ပလိၵ်ႈမၢၼ်ႈ ဢဝ်ၵွင်ႈၸမ်ႈၵူၼ်းၼုမ်ႇ တီႉၺွပ်းၵႂႃႇ ၽွင်ႈတိုၵ်ႉတူၺ်းပိတ်ႉမၢၵ်ႇၼင် တီႈဝဵင်းတူၼ်ႈတီး မွၵ်ႈ 10 ၵေႃႉ။
ဝၼ်းတီႈ 04/08/2024 တီႈပၢင်ႇပိတ်ႉမၢၵ်ႇၼင် ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ ၸုမ်းပိတ်ႉမၢၵ်ႇၼင် မိူင်းတႆးတင်း ဝဵင်းတႃႈၵုင်ႈ (Shan United လႄႈ Yangon United ) ၶေႉၶဵင်ႇ ပိတ်ႉမၢၵ်ႇၼင်ၵၼ်ယူႇၼၼ်ႉ သိုၵ်းမၢၼ်ႈ ပလိၵ်ႈမၢၼ်ႈ ၶဝ်ႈတီႉၵူၼ်းၼုမ်ႇ ၽွင်းတိုၵ်ႉတူၺ်းပွႆးပိတ်ႉမၢၵ်ႇၼင် ၼၼ်ႉၵႂႃႇ ဝႃႈၼႆ။
ၵူၼ်းၼုမ်ႇ ၵႂႃႇတူၺ်းပွႆးမၢၵ်ႇၼင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈပလိၵ်ႈမၢၼ်ႈ မႃးလၢၵ်ႈဢဝ် ၵူၼ်းၼုမ်ႇ ဢၼ်ၼင်ႈတူၺ်း ပၢင်ပိတ်ႉမၢၵ်ႇၼင်ယူႇၼၼ်ႉ ၵႂႃႇမွၵ်ႈ 10 ၵေႃႉၼႆႉ။ တေဝႃႈလႃႇလႄႈ ၺွပ်းၵႂႃႇႁႃႉၼႆ ၵေႃႈ ဢမ်ႇလႅပ်ႈၸႂ်ႈ။ ပေႃးၺွပ်းယွၼ်ႉဝႃႈလႃႇတႄႉ လူဝ်ႇၺွပ်းၵႂႃႇၵူၼ်း တၢင်းပၢင်ၵူၺ်းယဝ်ႉ။ တေဝႃႈ ယွၼ်ႉၵိၼ်လဝ်ႈၵိၼ်ပီႊယႃႊၼႆၵေႃႈ ၶဝ်ပေႃးပႂ်ႉထတ်းယူႇ တီႈၽၵ်းတူတၢင်းၶဝ်ႈၼၼ်ႉၵမ်းလဵဝ်ယဝ်ႉ”- ဝႃႈၼႆ။
ဝၼ်းၼၼ်ႉ ၵူၼ်းမႃးတူၺ်းပၢင်ၶေႉၶဵင်ႇပိတ်ႉမၢၵ်ႇၼင်ၵေႃႈၼမ် သမ်ႉပေႃးတဵမ်ဝၢင်း။ သိုၵ်းမၢၼ်ႈ ဢဝ်ၵွင်ႈၸမ်ႈ ၵူၼ်းၼုမ်ႇၼၼ်ႉသေ ႁွင်ႉၵႂႃႇတေႃႇၼႃႈတေႃႇတႃ ၵူၼ်းတူၺ်းပၢင်ပိတ်ႉမၢၵ်ႇၼင် ၼၼ်ႉၵူၺ်း ဝႃႈၼႆ။
“ၵူၼ်းပႂ်ႉတူၺ်းပၢင်ပိတ်ႉမၢၵ်ႇၼင်ၵေႃႈ ႁၼ်ယူႇ ဢမ်ႇၸၢင်ႈႁဵတ်းႁိုဝ်။ သိုၵ်းမၢၼ်ႈ ၸိူဝ်းၼၼ်ႉသမ်ႉ ပႃးၵွင်ႈမႃးၶႃႈလူး။ ၵႃႈလႆႈတူၺ်းယူႇ ၸိူင်ႉၼၼ်ၵူၺ်းၶႃႈဢေႃႈ” – ၵူၼ်းၼုမ်ႇ သိုပ်ႇလၢတ်ႈၼႄၼင်ႇၼႆ။
ယွၼ်ႉသင်လႄႈ တီႉၵႂႃႇဢၼ်ဝႃႈၼၼ်ႉတႄႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတူၺ်း ယူႇၵေႃႈ ၵပ်းသိုပ်ႇဢမ်ႇလႆႈ။
ဝၢႆးလင် သိုၵ်းမၢၼ်ႈ ပိုၼ်ၽၢဝ်ႇ ပၵ်းပိူင်ႁွင်ႉၵူၼ်းမိူင်းႁၢပ်ႇၵၢၼ်သိုၵ်းၼၼ်ႉ ၵူၼ်းၼုမ်ႇမိူင်းမၢၼ်ႈ ၵမ်ႈၼမ် ဢွၼ် ၵၼ်ပၢႆႈဢွၵ်ႇၵႂႃႇၼွၵ်ႈမိူင်း။ ၵမ်ႈၽွင်ႈသမ်ႉ ပၢႆႈၶဝ်ႈႁူမ်ႈ တပ်ႉသိုၵ်းၵူၼ်းၼုမ်ႇ ၸိူဝ်းပိုတ်းယိုဝ်း သိုၵ်းမၢၼ်ႈယူႇယၢမ်းလဵဝ်။
တႅမ်ႈ- Eugene (ၽူႈသိုဝ်ႇၶၢဝ်ႇ ၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ