လုမ်းတၢင်ၶႄႇ ပိုၼ်ၽၢဝ်ႇပၼ်ၾၢင်ႉၸၢဝ်းၶႄႇ ၸိူဝ်းမီးၼႂ်းၸႄႈဝဵင်းလႃႈသဵဝ်ႈလႄႈ ႁိမ်းႁွမ်း ဝႃႈႁႂ်ႈဢွၼ်ၵၼ်ပၢႆႈသွၼ်ႈဝႆႉ တီႈလွတ်ႈၽေးၼႂ်းဝႆးဝႆးၼႆႉ ဝႃႈၼႆ။
ဝၼ်းတီႈ 06/08/2024 ယူႇတီႈ လုမ်းတၢင်ၶႄႇ ပိုၼ်ၽၢဝ်ႇလိၵ်ႈၼႂ်းဝီႊၶျႅတ်ႉဝႃႈ ႁႂ်ႈၾၢင်ႉယူႇၾၢင်ႉၵိၼ်၊ တႃႇလွတ်ႈ ၽေးၼၼ်ႉ ႁႂ်ႈဢွၼ်ၵၼ်ပၢႆႈဝႆႉထႃႈ ၵႂႃႇယူႇသဝ်းတီႈယၢၼ်ၵႆပိုၼ်ႉတီႈပၢင်တိုၵ်းၼၼ်ႉဝႆးဝႆး။ ႁႂ်ႈႁၢင်ႈႁႅၼ်းဝႆႉပႃး ပိုၼ်းတူဝ်ၽႂ်မၼ်းသေ ႁႃလၢႆးတၢင်းတႃႇသူင်ႇပၼ်လုမ်းတၢင်ၶႄႇ – ဝႃႈၼႆဝႆႉပႃး။ ပေႃးတူၺ်းဢၼ်ၼႆႉၸိုင် ၵူၼ်းမိူင်းဝဵင်းလႃႈသဵဝ်ႈ ဢွၼ်ၵၼ်မႆႈၸႂ်ဝႃႈ ပၢင်တိုၵ်း လႅပ်ႈတေပဵၼ်ၶိုၼ်း ႁၢဝ်ႈႁႅင်းႁိုဝ်ၼႆယူႇ။
ဢိင်ၼိူဝ် တပ်ႉတိူင်းသိုၵ်း ယမၶ တူၵ်းၼႂ်းမိုဝ်း သိုၵ်းၵဝ်ႈၵၢင်ႉ MNDAA ယဝ်ႉသေ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵေႃႈ မွၵ်ႇလၢတ်ႈၶေႃႈၵႂၢမ်း ၼႂ်းထီႊဝီႊ မိူဝ်ႈၶမ်ႈဝၼ်းတီႈ 5 လိူၼ်ၼႆႉဝႃႈ ယူႇတီႈ တပ်ႉသိုၵ်းမၢၼ်ႈသေ တိုၼ်းဢမ်ႇယွမ်းႁပ်ႉလႆႈလႄႈ တိုၼ်းတေဢမ်ႇယွမ်းပၼ်လႃးလႃး၊ တႃႇလွင်ႈႁူမ်ႇလူမ်ႈ ဝၢၼ်ႈမိူင်းၼၼ်ႉ တေၶိုၼ်းၶိုင်ပွင် ၶိုၼ်းၼႂ်းဝႆးဝႆးၼႆႉ ဝႃႈၼႆဝႆႉ။
ၽူႈၶၢၼ်ပၢၵ်ႇ ႁွင်ႈၵၢၼ်ၽွင်းလူင် ၾၢႆႇၼွၵ်ႈမိူင်း မိူင်းၶႄႇ မၢဝ်ႊၼိင်ႊၵေႃႈ ယၢမ်ႈလၢတ်ႈဝႃႈ ပၢင်တိုၵ်းၼႂ်းၸိုင်ႈတႆး ပွတ်းႁွင်ႇၼႆႉ ယႃႇႁႂ်ႈတုမ်ႉတိူဝ်ႉၸၢဝ်းၶႄႇ ဢၼ်မီးၼႂ်းၸိုင်ႈတႆးပွတ်းႁွင်ႇၼႆဝႆႉလႄႈ ၾၢႆႇတၢင်း သိုၵ်းၵဝ်ႈၵၢင်ႉၵေႃႈ ႁိပ်ႈၼႅတ်ႈပိုၼ်ၽၢဝ်ႇ မိူဝ်ႈဝၼ်းတီႈ 30 လိူၼ်ၵျူႊလၢႆႊၼၼ်ႉဝႃႈ – တေၵႅတ်ႇၶႄႁႄႉ ၵင်ႈပၼ် ၵူၼ်းမိူင်းၶႄႇလႄႈ ၶူင်း ၵၢၼ် ပၢႆးမၢၵ်ႈမီးၵူၼ်းမိူင်းၶႄႇ ႁႂ်ႈလွတ်ႈၽေးၼႆသေ ဝၼ်းတီႈ 5 လိူၼ် ၼႆႉ သိုၵ်းၵႅတ်ႇၶႄၵူၼ်းမိူင်း MDY – PDF ဢၼ်ပဵၼ်ၸုမ်းဢူၺ်းလီၵၼ်တင်း ၸုမ်းဢူၺ်းလီပွတ်းႁွင်ႇ ၼၼ်ႉ ၸွႆႈဢဝ်ၵူၼ်းမိူင်းၶႄႇ 15 ၵေႃႉ ဢၼ်ၶမ်ၼႂ်းပၢင်တိုၵ်း ၸႄႈဝဵင်းၸိၼ်ႉၵူး တိူင်းတႃႈလိူဝ်ႇၼၼ်ႉ သူင်ႇပၼ်ၶိုၼ်းမိူင်းၶႄႇ လူၺ်ႈလွတ်ႈၽေး။
ၵဵဝ်ႇလူၺ်ႈလွင်ႈၶူင်းၵၢၼ်ပၢႆးမၢၵ်ႈမီး မိူင်းၶႄႇၼၼ်ႉတႄႉ – ဢၼ်ပဵၼ်ႁူင်းၸၢၵ်ႈ လိၼ်ပုၼ် ၼႂ်းၸႄႈဝဵင်းမတ်ႉတယႃႇလႄႈ ႁူင်းၸၢၵ်ႈၼီႊၵႄလ်ႊ (တွင်းလႅင်) တီႈဝဵင်းတႃႈၵွင် ၸႄႈဝဵင်းထီးၶျၢႆႉ ၼၼ်ႉတႄႉ ၸုမ်းၵႅတ်ႇၶႄၵူၼ်းမိူင်းယိုတ်းဝႆႉယဝ်ႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
