ပီၼႆႉ ၼႂ်းၸိုင်ႈတႆးပွတ်းၸၢၼ်း ယူႇတီႈ ႁွင်ႈၵၢၼ် ၽွင်းလူင်ၾၢႆႇၽုၵ်ႇသွမ်ႈ တႂ်ႈသိုၵ်းမၢၼ်ႈ ၵုမ်းၵမ် ႁႄႉႁၢမ်ႈဝႃႈ ဢမ်ႇပၼ်ၶႂၢင်ႉ ၽုၵ်ႇတူၼ်ႈမွၵ်ႇသပေႇ ဝႃႈၼႆ။

ဝၢႆးသေ တႄႇပၢင်ယၼ်ႇသိုၵ်း 1027 ၼႂ်းၸိုင်ႈတႆးပွတ်းႁွင်ႇ လၢႆဝၼ်းၵူၺ်း မီၶၢဝ်ႇဢွၵ်ႇဝႃႈ ၵူၼ်းမိူင်း တေၶွၼ်ႈတုမ် ၵၼ်သေ ႁဵတ်းပၢင်တူင်ႉၼိုင် 1111 (ဢွင်ႇသပေႇ) ၼႆလႄႈ ၼႂ်းၸိုင်ႈတႆး ပွတ်းၸၢၼ်း ပႃးၸဵမ် တူဝ်ႈမိူင်းမၢၼ်ႈပတ်းပိုၼ်ႉ ၵွပ်ႈၼႆလႄႈ သိုၵ်းမၢၼ်ႈ သင်ႇႁႄႉႁၢမ်ႈ ဢမ်ႇပၼ်ၽုၵ်ႇသွမ်ႈ၊ ဢမ်ႇပၼ်သိုဝ်ႉၶၢႆ တူၼ်ႈမွၵ်ႇသပေႇ ၼႆယဝ်ႉ။

ၸဝ်ႈသူၼ် ၽုၵ်ႇသွမ်ႈတူၼ်ႈမွၵ်ႇသပေႇ ဝဵင်းဢေးတႃႇယႃႇ ၵေႃႉၼိုင်ႈလၢတ်ႈဝႃႈ – သိုၵ်းမၢၼ်ႈ သင်ႇလၢတ်ႈမႃးတီႈ ၽူႈၵွၼ်းမူႇဝၢၼ်ႈဝႃႈ ၽႂ်တိုၼ်းတေဢမ်ႇလႆႈၽုၵ်ႇမွၵ်ႇသပေႇ၊ ပေႃးႁၼ်မႅၼ်ႈ ၽုၵ်ႇဝႆႉၼႆၸိုင် တေၺႃးဢဝ်လိူင်ႈလႄႈ တေမႃးယႃႉပႅတ်ႈ။ ၵွပ်ႈၼၼ် ၸဝ်ႈသူၼ်မၢင်ၵေႃႉတႄႉ ဢွၼ်ၵၼ်ၶိုၼ်း မႄးထူၺ်ႈပႅတ်ႈ – ဝႃႈၼႆ။

တူၼ်ႈမွၵ်ႇသပေႇၼႆႉ ပဵၼ်တူၼ်ႈမႆႉၶၢဝ်းယၢဝ်းလႄႈ တိုၼ်းလၢင်းၵေႃႈယႂ်ႇ။ တႄႇဢဝ်ဝၼ်းၽုၵ်ႇသွမ်ႈ ၼၼ်ႉယဝ်ႉ ပေႃးတဵမ် 3 ပီၵွၼ်ႇ ၸင်ႇတေၶုတ်းဢဝ်လႆႈပႃးတူၼ်ႈတေႃမၼ်း – ဝႃႈၼႆ။

ၸွမ်းၼင်ႇ လွင်ႈယုမ်ႇယမ် ၵူၼ်းမိူင်းမၢၼ်ႈ ၵမ်ႈၽွင်ႈသေ မွၵ်ႇသပေႇၼႆႉ ပဵၼ်မိၵ်ႈမၢႆ ဢွင်ႇပေႉသေဢမ်ႇၵႃး ယွၼ်ႉလွင်ႈတူင်ႉၼိုင် 1111 တူဝ်ၼၼ်ႉလႄႈ သိုၵ်းမၢၼ်ႈ ၸင်ႇသင်ႇႁႄႉႁၢမ်ႈၸိူင်ႉၼႆ – ၸဝ်ႈသူၼ် ၽုၵ်ႇသွမ်ႈ မွၵ်ႇသပေႇ ၵေႃႉၼိုင်ႈ လၢတ်ႈၼင်ႇၼႆ။

ပိုၼ်ႉတီႈ ၸိူဝ်းၽုၵ်ႇသွမ်ႈ တူၼ်ႈမွၵ်ႈသပေႇၼမ် ၼႂ်းၸိုင်ႈတႆးပွတ်းၸၢၼ်းၼႆႉ တေမီးမိူၼ်ၼင်ႇ ဝဵင်းဢွင်ႇပၢၼ်း၊ ဢေးတႃႇယႃႇလႄႈ ၼႂ်းၸႄႈဝဵင်းသူၺ်ႇၺွင်ႇ ၸိူဝ်းၼႆႉ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။