ၾူၼ်တူၵ်း ထပ်းၵၼ်လၢႆဝၼ်း ၼမ်ႉမိူၺ်းလူၼ်ႉၾင်ႇ ၼွင်းထူမ်ႈ ၵၢတ်ႇႁိမ်းမိူၺ်း

ၾူၼ်တူၵ်းထပ်းၵၼ် 3-4 ဝၼ်းၼႆႉ ႁဵတ်းႁႂ်ႈၼမ်ႉမိူၺ်းသုင်လူၼ်ႉၾင်ႇ ထူမ်ႈပိုၼ်ႉတီႈၼႂ်းဢိူင်ႇမႄႈပ ႁိမ်းၶူဝ်မိုတ်ႈၵိုဝ်းထႆး – မၢၼ်ႈ မၢႆၼိုင်ႈ မႄႈသွတ်ႇ – မျႃႉဝတီႇ။

ၼမ်ႉထူမ်ႈၶိုၼ်ႈသုင် 1 မီႇတႃႇပၢႆလႄႈ ႁဵတ်းႁႂ်ႈထူမ်ႈ တီႈၸွတ်ႇရူတ်ႉၵႃး တႂ်ႈၶူဝ်ၶၢမ်ႈၼမ်ႉမိူၺ်း၊ ထူမ်ႈတီႈၵၢတ်ႇႁိမ်းမိူၺ်းလႄႈ ၼႂ်းဝၢၼ်ႈ မူႇထီႉ 1 ၼႂ်းဢိူင်ႇမႄႈပ ၸိူဝ်းၼႆႉ။

ၼမ်ႉၼႆႉ တႄႇသုင်ၶိုၼ်ႈ ၶမ်ႈဝၼ်းတီႈ 25 လိူၼ်ၵျူႊလၢႆႊ ၾူၼ်လူင်လူမ်းလူင် တူၵ်းဢမ်ႇထၢတ်ႇလႄႈ ထိုင်မႃးဝၼ်းတီႈ 26 ယၢမ်းၵၢင်ၼႂ် သိုပ်ႇထူမ်ႈၶိုၼ်ႈထိုင် ၼႂ်းဝၢၼ်ႈ။

လွင်ႈမၢတ်ႇၸဵပ်းလူႉတၢႆတႄႉ ဢမ်ႇမီး ၶူဝ်းၶွင်ၵူၼ်းမိူင်းလႄႈ ၶူဝ်းၼႂ်းၵၢတ်ႇတႄႉ ၸဝ်ႈၼႃႈတီႈၾၢႆႇႁူမ်ႇလူမ်ႈလႄႈ ၸုမ်းၸွႆႈထႅမ်ပရႁိတ ၸွႆႈၵၼ်တေႃႉပၢႆႈၶိုၼ်ႈတီႈသုင် တီႈလွတ်ႈၽေးယဝ်ႉ ၶၢဝ်ႇထႆးပိုၼ်ၽၢဝ်ႇဝႆႉၼင်ႇၼႆ။

ၾၢႆႇတၢင်းပၵ်းတႃပႂ်ႉတူၺ်းၾူၼ်လူမ်းၾိင်ႈၾႃႉ မိူင်းထႆးၵေႃႈပိုၼ်ၽၢဝ်ႇဝႆႉဝႃႈ – လူမ်းမုၼ်သုၼ်း ဢၼ်လုၵ်ႉတင်း ၸဵင်ႇၸၢၼ်းဝၼ်းတူၵ်း ၶဝ်ႈမႃးတၢင်းပၢင်ႇလၢႆႇထႆးၼၼ်ႉ ထိုင်မႃးယဝ်ႉလႄႈ ၽၢၵ်ႈၼိူဝ်လႄႈ ဢိသၢၼ် ၸိုင်ႈထႆး ၾူၼ်တေတူၵ်းထပ်းၵၼ် ဝၼ်းတီႈ 22 ထိုင် 30 လိူၼ်ၵျူႊလၢႆႊၼႆႉ။ ၵူၼ်းဝၢၼ်ႈၵူၼ်းမိူင်း ၸိူဝ်းယူႇၸွမ်းတၢပ်ႈလွႆ ႁိမ်း ႁူၺ်ႈ ႁႂ်ႈဢွၼ်ၵၼ်ၾၢင်ႉၽေးၼမ်ႉပႃႇၼမ်ႉႁူၺ်ႈၼွင်းထူမ်ႈ ဝႃႈၼႆဝႆႉ။

တီႈတၢင်းၾၢႆႇဝဵင်းမျႃႉဝတီႇ ဢၼ်တေႃႇၼႃႈၵၼ် တင်းဝဵင်းမႄႈသွတ်ႇၵေႃႈ ၼမ်ႉမႄႈသွင်ယၢင်း (တွင်ႇယိၼ်းမျိတ်ႉ) ၼွင်းထူမ်ႈၶဝ်ႈၼႂ်းပွၵ်ႉ 1 ပွၵ်ႉ 2 ပွၵ်ႉ 3 လႄႈပွၵ်ႉ 5 ။ ၵူၼ်းမိူင်း ရူတ်ႉၵႃး ဢမ်ႇၸၢင်ႈၵႂႃႇမႃး။ ၼမ်ႉထူမ်ႈၶဝ်ႈပႃး ၼႂ်းဝၢင်းဝတ်ႉဝႃးၽႃသိူဝ်ႇ။ ၵူၼ်းၼႂ်းပွၵ်ႉၼႂ်းယွမ်ႇၵေႃႈ လႆႈၶၢႆႉပၢႆႈၵႂႃႇမူၵ်းသွၼ်ႈဝႆႉတီႈ လွတ်ႈၽေး။ ၾၢႆႇပၵ်းတႃၾိင်ႈၾႃႉ ပိုၼ်ၽၢဝ်ႇဝႆႉဝႃႈ ၼမ်ႉမႄႈသွင်ယၢင်း ၼွင်းႁႅင်း။ ထႅင်ႈဝၼ်းသွင်ဝၼ်းၵေႃႈ တေၼွင်းထူမ်ႈၶိုၼ်ႈသုင်ထႅင်ႈ လိူဝ်ၼႆႉ – ဝႃႈၼႆ။