သိုၵ်းမၢၼ်ႈ ယိုတ်းမိူင်း လုၵ်ႉတၢင်ႉယၢၼ်းထႅမ်ႁႅင်းသိုၵ်း မုင်ႈၸူး တၢင်းလႃႈသဵဝ်ႈ ၺႃးသိုၵ်းၵဝ်ႈၵၢင်ႉ တင်း BPLA ပႂ်ႉလူမ်ႇယိုဝ်းၸွမ်းတၢင်း တၢႆ 80 ပၢႆ မၢတ်ႇ 50 ပၢႆ။
ဝၼ်းတီႈ 30/07/2024 ယၢမ်းၵၢင်ၼႂ်ၸဝ်ႉ 3 မူင်းပၢႆ ၵႃးသိုၵ်းမၢၼ်ႈ 8 လမ်း လုၵ်ႉတၢင်ႉယၢၼ်း ထႅမ်ႁႅင်းသိုၵ်း မုင်ႈၸူး တၢင်းဢိူင်ႇၼမ်ႉပွင်ႈသေ ၺႃးသိုၵ်းၵဝ်ႈၵၢင်ႉ MNDAA တင်း ၸုမ်းၵႅတ်ႇၶႄၵူၼ်းမိူင်း BPLA ႁူမ်ႈၵၼ် ပႂ်ႉလူမ်ႇယိုဝ်း သိုၵ်းမၢၼ်ႈ ၼႂ်းၵႄႈၵၢင်ဝၢၼ်ႈၽႃတင်ႈ – ဝၢၼ်ႈႁူဝ်ၼႃး ဢိူင်ႇဝၢၼ်ႈပၢင်ႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။
ၽူႈတူင်ႉၼိုင် ၵၢၼ်သိုၵ်း ၼႂ်းၼႃႈတီႈ ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ လုၵ်ႉတၢင်ႉယၢၼ်း တႃႇတေၵႂႃႇထႅမ်ႁႅင်းသိုၵ်း တၢင်းၼမ်ႉပွင်ႈ – လႃႈသဵဝ်ႈ တႃႇၵႂၢတ်ႇလၢင်ႉ သိုၵ်းၵဝ်ႈၵၢင်ႉ တၢင်းပွတ်းပုၼ်ႉၶိုၼ်းၼႆသေ မိူဝ်ႈ ၽွင်းၵႂႃႇၸွမ်းတၢင်းၼၼ်ႉ ၺႃးသိုၵ်း MNDAA ၶဝ် ပႂ်ႉၸွမ်းတၢင်း ယိုဝ်းၽဝ်ပႅတ်ႈ ၵႃးသိုၵ်းလႄႈ တူဝ်သိုၵ်းမၢၼ်ႈ တၢႆ 80 ပၢႆ မၢတ်ႇ 50 ပၢႆ”- ဝႃႈၼႆ။
ၵႃးသိုၵ်းမၢၼ်ႈ ဢၼ်လုၵ်ႉတၢင်း တၢင်ႉယၢၼ်းၼၼ်ႉသေ ထႅမ်ႁႅင်းသိုၵ်း မႃးတၢင်းဢိူင်ႇၼမ်ႉပွင်ႈ ဝဵင်းလႃႈသဵဝ်ႈၼႆႉ တင်းမူတ်း ၵႃး 8 လမ်း ႁႅင်းသိုၵ်းမွၵ်ႈ 400 ၼႆယဝ်ႉ။
မိူဝ်ႈဝၼ်းတီႈ 29/07/2024 ပူၼ်ႉမႃးၼႆႉ သိုၵ်းမၢၼ်ႈ ယိုတ်းမိူင်း လုၵ်ႉတၢင်းမိူင်းၵိုင် ပွတ်းၸၢၼ်း ထႅမ်ႁႅင်းသိုၵ်း မုင်ႈၸူး တၢင်းဝဵင်းတၢင်ႉယၢၼ်း ပွတ်းႁွင်ႇ ဢဵၼ်ႁႅင်းသိုၵ်း 1,000 ပၢႆ။
ပူၼ်ႉမႃး မိူဝ်ႈဝၼ်းတီႈ 25 ယၢမ်းၵၢင်ၼႂ် 4 မူင်းၼၼ်ႉ သိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ တိူင်းသိုၵ်းလႃႈသဵဝ်ႈ ၸဵင်ႇႁွင်ႇဝၼ်းဢွၵ်ႇ (ယမၶ) ၵႂႃႇ ၼႆယဝ်ႉ။
