ၵူၼ်းမိူင်း ၵူၼ်းသိုၵ်း ဢၼ်ၺႃးၸၢၵ်ႇမၢၵ်ႇသေ လူႉတၢႆဝႆႉၸွမ်းၶၢင်ႈတၢင်း ၼႂ်းဝဵင်းလႃႈသဵဝ်ႈၼႆႉ ထူပ်းႁၼ် ဢမ်ႇယွမ်း 5 ၵေႃႉယဝ်ႉ – ၵူၼ်းပိုၼ်ႉတီႈလၢတ်ႈ။

ႁၢင်လိူၼ်ၵျူႊလၢႆႊၼႆႉ တီႈပွၵ်ႉ 12 ထူပ်းႁၼ်တူဝ်တၢႆ ၵူၼ်းမိူင်း ၵူၼ်းသိုၵ်း တီႈၼိူဝ်သဵၼ်ႈတၢင်းလူင် 5 ၵေႃႉ ယဝ်ႉ ၵေႃႈ တီႈႁိမ်းမၢၼ်ႈသူႈထႅင်ႈ 1 ၵေႃႉ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ယွၼ်ႉၸၢၵ်ႇမၢၵ်ႇ ပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA တိူဝ်ႉသႂ်ႇ ဝႃႈၼႆ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶႃႈ ထူပ်းႁၼ်ၼႆႉ တီႈပွၵ်ႉ 12 တင်းမူတ်း 5 ၵေႃႉ တီႈမၢၼ်ႈသူႈထႅင်ႈ 1 ၵေႃႉ။ မၢင်ၸိူဝ်းတၢႆႁိုင် 2 ဝၼ်း 3 ဝၼ်း 5 ဝၼ်း ၸိူဝ်းၼႆႉၶႃႈဢေႃႈ။ ဢမ်ႇမီး ၵူၼ်းၵဵပ်းၽဝ်ပၼ်လႄႈ မဵၼ်တူႇႁႅင်းၼႃႇၶႃႈ။ ဢၼ်ၼႆႉ ၸွမ်းၼင်ႇႁဝ်းၶႃႈႁူႉၵူၺ်း ဢၼ်ႁဝ်းၶႃႈ ဢမ်ႇႁူႉ ၵေႃႈ တေမီးထႅင်ႈတင်းၼမ်။ မိူဝ်ႈပူၼ်ႉမႃး ၵူၼ်းတၢႆ ၸိူဝ်းၼၼ်ႉ ပိူၼ်ႈတေၵဵပ်းၵႂႃႇၽဝ်ပၼ် တီႈၼႃႈ ၵျွင်းမၢၼ်ႈသူႈ ႁိမ်းၶၢင်ႈတၢင်းၼၼ်ႉၶႃႈ ဢေႃႈ”- ဝႃႈၼႆ။

မိူဝ်ႈဝႃး ဝၼ်းတီႈ 28 သမ်ႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ယိုဝ်းၵၼ်ထႅင်ႈ တီႈဝတ်ႈမၢၼ်ႈသူႈ ၸၢၵ်ႇမၢၵ်ႇ တိူဝ်ႉၺႃး ၵူၼ်းပၢႆႈၽေး ဢၼ်မီးဝႆႉတီႈဝတ်ႉမၢၼ်ႈသူႈၼၼ်ႉ လူႉတၢႆၸွမ်းထႅင်ႈ ဝႃႈၼႆ။

“တင်ႈတႄႇ ၶဝ်ပဵၼ်ပၢင်တိုၵ်းၵၼ်မႃးၼႆႉ တီႈဝဵင်းလႃႈသဵဝ်ႈၼႆႉ ၵူၼ်းမိူင်းလူႉတၢႆၼႆႉ ဢမ်ႇယွမ်း 40 – 50 ယဝ်ႉ။ မိူဝ်ႈဝႃးၼႆႉ သိုၵ်းမၢၼ်ႈ ယူႇတီႈၵွင်းမူးမၢၼ်ႈသူႈ – သိုၵ်းၵဝ်ႈၵၢင်ႉသမ်ႉ ယူႇတီႈ ဝတ်ႉမၢၼ်ႈသူႈ ၶႅၼ်ႈၵၼ် သဵၼ်ႈတၢင်းသေ ယိုဝ်းၵၼ် ၸၢၵ်ႇမၢၵ်ႇတိူဝ်ႉၺႃးၵူၼ်းပၢႆႈၽေးတီႈၼၼ်ႈ မၢတ်ႇၸဵပ်းလူႉတၢႆ ၶႃႈဢေႃႈ။ လွင်ႈႁူဝ်ယွႆႈမၼ်းတႄႉ ပႆႇလႆႈႁူႉၶႃႈ ဝႃႈမၢတ်ႇတၢႆ ၵႃႈႁိုဝ် ဢၼ်ဝႃႈၼၼ်ႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 02/07/2024 ၼၼ်ႉမႃးသေ ႁၢၼ်ႉတေႃႇထိုင် ယၢမ်းလဵဝ် ပၢင်တိုၵ်းတီႈဝဵင်းလႃႈသဵဝ်ႈၼႆႉ ၸမ်လိူၼ်ယဝ်ႉ သဵင်ၵွင်ႈပႆႇယဵၼ် ယၢမ်းလဵဝ် ဢၼ်သိုၵ်းၵဝ်ႈၵၢင်ႉ ၵုမ်းလႆႈဝဵင်းယဝ်ႉ ဢၼ်ဝႃႈၼၼ်ႉ ယင်းပႆႇၵုမ်းလႆႈ ႁူဝ်ပၢၵ်ႇတဵမ်။ ဝၼ်းတီႈ 28 ၼႆႉ ယူႇတီႈ သိုၵ်းၵဝ်ႈၵၢင်ႉ ဢဝ်ၶိူင်ႈသဵင် (သပီႇၵႃႇ) သေ ပဝ်ႇၸူး တပ်ႉသိုၵ်းမၢၼ်ႈ ႁႂ်ႈဝၢင်းၶိူင်ႈပၼ်ၶဝ် ထႅင်ႈလူးၵွၼ်ႇ – ၵူၼ်းပိုၼ်ႉတီႈလၢတ်ႈ။

လိူဝ်ၼၼ်ႉ ပေႃးယၢမ်းၵၢင်ၶိုၼ်းလႄႈ ၼႃႈမိူင်းလႅင်းၼႆႉသမ်ႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ ၼိုင်ႈၶိုၼ်းလႂ် ဢမ်ႇယွမ်း 2 လုၵ်ႈ မႃးပွႆႇၵူႈၶိုၼ်း ၼႆယဝ်ႉ။