သိုၵ်းမၢၼ်ႈ မၢပ်ႇၼႄးဝႃႈ ယွၼ်ႉၵူၼ်းမိူင်းဢမ်ႇလႆႈၶႂၢင်ႉ ၶၢမ်းၶဝ်ႈယူႇၼႆလႄႈ တဵၵ်းၸႂ်ႉၵူၼ်း ၸိူဝ်းယူႇၸွမ်းသၢပ်ႇဝဵင်းတူၼ်ႈတီး ၸိူဝ်းၼၼ်ႉ ၶၢႆႉပၢႆႈ ဝႃႈၼႆ။

ဝၼ်းတီႈ 13/7/2024 ႁွင်ႈၵၢၼ်ၾၢႆႇပႃႇမႆႉ ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ် တဵင်းၸႂ်ႉၵူၼ်းမိူင်း တီႈပွၵ်ႉၺွင်ႇၽိဝ်ႇ ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၶၢႆႉပၢႆႈႁႂ်ႈယဝ်ႉ ၼႂ်းဝၼ်းတီႈ 15 ၼႆႉ ဝႃႈၼႆ။

ၵူၼ်းဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၼႄးဝႃႈ ပဵၼ်ဢွင်ႈတီႈဢၼ် ဢမ်ႇလႆႈၶႂၢင်ႉသေ မႃးႁဵတ်းႁိူၼ်းယူႇဝႆႉၼႆလႄႈ ၾၢႆႇပႃႇမႆႉတင်း ၾၢႆႇလိူမ်ႈလႆႇၶဝ် သူင်ႇလိၵ်ႈၸီႉသင်ႇ ႁႂ်ႈၵူၼ်းတီႈၼၼ်ႈ ၶၢႆႉဢွၵ်ႇၼႆဢေႃႈ”- ဝႃႈၼႆ။

ဢိင်ၼိူဝ်လွင်ႈၼႆႉ ၶဝ်ႁႂ်ႈၶၢႆႉဢွၵ်ႇ ၼႂ်းပိုၼ်ႉတီႈၼၼ်ႈ ဝၼ်းတီႈ 15 ၼႆႉ ႁႂ်ႈပဵၼ်ဝၼ်းလိုၼ်းသုတ်း သင်ဢမ်ႇၶၢႆႉၸိုင် တၵ်းတေၺႃးတူတ်ႈတၢမ်ႇ ၽိတ်းပၵ်းပိူင်တီႈလိၼ်လႄႈ ၶွၼ်ႇ ၸွမ်းၼင်ႇ မၢႆမီႈမတ်ႉတႃ 15 (ဃ) ယဝ်ႉၵေႃႈ မတ်ႉတႃ 69 (2) ၸိူဝ်းၼႆႉထႅင်ႈ ဝႃႈၼႆ။

“ယၢမ်းလဵဝ် ဢွင်ႈတီႈဢၼ်မီးၸွမ်းၶႅပ်ႇဝဵင်း ၸိူဝ်းၼၼ်ႉ တေမီးဢေႊၶိူဝ်ႊ 2,000 ပၢႆ သိုၵ်းမၢၼ်ႈ တေ ယိုတ်းဢဝ်လၢႆ ယွၼ်ႉပဵၼ်တီႈလိၼ်ၶၢမ်းၶႂၢၵ်ႈယူႇသဝ်း (ကျူးကျော်နယ်မြေ) ၼႆဝႃႇ”- ၵူၼ်းဝဵင်း တူၼ်ႈတီး သိုပ်ႇလၢတ်ႈၼႄၼင်ႇၼႆ။

ဢၼ်သိုၵ်းမၢၼ်ႈၶဝ် မၵ်းမၼ်ႈပဵၼ်ဢွင်ႈတီႈလိၼ် ဢၼ်ၶၢမ်းၶဝ်ႈၵႂႃႇၼႆၼၼ်ႉ တေပႃးၼႂ်းပွၵ်ႉၵယိၼ်ႇမယေႇထွတ်ႉ၊ ပွၵ်ႉၸဝ်ႈၸၢမ်ႇထုၼ်း၊ ပွၵ်ႉၺွင်ႇၽိဝ်ႇ၊ ပွၵ်ႉရတၼႃႇသီႇရိ၊ ပွၵ်ႉၶျၢမ်းမျေႇ၊ သူၺ်ႇတွင်ႇ၊ ၸဵင်ႇပၢၼ်း၊ ၵၢၼ်ႇသႃႇလႄႈ ပွၵ်ႉၵျွင်းၵျီးၸု ၸိူဝ်းၼႆႉ။

ၵူၼ်းမိူင်း ဢၼ်ၺႃးသိုၵ်းမၢၼ်ႈ တဵၵ်းၸႂ်ႉပၢႆႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “တီႈလိၼ်ဢၼ်ၶႃႈ သိုဝ်ႉဝႆႉၼႂ်းပွၵ်ႉ ၵျွင်းၵျီးၸု ၼႂ်းၼႃႈလိၼ် 12 ၼၼ်ႉ ပႃးၵႂႃႇယဝ်ႉ။ ၶႃႈသိုဝ်ႉဝႆႉၵူၺ်း ပႆႇတၼ်းလႆႈႁဵတ်း ႁိူၼ်းယူႇ။ မိူဝ်ႈသိုဝ်ႉတႄႉ သိုဝ်ႉဝႆႉတီႈၵူၼ်းၵၢင်(ပွႆးၸႃး) ၶဝ်။ ၶႃႈလႆႈသိုဝ်ႉဝႆႉ 2 လွၵ်းလႂ် မႅၼ်ႈငိုၼ်း 90 သႅၼ်ပျႃး။ ၼိုင်ႈလွၵ်းၼႆႉ တေၵႂၢင်ႈမွၵ်ႈ 100 ထတ်း/ ပေႇ”- ဝႃႈၼႆ။ 

ၶၢဝ်းတၢင်း သိုၵ်းမၢၼ်ႈယိုတ်းမိူင်းမႃးၼႆႉ ၵႆႉမီးၵူၼ်းထၢမ်သိုဝ်ႉၶၢႆ တီႈလိၼ်ၵၼ်မႃးၼမ်။ မၢင်ဢွင်ႈ တီႈသိုဝ်ႉၶၢႆပဵၼ်တၢင်းၵၢၼ်။ မၢင်ဢွင်ႈတီႈ ၵူၼ်းမိူင်းဢမ်ႇပွင်ႇၸႂ်လီသေ သိုဝ်ႉၶၢႆၵၼ်ဝႆႉလႄႈ ထူပ်းပၼ်ႁႃ လွင်ႈသိုၵ်းမၢၼ်ႈ လွၵ်ႇငိုတ်ႈယိုတ်းဢဝ် ၶိုၼ်းၵေႃႈမီး ဝႃႈၼႆ။