ၽွင်းၵူၼ်းမိူင်းပၢႆႈၽေးသိုၵ်းယူႇၼႆႉ ႁိူၼ်း ၸွမ်သိုၵ်းလူင် သိူဝ်ထႅၼ်ႈ ၽူႈၼမ်းၼႃႈ ၼႃႇယၵ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဢၼ်မီးတီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၺႃးယႃႉလူႉၵွႆဝႆႉ။
ဝၼ်းတီႈ 30 ၵျူႊလၢႆႊ သိုၵ်းၵဝ်ႈၵၢင်ႉ MNDAA ဢၼ်မီးၼႂ်းဝဵင်းလႃႈသဵဝ်ႈ လိုပ်ႈပႅတ်ႈၵူၼ်းပႂ်ႉႁိူၼ်းၸဝ်ႈသိူဝ်ထႅၼ်ႈသေ ၶဝ်ႈယႃႉႁိူၼ်းယေးၵွႆ ဢဝ်ၶူဝ်းၶွင်ၵႂႃႇပႃးၼႆ – ႁၼ်ၵူၼ်းႁိူၼ်းမၼ်းၸဝ်ႈတႅမ်ႈတၢင်ႇဝႆႉတီႈၾဵတ်ႉသ်ပုၵ်ႉသုၼ်ႇတူဝ်ဝႆႉၼင်ႇၼႆ။
“ၵူၼ်းႁိူၼ်းၶဝ်တႄႉငိူင်ႉပၢႆႈဝႆႉယဝ်ႉ ၵိုတ်းၵူၼ်းပႂ်ႉႁိူၼ်းၵူၺ်း။ သိုၵ်းၵဝ်ႈၵၢင်ႉမႃးလိုပ်ႈပႅတ်ႈႁေၵေႃႈ ၶဝ်ႈယႃႉႁိူၼ်းယေး။ ၽိူဝ်ႇၵူၼ်းပႂ်ႉႁိူၼ်းမႃးတူၺ်းၶိုၼ်း လႆႈႁၼ်ႁိူၼ်းၺႃးယႃႉဝႆႉယဝ်ႉ ” – ၼႆ ၼၢင်းယိင်း ၵူၼ်းမိူင်းလႃႈသဵဝ်ႈ ၵေႃႉၼိုင်ႈၵေႃႈလၢတ်ႈၼင်ႇၼႆ။
လွင်ႈၼႆႉ ယူႇတီႈၽူႈတွႆႇႁွၵ်ႈၶတ်းၸႂ်တိတ်းတေႃႇၸူးတၢင်းငဝ်ႈငုၼ်း SSPP/SSA ၵေႃႈဢမ်ႇလႆႈ။
ယၢမ်းလဵဝ်တီႈၼႂ်းဝဵင်းလႃႈသဵဝ်ႈၼႆႉ ၵူၼ်းမိူင်း 90 % တႄႉ ငိူင်ႉဝႄႈၽေးသိုၵ်းဝႆႉယဝ်ႉ ။ ၵိုတ်းသိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ MNDAA ၵူၺ်းဢဝ်တီႈယူႇ ၸွမ်းႁိူၼ်းယေး ႁၢၼ်ႉတၢင်းၶၢႆၸၼ်ႉသုင်ၸိူဝ်းၼၼ်ႉသေ တူင်ႉၼိုင်ဝႆႉ ယူႇယူႇမီးသဵင်ယိုဝ်းၵၼ်ပဵၼ်တီႈ ။ ၸွမ်းသဵၼ်ႈသၢႆတၢင်း ၼႂ်းဝဵင်းလႃႈသဵဝ်ႈ ၼႂ်းပွၵ်ႉၼႂ်းယွမ်ႇၵေႃႈ မၢၵ်ႇလူင်တူၵ်းသႂ်ႇဝႆႉသမ်ႉပေႃးလူႉၵွႆ။
MNDAA ပိုၼ်ၽၢဝ်ႇဝႆႉဝႃႈ ၵုမ်းလႆႈ ဝဵင်းလႃႈသဵဝ်ႈယဝ်ႉသေ တႄႇပၼ်ႇၵၢၼ်ၽွင်းငမ်းႁင်းၶဝ်ယူႇယဝ်ႉဝႃႈၼႆသေတႃႉ ၽူႈၶၢၼ်ပၢၵ်ႇ ၶွင်ႊသီႊ သိုၵ်းမၢၼ်ႈ ၸွမ်သိုၵ်းၸေႃႇမိၼ်းထုၼ်းတႄႉလၢတ်ႈဝႃႈ – တိူင်းသိုၵ်းယမၶ ပႆႇတူၵ်းၼႆယူႇ။
ၵူၼ်းလႃႈသဵဝ်ႈထႅင်ႈၵေႃႉၼိုင်ႈလၢတ်ႈဝႃႈ –“တေႃႇထိုင်ဝၼ်းတီႈ 31 ၵျူႊလၢႆႊၼႆႉ တိုၵ်ႉပိုတ်းယိုဝ်းၵၼ်ယူႇ။ ႁူင်းဝႆႉၶိူင်ႈၵွင်ႈၵၢင်ႇသိုၵ်းမၢၼ်ႈၵေႃႈ ၺႃးၽဝ်။သိုၵ်းမၢၼ်ႈၵေႃႈဢဝ်ၶိူင်ႈမိၼ်သိုၵ်းမႃးပၼ်ႇလဵပ်ႈယူႇၵူႈဝၼ်းလႄႈၵူႈၶိုၼ်း။”-ဝႃႈၼႆ။
ၵူၼ်းမိူင်းၸိူဝ်းဢမ်ႇမီးရူတ်ႉၵႃး ရူတ်ႉၶိူင်ႈတႄႉ ဢွၼ်ၵၼ်ပႆတၢင်းသေပၢႆႈ။ ၽွင်းပၢႆႈဢွၵ်ႇဝဵင်းၼၼ်ႉ သိုၵ်းၵဝ်ႈၵၢင်ႉ သင်ႇဝႆႉဝႃႈ ႁႂ်ႈယိပ်းပႃးတုင်းသီၶၢဝ်၊ ႁၢမ်ႈရူတ်ႉၵႃးတၢင်းၼွၵ်ႈၶဝ်ႈမႃးႁပ်ႉၵူၼ်းထိုင်ၼႂ်းဝဵင်းၼႆဝႆႉ ။
ၽွင်းၵူၼ်းမိူင်းလႆႈပၢႆႈၽေးသိုၵ်းဝႆႉၼၼ်ႉ ႁိူၼ်းယေးၵူၼ်းမိူင်းလႄႈ ႁၢၼ်ႉၶၢႆၶူဝ်း ႁၢၼ်ႉတၢင်းၵိၼ် ၵိုၵ်းႁိူၼ်းၵိုၵ်းၵၢတ်ႇၵေႃႈ ၺႃးယႃႉသေသွၵ်ႈတဝ်ဢဝ်ၶူဝ်းၶွင်ၵႂႃႇတင်းၼမ်။
ဝၼ်းတီႈ 25 ၽူႈၶၢၼ်ပၢၵ်ႇ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ မၢဝ်ႊၼိင်ႊ လၢတ်ႈဝႃႈ ပၢင်တိုၵ်းၸွမ်းလႅၼ်လိၼ်တႆး-ၶႄႇၼၼ်ႉ ႁႂ်ႈၾၢင်ႉပၼ်ယႃႇႁႂ်ႈတုမ်ႉတိူဝ်ႉၵူၼ်းမိူင်းၶႄႇ ပၢႆးမၢၵ်ႈမီးလႄႈၶူင်းၵၢၼ် လူင်ပွင်ၸိုင်ႈၶႄႇ ဝႃႈၼႆဝႆႉ။
ဝၼ်းတီႈ 27 ၵျူႊလၢႆႊၼၼ်ႉ သိုၵ်းဝႃႉၶဝ်ႈၼႂ်းဝဵင်းလႃႈသဵဝ်ႈ၊ ထိုင်မႃးဝၼ်းတီႈ 28 ၵျူႊလၢႆႊ သိုၵ်းၵဝ်ႈၵၢင်ႉ MNDAA ၶိုၼ်းပိုၼ်ၽၢဝ်ႇဝႃႈ တေၽွင်းငမ်းဝဵင်းလႃႈသဵဝ်ႈ လူၺ်ႈလွင်ႈၽဵင်ႇပဵင်းပဵၼ်ထမ်း၊ ႁႂ်ႈၸုမ်းဢူၺ်းလီ ၸွႆႈၵႅတ်ႇၶႄ ႁႄႉၵင်ႈပၼ်ပႃး ၵူၼ်းမိူင်းၶႄႇ ဢၼ်ၶၢင်ႉၶမ်လႄႈမၢတ်ႇၸဵပ်းဝႆႉယွၼ်ႉပၢင်တိုၵ်း ၽႅၼ်ယၼ်ႇသိုၵ်း 1027 ဝႃႈၼႆ။
