သိုၵ်းမၢၼ်ႈ ယိုတ်းမိူင်း တင်ႈၸႂ် ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းသႅၼ်ဝီ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်း မိူင်းလူႉတၢႆ 10 ပၢႆ မၢတ်ႇၸဵပ်း 20 ပၢႆ ယဝ်ႉၵေႃႈ တိူဝ်ႉၺႃးႁၢၼ်ႉၶၢႆၵုၼ်ႇ ႁိူၼ်းယေး လူႉၵွႆထႅင်ႈတင်းၼမ်။
ဝၼ်းတီႈ 18/07/2024 ယၢမ်းဝၢႆးဝၼ်း 4 မူင်းပၢႆ ၶိူင်ႈမိၼ်သိုၵ်းမၢၼ်ႈ ၸႅၵ်ႊၾၢႆႊတိူဝ်ႊ (Jet Fighter) လမ်းၼိုင်ႈ မႃးပွႆႇမၢၵ်ႇသႂ်ႇ တီႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ဢမ်ႇယွမ်း 6 လုၵ်ႈ ဢွင်ႈတီႈ မၢၵ်ႇဢၼ်မႃးတူၵ်းသႂ်ႇၼၼ်ႉသမ်ႉ တီႈၼွင်မူဝ်၊ ၵၢတ်ႇလူင်၊ ႁူင်းႁေႃး (မြို့တော်ခန်းမ) လႄႈ ၼႂ်းတူင်ႈၼႃး ၸိူဝ်းၼႆ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၶိူင်ႈမိၼ် Jet Fighter သိုၵ်းမၢၼ်ႈ မႃးပွႆႇမၢၵ်ႇ သႂ်ႇဢမ်ႇယွမ်း 5-6 လုၵ်ႈ။ တိူဝ်ႉၺႃး ၵူၼ်းမိူင်းတၢႆမၢတ်ႇမွၵ်ႈ 40 ၼႆႉ။ ၼႂ်းၼၼ်ႉ လူႉတၢႆမွၵ်ႈ 15 ၵေႃႉ မၢတ်ႇၸဵပ်း 20 ပၢႆ။ ၵူၼ်းမၢတ်ႇၸဵပ်းတႄႉ ၵမ်ႈၼမ် လႆႈတေႃႉသူင်ႇယူတ်းယႃ တီႈၵူတ်ႉၶၢႆ ၊ ႁူဝ်ပၢင်ႇ ၸိူဝ်းၼၼ်ႉဢေႃႈ။ ယဝ်ႉၵေႃႈ ၶၢပ်ႈတူဝ်တၢႆ ၵူၼ်းမိူင်း ၵမ်ႈၽွင်ႈတႄႉ တေၽဝ်မိူဝ်ႈၼႆႉယဝ်ႉ။ လွင်ႈလူႉသုမ်းၵေႃႈ မီးၼမ်ၼႃႇၶႃႈ။ တီႈၵၢတ်ႇလူင်ၼႆႉ တေလႆႈဝႃႈ ၺႃးၼမ်သေပိူၼ်ႈၶႃႈယဝ်ႉ”- ဝႃႈၼႆ။
ယၢမ်းလဵဝ် ဢွင်ႈတီႈ မၢၵ်ႇလူင်တူၵ်းသႂ်ႇ တီႈၵၢတ်ႇလူင် ဝဵင်းသႅၼ်ဝီၼႆႉ ယူႇတီႈ သိုၵ်းၵဝ်ႈၵၢင်ႉ MNDAA ၶဝ် ႁၢမ်ႈ ၵူၼ်းမိူင်းၶဝ်ႈ ယဝ်ႉၵေႃႈ ၸွမ်းသဵၼ်ႈတၢင်းလူင် ၸိူဝ်းၼႆႉၵေႃႈ ၶဝ်ပိၵ်ႉဢိုတ်းဝႆႉ ႁၢမ်ႈၵူၼ်းမိူင်း ၵႂႃႇမႃးထႅင်ႈ ၼႆယဝ်ႉ။
“ႁၢၼ်ႉၶၢႆၶူဝ်းၵုၼ်ႇၸွမ်းထႅဝ်ၵၢတ်ႇၼၼ်ႉ လူႉၵွႆ ဢမ်ႇယွမ်း 10 လင် ႁိူၼ်းယေး ၸိူဝ်းၼႆႉထႅင်ႈ တေလႆႈ ဝႃႈ လူႉၵွႆသုမ်းၼမ်ၶႃႈဢေႃႈ။ ၵူၼ်းမိူင်းဢၼ်ၺႃးၸၢၵ်ႇမၢၵ်ႇလူႉတၢႆ ၵမ်ႈၽွင်ႈ ထိုင်တီႈယွၵ်းယွႆ ၵိုတ်းၵွၵ်း ႁူဝ်လၢႆလၢႆ ၸိူဝ်းၼႆႉ ၵေႃႈမီးယဝ်ႉ။ လွင်ႈႁူဝ်ယွႆႈမၼ်း ဢၼ်ဝႃႈ တၢႆလၢႆၵေႃႉ မၢတ်ႇလၢႆၵေႃႉ ၸၢႆးယိင်းမီးၵႃႈႁိုဝ် ၸိူဝ်းၼႆႉတႄႉ ႁဝ်းၶႃးယင်းပႆႇလႆႈႁူႉတႅတ်ႈတေႃးၶႃႈ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
ၼႂ်းလိူၼ်ၵျူႊလၢႆႊၼႆႉၵူၺ်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းသႅၼ်ဝီၼႆႉ ဢမ်ႇယွမ်း 4 ပွၵ်ႈ ပႃးပွၵ်ႈၼႆႉယဝ်ႉ။ မိူဝ်ႈဝၼ်းတီႈ 3 ၼၼ်ႉ တိူဝ်ႉၺႃးၵူၼ်းမိူင်း ၼႂ်းဢိူင်ႇမိူင်းလီ တၢႆၵိုၵ်းႁိူၼ်း ၵေႃႉၼိုင်ႈ။ ဝၼ်းတီႈ 4 သမ်ႉ မႃးပွႆႇထႅင်ႈ 3 လုၵ်ႈ တီႈပွၵ်ႉ 2 တိူဝ်ႉၺႃးႁူင်းပလိၵ်ႈမၢၼ်ႈလႄႈ ႁိူၼ်းယေးလူႉၵွႆ (ယွၵ်းယွႆ) သွင်လင်။
ဝၼ်းတီႈ 12 သမ်ႉ မႃးပွႆႇသႂ်ႇထႅင်ႈ တီႈႁူင်းႁဵၼ်း ၸၼ်ႉသုင်မၢႆ 1 တင်း မၢႆ 2 ၼၼ်ႉၵေႃႈ ႁူင်းႁဵၼ်းလူႉၵွႆ (ယွၵ်းယွႆ) တင်းသွင်လင်။ ဝၼ်းတီႈ 13 သမ်ႉ မႃးပွႆႇသႂ်ႇ တီႈပွၵ်ႉဝဵင်းၼၢင်း ၼၼ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇရူတ်ႉၵႃးလႄႈ ႁိူၼ်းယေး ၵူၼ်းမိူင်း လူႉၵွႆၸွမ်းၵမ်ႈၽွင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ