ဝၼ်းတီႈ 06/08/2024 ယၢမ်းႁူဝ်ၶမ်ႈ မၢၵ်ႇလူင်တူၵ်းသႂ်ႇ ဝတ်ႉၵျွင်းၼွင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢၼ်မီးတီႈဝၢၼ်ႈၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မီးၵူၼ်းမၢတ်ႇၸဵပ်းလူႉတၢႆပႃး တင်းသင်ၶၸဝ်ႈ။

ၵူၼ်းဝၢၼ်ႈလၢတ်ႈဝႃႈ သိုၵ်းၵဝ်ႈၵၢင်ႉ မႃးတူင်ႉၼိုင်ယူႇသဝ်းၸွမ်းၵွင်းလွႆ ႁိမ်းၼၼ်ႉလႄႈ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇတူၵ်းတိူဝ်ႉသႂ်ႇ ၵျွင်းလူႉၵွႆ ၸၢၵ်ႇမၢၵ်ႇ တိူဝ်ႉၺႃး ၸဝ်ႈၸၢင်း လူႉလွၼ်ႇတူၼ်ၼိုင်ႈလႄႈ မၢတ်ႇၸဵပ်းႁၢဝ်ႈႁႅင်း တူၼ်ၼိုင်ႈ။ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်းယေးၵူၼ်းဝၢၼ်ႈထႅင်ႈသေ တိူဝ်ႉၺႃး ပႃႈမုၼ်ဢွင်ႇ လူႉတၢႆထႅင်ႈ ၵေႃႉၼိုင်ႈ။

ၸဝ်ႈၸၢင်း ဢၼ်ယူႇတီႈဝဵင်းၼမ်ႉလၼ်ႈ တူၼ်ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸဝ်ႈၸၢင်းဢၼ် လွၼ်ႇၵႂႃႇၼၼ်ႉ ပဵၼ်ၸဝ်ႈၸၢင်းၼၼ်ႇတိသေၼ  ဢႃယု 54 ပီ၊ ဝႃႇၸဝ်ႈလႆႈ 7 ဝႃႇ ယူႇဝတ်ႉၵုင်းႁေႃ ဝၢၼ်ႈၼွင်ၵေႃႈလူင်၊ ၵူၼ်းႁိူၼ်း ဢၼ်တၢႆၵႂႃႇသမ်ႉပဵၼ်မႄႈမုၼ်ဢွင်ႇ – ပဵၼ်မႄႈမုၼ်ၸၢင်းထႅင်ႈ ပႃးၼိုင်ႈ။ ဢမ်ႇၸႂ်ႈမႄႈ – ၸဝ်ႈဢၼ်လွၼ်ႇၼၼ်ႉ။ ၶၢပ်ႈတူဝ်ၸဝ်ႈတႄႉ သၢင်းၵဵဝ်ႇၵႂႃႇ မိူဝ်ႈၼႆႉ ဝၼ်းတီႈ 7 ယဝ်ႉ။ ပႃးဢၼ်မၢတ်ႇၸဵပ်းၼၼ်ႉ ၶႅၼ်/ ၶႃ ႁၵ်း။ ယၢမ်းလဵဝ် သူင်ႇယူတ်းယႃ တူဝ်ဝႆႉ တီႈႁူင်းယႃၼမ်ႉလၼ်ႈ”- ဝႃႈၼႆ။

တီႈၵျွင်းၼွင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ ပေႃးၶူးဝႃးၸဝ်ႈမႃး ၵႆႉမႃးယူႇသဝ်းၽႃႇဝၼႃႇ။ ပေႃး ၸဝ်ႈဢမ်ႇယေႃးမုၼ်မႃး ၵူၼ်းဝၢၼ်ႈၵူၺ်းၵႂႃႇလုမ်းလႃးတူၺ်းလူ။

ပူၼ်ႉမႃး 2-3 ဝၼ်းၼႆႉၵေႃႈ မီးၵူၼ်းဝၢၼ်ႈ ငိူင်ႉပၢႆႈၽေးသိုၵ်း မႃးယူႇသဝ်းဝႆႉ။ ထိုင်မႃးမိူဝ်ႈဝႃးၼႆႉတႄႉ ယွၼ်ႉပိူဝ်ႈသိုၵ်း MNDAA မႃးတူင်ႉၼိုင်ႁိမ်းႁွမ်းၼၼ်ႉလႄႈ ၵူၼ်းဝၢၼ်ႈဢွၼ်ၵၼ် သိုပ်ႇပၢႆႈၵႂႃႇထႅင်ႈ တၢင်ႇတီႈယဝ်ႉ။ တီႈၵျွင်း ၼၼ်ႉ ၵိုတ်းၶဝ် 2 ၸဝ်ႈ။ ပႃႈမုၼ်ဢွင်ႇသမ်ႉ မီးဝႆႉတီႈႁိူၼ်း ၼႂ်းဝၢၼ်ႈၼွင်ၵေႃႈ။

ယွၼ်ႉပၢင်တိုၵ်းသေ ၵူၼ်းဝၢၼ်ႈၼႂ်းဢိူင်ႇၼွင်ၵေႃႈလူင်၊ ၵူၼ်းဝၢၼ်ႈပၢင်ၼိဝ်ႉ၊ ၼွင်ၵေႃႈ ၊ သွင်ၵေးၸိူဝ်း ၼႆႉတႄႉ ဢွၼ်ၵၼ်ငိူင်ႉပၢႆႈမူတ်းယဝ်ႉ။ ၵမ်ႈၽွင်ႈ ၵႂႃႇသွၼ်ႈယူႇတၢင်းမိူင်းၶိူဝ်း၊ ၵမ်ႈၽွင်ႈ မီးတီႈဝဵင်းၼမ်ႉလၼ်ႈ။ ၼႂ်း 2-3 ဝၼ်းၼႆႉ ၵူၼ်းတီႈဝဵင်းၼမ်ႉလၼ်ႈၵေႃႈ ငိူင်ႉပၢႆႈၵႂႃႇတၢင်းမိူင်းၶိူဝ်း။ တီႈမိူင်းၶိူဝ်း မီးၵူၼ်း ပၢႆႈၽေးသိုၵ်းယူႇမွၵ်ႈ 600 ၼႆႉ – ၵူၼ်းမိူင်းဝဵင်းၼမ်ႉလၼ်ႈ လၢတ်ႈၼင်ႇၼႆ။

တီႈဢိူင်ႇၼွင်ၵေႃႈလူင်ၼႆႉ သိုၵ်းမၢၼ်ႈ တပ်ႉၶလယ147 ၊  တပ်ႉၵႃးၵၢပ်ႇလဵၵ်းလႄႈ သိုၵ်းၵဝ်ႈၵၢင်ႉ  MNDAA တႄႇယိုဝ်းၵၼ်မႃး မိူဝ်ႈလိူၼ်ၵျူႊလၢႆႊ ဝၼ်းတီႈ 26 ။ ယၢမ်းလဵဝ် ထုင်ႉၼမ်ႉလၼ်ႈ – သီႇပေႃႉၼႆႉ ယွၼ်ႉပၢင်တိုၵ်းသေ ၵူၼ်းမိူင်း ဢမ်ႇၸၢင်ႈၵႂႃႇႁဵတ်းၵၢၼ်၊ လုၵ်ႈဢွၼ်ႇၵေႃႈ ဢမ်ႇၸၢင်ႈၵႂႃႇႁဵၼ်းလိၵ်ႈလၢႆး။ ဢွၼ်ၵၼ်ပၢႆႈၽေးသိုၵ်းဝႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)