႆႉ တင်းမူတ်းမီး 2,487 ၵေႃႉ။ ၽိူဝ်ႇမၢၵ်ႇလူင် တူၵ်းသႂ်ႇၶွၵ်ႈယဝ်ႉ ၵူၼ်းၶွၵ်ႈတၢႆ 100 ပၢႆ။ ဢၼ်ၵိုတ်းၼႂ်းၶွၵ်ႈ တေၵိုတ်းၵႃႈႁိုဝ်ဢမ်ႇႁူႉ – ၵူၼ်းၸိူဝ်း ပူၼ်ႉလွတ်ႈတၢင်းတၢႆသေ ႁွတ်ႈထိုင်ႁိူၼ်းယေး ၶိုၼ်း လၢတ်ႈၼင်ႇၼၼ်သေတႃႉ – ယူႇတီႈၸုမ်းႁဝ်းၶႃႈ ဢမ်ႇၸၢင်ႈယိုၼ်ယၼ် ႁူဝ်ၼပ်ႉတႅတ်ႈတေႃး။
